သျှမ်းပြည်မြောက်ပိုင်းကျောက်မဲမြို့နယ် မိုင်းတင်းကျေးရွာအုပ်စု၏ ရပ်ကျေးစာရေးတဦး အနီးကပ်သေနတ်ပစ်ခတ်ခြင်းခံရသဖြင့် ထိခိုက်ဒဏ်ရာရရှိကာ ကျောက်မဲဆေးရုံသို့ပို့ဆောင်ထားရ ကြောင်းသိရသည်။
ဇန်နဝါရီလ ၂၂ ရက်နေ့ ညနေပိုင်းက မိုင်းတင်းအုပ်စု၏ ရပ်ကျေးစာရေး ဦးစိုင်းမြင့်ဦးကြွယ် မိုင်းတင်းသို့ ကိုယ်ဝန်ဆောင်၊ မိခင်နှင့်ကလေးများစာရင်းကောက်ပြီးအပြန် မိုင်းတင်းနှင့်နမ့်ဆော့ရွာကြားအရောက် ကျောက်မဲဘက်မှမောင်းနှင်လာသည့်ဆိုင်ကယ်သမား က အနီးကပ်သေနတ်ပစ်ခတ်ခဲ့သဖြင့် ထိခိုက်ဒဏ်ရာရရှိခဲ့ကြောင်း ကျောက်မဲဒေသခံ စိုင်းနွမ်က သျှမ်းသံတော်ဆင့်အားပြောသည်။
“သူ့ကို ၆ ချက် သေနတ်ပစ်တာ သေနတ်သမားတွေက။ ဒါမယ့် ၂ ချက်ဘဲထိတယ်။ ယာဘက်နားတချက်နဲ့ ၀မ်းဗိုက်မှာတချက်။ သူ့ကိုလူမှုကူညီရေးအဖွဲ့က လာသယ်ပြီးဆေးရုံပို့ပေးတယ်။ ဘယ်သူပစ်လဲမသိဘူး။ အဲလိုချောင်းမြောင်းပစ်ခတ်ခံရမှုကတော့ နေ့တိုင်းလိုလိုဖြစ်လာနေပြီ ။ လူထုလုံခြုံရေးမရှိတော့ပါဘူး”- ဟု စိုင်းနွမ်က ပြောသည်။
ထိုသို့ ပစ်ခတ်ခံရမှုနှင့်ပတ်သက်ပြီး ကျောက်မဲမြို့နယ် မဲဆန္ဒနယ်အမှတ် ၁ ပြည်နယ်လွှတ်တော် ကိုယ်စား လှယ် စိုင်းထွန်းဝင်းက နိုင်ငံရေးမတည်ငြိမ်မှုကြောင့် တရားဥပဒေစိုးမိုးမှုအားနည်းကာ ချောင်းမြောင်း ပစ်ခတ်မှုများကြောင့် ဒေသခံလူထု လုံခြုံရေးအတွက် အထူးစိုးရိမ်ရကြောင်း သျှမ်းသံတော်ဆင့်အားပြောသည်။
“ပစ်ခတ်မှုလက်သည်ကိုတော့ ခုထိ မသိရပါဘူး။ အခုလို ဒေသခံလူထု မကြာခဏ ချောင်းမြောင်းပစ်ခတ်ခံနေရတာဟာ တရားဥပဒေစိုးမိုးမှုမရှိလို့ဘဲ။ နိုင်ငံရေးပြသနာကိုဖြေရှင်းရမယ်။ တိုင်းရင်းသားအားလုံး စုပေါင်းပြီးတော့ ဖွဲ့စည်းပုံအခြေခံဥပဒေ ပြန်လည်ပြင်ဆင်ရေးဆွဲရမယ်။ ပြောမယ်ဆိုရင် ရပိုင်ခွင့်တွေ တန်းတူညီမျှမှုမရှိလို့ နိုင်ငံရေးမတည်ငြိမ်တာ။ ဒီလိုဖြစ်လာရင်ဘယ်သူမှ တာဝန်မယူဘူး။ အချင်းချင်း ပြစ်တင်လက်ညှိုးထိုးပြီးတော့ ဒီတိုင်းဘဲပြီးသွားတာဘဲတွေ့ရတယ်။ ”- ဟု စိုင်းထွန်းဝင်းက သျှမ်းသံတော်ဆင့်အားပြောသည်။
ကျောက်မဲမြို့နယ်အတွင်း အစိုးရတပ်မတော်၊ ရဲတပ်ဖွဲ့ ၊ တအာင်းတပ်ဖွဲ့တို့၏ ညီနောင်မဟာမိတ်တပ်ဖွဲ့ ၊ သျှမ်းတပ်ဖွဲ့များ လှုပ်ရှားကြသဖြင့် တိုက်ပွဲလည်းမကြာခဏဖြစ်ပွါခဲ့သည်။
ထိုကဲ့သို့ အနီးကပ်လုပ်ကြံသတ်ဖြတ်မှုမျိုး ယမန်နှစ် နို၀င်ဘာလ ၃ ရက်နေ့ကလည်း ဖြစ်ပွါးခဲ့သည်။ ထိုစဉ်ကလည်း မိုင်းတင်းအုပ်စုအုပ်ချုပ်ရေးမှူး (အုပ်စုဥက္ကဌ) စိုင်းထွန်းရင် ၊ နားမွန်းရွာသူကြီး(ရွာအုပ်ချုပ်ရေးမှူး) စိုင်းအောင်သိန်း၊ လွယ်အွယ်ရွာ သူကြီးဟောင်း လုံးဆုဇေယျ တို့အား မြို့တွင်းစားသောက်ဆိုင်တခုအတွင်း သေနတ်သမား ကဝင်ရောက်ပစ်ခတ် ခဲ့သဖြင့် ၂ ဦးမှာ ပွဲချင်းပြီးသေဆုံးခဲ့ပြီး ကျန်တဦးမှာ ဆေးရုံအရောက်သေဆုံးခဲ့ရသည်။
ကျောက်မဲမြို့နယ်အတွင်း ပစ်ခတ်သတ်ဖြတ်မှု အမှုအခင်းများတွင် ပစ်ခတ်မှုလက်သည်အား ဖမ်းမိခြင်းမရှိခဲ့ပေ။
