မြန်မာနိုင်ငံတွင် ရင်ခွင်မဲ့စွန့်ပစ်ခံ ကလေးများ ထပ်မံ မရှိစေရန် အတွက် အလွန်အရေးကြီးသည် ဟု ဒေါက်တာ မြသီတာ က ပြောကြားခဲ့သည်။
အဆိုပါ ပြောကြားချက်သည် ယနေ့ (ဇန်နဝါရီ ၁၀) ရက်တွင် သျှမ်းပြည် တောင်ကြီးတွင် ပြုလုပ်သည် ရင်ခွင်မဲ့ ကလေးငယ်များနှင့် တကိုယ်ရည် မိခင်များအတွက် နှစ်သိမ့်ဆွေးနွေး ဆရာဖြစ်သင်တန်း ၌ ဒေါက်တာ မြသီတာ က ပြောကြားခဲ့သည်။
မြန်မာနိုင်ငံတွင် စွန့်ပစ်ခံရသည့် ကလေးငယ်များ အတွက် ကူညီ စောင့်ရှောက်ရေး နှင့် နောက်ထပ် ရင်ခွင့်မဲ့ စွန့်ပစ် ခံကလေးများ ထပ်မဖြစ်စေရန် အတွက် ကာကွယ်တားဆီးရေးသည် အလွန် အရေးကြီးကြောင်း မြန်မာနိုင်ငံ ရင်ခွင်မဲ့ ကလေးငယ်များလျော့ရေး နှင့် ကာကွယ်စောင်ရှောက်ရေး အသင်း (ဗဟို) အထွေထွေအတွင်းရေးမှူး ဒေါက်တာ မြသီတာ က ပြောဆိုလိုက်သည်။
“ ကလေးငယ်တွေ ရင်ခွင်မဲ့ ဖြစ်တဲ့ အကြောင်းရင်းက မလိုချင်တဲ့အချိန်မှာ ကိုယ်ဝန်ရသွားတာ။ နောက်လိင်လှည့်ဖြားခံရလို့ ကလေးငယ်တွေ ရင်ခွင်မဲ့ဖြစ်ရတာ။ ဒါတွေ မဖြစ်အောင် ကျမတို့ အသင်း က နှစ်သိမ့်ဆွေးနွေးမှုတွေ ပြုလုပ်ရခြင်းဖြစ်ပါတယ်” ဟု ဒေါက်တာ မြသီတာ က ဆိုသည်။
ကလေးမလိုသည့် အချိန်တွင် ကိုယ်ဝန် မရအောင်နှင့် ကလေးမွေးလာပြီး တကိုယ်ရည် မိခင်များ လောကဓံ ကို ကြံ့ကြံ့ခံ စောင့်ရှောက်နိုင်ရန် နှင့် မှန်ကန် ဆုံးဖြတ်ချက် နိုင်အောင် အတွက် နှစ်သိမ့်ဆွေးနွေးမှုသည် အလွန်အရေးကြီးကြောင်းလည်း ဒေါက်တာ မြသီတာ က ပြောသည်။
“သူတို့တွေ နှစ်သိမ့်ဆွေးနွေးမှု တွေ ရရင် မဖြစ်သင့်တာတွေ မဖြစ်တော့ဘူး။ ကိုယ့်ကိုကိုယ် သေကြောင်းကြံတာတွေ ကလေးဖျတ်ချတာတွေ စွန့်ပစ်လိုက်တာတွေ မဖြစ်တော့ဘူး။ မှန်မှန်ကန်ကန် ဆုံးဖြတ်တက်သွားမှာပါ” ဟု လည်း ဒေါက်တာ မြသီတာ က ထပ်လောင်း ပြောကြားလိုက်သည်။
ရင်ခွင်မဲ့ ကလေးငယ်များ ကို ဆေးရုံ၊ လမ်းဘေး တွင် အများစု စွန့်ပစ်ကြသည်။
ထို့ကြောင့် နှစ်သိမ့်ဆွေးနွေးမှု အတွက် လည်း ဆရာဖြစ်သင်တန်းလည်း ပေးကြောင်း၊ ထိုသင်တန်းတွင် နားထောင်နိုင်စွမ်းရည်၊ ယုံကြည်မှု ထူထောင်နိုင်စွမ်းရည်၊ လိုအပ်သည့် သတင်း အချက်အလက် ပေးနိုင်ပြီး တဖက်သား နားလည်လွယ်သည့် စကားများပြောတက်နိုင်စွမ်းရည် နှင့် လူတဖက်သား အတွင်းစကားထိန်းသိမ်းတက်ရန်လည်း လိုအပ်ကြောင်း တို့ ပါဝင်သည်။
မြန်မာနိုင်ငံတွင် ရင်ခွင်မဲ့ ကလေးငယ် အများပြားရှိသော်လည်း အချက်အလက် အရ ပြောဆိုရန်ခက်ခဲကြောင်း၊ မြန်မာနိုင်ငံတွင် ရင်ခွင်မဲ့ ကလေးဂေဟာ ၆၀၀ကျော်ရှိကြောင်း သိရသည်။
ရင်ခွင်မဲ့ ကလေးငယ်များနှင့် တကိုယ်ရည် မိခင်များအတွက် နှစ်သိမ့်ဆွေးနွေး ဆရာဖြစ်သင်တန်း ကို သျှမ်းပြည် တွင် ပထမဆုံး အကြိမ် လာရောက် ပြုလုပ်ပြီး၊ သျှမ်း မြောက် နှင့် သျှမ်း ရှေ့တွင် လည်း ဆက်လက် ပြုလုပ်သွားမည် ဟု သိရသည်။
