ယခုနှစ်ဆန်းပိုင်း တွင် ၂၁ရာစု ပင်လုံငြိမ်းချမ်းရေး ညီလာခံ စတုတ္ထကြိမ်ကျင်းပရန် ဆုံးဖြတ်ချက် ချထားကြောင်း သတင်းရရှိသည်။

အဆိုပါ ဆုံးဖြတ်ချက်သည် ယနေ့(ဇန်နဝါရီ ၈) ရက် နေပြည်တော်တွင် ပြုလုပ်သည့် တနိုင်ငံလုံး အပစ်ခတ်တိုက်ခိုက်ရေး၊ ရပ်စဲရေး သဘောတူစာချုပ် အကောင်အထည်ဖော်မှုဆိုင်ရာ ညှိနှိုင်းအစည်းအဝေး (JICM)အစည်းအဝေးတွင် ဆုံးဖြတ်ခဲ့ကြခြင်းဖြစ်သည်။

“ ၂၁ရာစု ပင်လုံ ငြိမ်းချမ်းရေး ညီလာခံ စတုတ္တအကြိမ် အစည်းအဝေး ကို ဒီ ၂၀၂၀ ပြည်နှစ်ဆန်းပိုင်း ၄လကာလ အတွင်းမှာ ကျင်းပဖို့ ဆိုပြီးတော့ ကျနော်တို့ ခေါင်းဆောင်တွ ဆုံးဖြတ်ခဲ့ပါတယ်” ဟု နိုင်ငံတော် သမ္မတ ရုံးမှ ပြောခွင့်ရ ပုဂ္ဂိုလ် ဦးဇော်ဌေး က ယနေ့ JICM အစည်းအဝေး အပြီး သတင်းစာရှင်းလင်းပွဲတွင် ပြောကြားခဲ့သည်။

ယနေ့ ပြုလုပ်သည့် JICM အစည်းအဝေးတွင် ဘုံသဘောတူညီချက် ၈ချက် ရရှိခဲ့ကြောင်းလည်း ဦးဇော်ဌေး က ပြောသည်။

ငြိမ်းချမ်းရေး လုပ်ငန်းဏသ် တစ်ဆို့မှု ကျော်လွှားရေး ဆွေးနွေးရန် အတွက် နှစ်ဖက် ညှိနှိုင်းရေး အဖွဲ့ တွေ့ဆုံဆွေးနွေးပွဲ များမှ တဆင့် ရလဒ်ကောင်းမွန်သည့် ပြည်ထောင်စု ငြိမ်းချမ်းရေး ညီလာခံ ၂၁ရာစု ပင်လုံ စတုတ္ထအစည်းအဝေး ကျင်းပနိုင်ရေး ကို ယနေ့ ၈ ကြိမ်မြောက် JICM အစည်းအဝေး က မီးစိမ်းပြ လိုက်ကြောင်း ဗိုလ်ချုပ် ယွက်စစ် က အစည်းအဝေး နိဂုံးချုပ် တွင် ပြောကြားခဲ့သည်။

ငြိမ်းချမ်းရေး လုပ်ငန်းစဉ် တွင် အားလုံး ပါဝင်ရေး အတွက် ဆုံးဖြတ်ထားပြီး ဖြစ်သည့်အတွက် ကွင်းဆင်လက်တွေ့ အကောင်အထည်ဖော်ဆောင်ရွက်ရန် တက်နိုင်သမျှ ကြိုးပမ်းစေလိုကြောင်းလည်း ဗိုလ်ချုပ် ယွက်စစ် က ပြောသည်။

ယနေ့ နေပြည်တော်တွင် ကျင်းပသည့် JICM အစည်းအဝေးတွင် နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ ဒုတိယ တပ်မတော် ကာကွယ်ရေး ဦးစီးချုပ် ဒုတိယ ဗိုလ်ချုပ်ကြီး စိုးဝင်း နှင့် အပစ်ရပ် တိုင်းရင်းသား လက်နက်ကိုင် (၁၀)ဖွဲ့တက်ရောက်ခဲ့သည်။

NCA လက်မှတ်ရေးထိုးထားသည့် အဖွဲ့ ၁၀ဖွဲ့သည် JICM အကြိုညှိနှိုင်းမှု ကို ယမန်နေ့တွင် နေပြည်တော်၌ တွေ့ဆုံဆွေးနွေးခဲ့သည်။