သိန္နီမြို့နယ် လက်နက်ခဲယမ်းများ သိမ်းဆည်းရမိ

0

သျှမ်းပြည် မြောက်ပိုင်း သိန္နီမြို့နယ် တွင် လက်နက်ခဲယမ်းများ မြန်မာ့ တပ်မတော် က သိမ်းဆည်းရမိကြောင်း သတင်းရရှိသည်။

Photo by တပ်မတော် သတင်းမှန် ပြန်ကြားရေ

ဇန်နီဝါရီ ၁၅ရက် ညနေ ၅နာရီ ၄၅ မိနစ် တွင် သိန္နီမြို့နယ် နမ့်ခိုက်ကျေးရွာ အနီးရှိ ကျောက်လိုဏ်ဂူ အတွင်း၌ ၁၀၇ မမ ဒုံးသီး၊ လက်နက်ခဲယမ်း များကို သိမ်းဆည်းရမိကြောင်း တပ်မတော် သတင်းမှန် ပြန်ကြားရေး ထုတ်ပြန်ချက် တွင် ရေးသားထားသည်။

သိမ်းဆည်းရမိသည့် လက်နက်ခဲယမ်းများမှာ တိုင်းရင်းသားလက်နက်ကိုင် အဖွဲ့ တချို့ မှ လျှို့ဝှက် သိမ်းဆည်ထားသည့် ဟုလည်း ထုတ်ပြန်ချက်တွင် ဖော်ပြထားသည်။

အဆိုပါ လက်နက်ခဲယမ်းများမှာ ၁၀၇ မမ အောက်ခံ သုံးချောင်းထောက် ပစ်စင် တခု၊ ၁၀၇ မမ ဒုံးသီး ၆လုံး၊ ၁၀၇ မမ ဒုံးသီးယမ်းတောင့် ၁၂ တောင့်၊ ၁၀၇ မမ အဝေးထိန်း ရီမု တခု၊ ၁၀၇ မမ ဒုံးသီး ထပ်ဖူး ၂၂လုံးတို့ ဖြစ်ကြောင်းသိရသည်။

ဆက်လက်ပြီး RPG ဒုံးသီး ၁၀၈ လုံး၊ RPG ဒုံးသီးယမ်းတောင့် ၁၀၈ တောင့်၊ ၄၀ မမ ဗုံးသီး ၂၉၉ လုံး၊ ၆၀ မမ ဗုံးသီး ၁၂လုံး နှင့် ၆၀ မမ ဗုံးသီး ယမ်းထုပ် ၆၀ ထုပ် တို့ကိုလည်း သိမ်းဆည်းရမိကြောင်း လည်း သိရသည်။

အဆိုပါ ကိစ္စနှင့် ပတ်သက်ပြီး သိန္နီမြို့နယ် ပြည်သူ့လွှတ်တော် ကိုယ်စားလှယ် အမတ် စိုင်းဦးခမ်း က “ လက်နက်ခဲယမ်းတွေ ဖမ်းမိတာတော့ ဟုတ်ပါတယ်။ အခု အချိန်ထိတော့ ဘယ်အဖွဲ့ ရဲ့ လက်နက်တွေလည်းဆိုတာ မသိရသေးဘူး” ဟု သျှမ်းသံတော်ဆင့် သို့ ပြောသည်။

ထို လက်နက်ခဲယမ်းများ သိမ်းဆည်းရမိသည့်နေရာ သည် တိုင်းရင်းသားလက်နက်ကိုင်များ ဖြစ်သည့် ကချင် လွတ်မြောက်ရေး တပ်မတော်(KIA)၊ တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) နှင့် ကိုးကန့် တပ်မတော် ( MNDAA) တို့ လှုပ်ရှားသည့်နေရာ ဟု လည်း စိုင်းဦးခမ်း က ဆိုသည်။

“ နမ့်ခိုက် ကျေးရွာ ဘက်က ကချင်တွေ အများစုနေတဲ့နေရာပါ။ နောက် အဲ့ဘက်ကို ကိုးကန့်တွေ အမြဲတမ်း ဈေးလာဝယ်ကြတယ်။ ဒါပေမယ့် ဘယ်သူ့ လက်နက်ဆိုတာ ပြောရခက်တယ်” ဟု စိုင်းဦးခမ်း က ပြောသည်။

သိမ်းဆည်းရမိသည့် လက်နက်ခဲယမ်း များထဲက ၁၀၇ မမ ၃ချောင်းထောက်သည် KIA တပ်ဖွဲ့ မှ ထုတ်လုပ်ထားကြောင်း၊ ထိုနယ်မြေသည် KIA နှင့် TNLA လှုပ်ရှားသည့်နေရာ ဟု တပ်မတော် သတင်းမှန် ပြန်ကြားရေး မှ ပြောရေးဆိုခွင့်ရှိသူ ဗိုလ်မှူးချုပ် ဇော်မင်းထွန်း က ပြောသည်။

ယမန်နှစ် နိုဝင်ဘာ တွင်လည်း သျှမ်းပြည် မြောက်ပိုင်း နမ့်ဆန်မြို့နယ် ဟိုမိန်း ကျေးရွာ တွင် TNLA ၏ လေယာဉ်ပစ် ဒုံး လက်နက် အပါအဝင် လက်နက်ခဲယမ်များကို မြန်မာ့တပ်မတော် နယ်မြေ ရှင်းလင်းစဉ် သိမ်းဆည်းရမိခဲ့ကြောင်း သိရသည်။

Leave a Comments

SHARE