တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် အကောင်အထည်ဖော်မှုဆိုင်ရာ ညှိနှိုင်းအစည်းအဝေး (JICM) အကြိုညှိနှိုင်းအစည်းအဝေးတွင် အတည်ပြုချက် (၃) ချက် ရရှိခဲ့ကြောင်း စုံစမ်းသိရှိရသည်။
နေပြည်တော်ရှိ အမျိုးသား ပြန်လည် သင့်မြတ်ရေး နှင့် ငြိမ်းချမ်းရေးဗဟိုဌာန (NRPC) တွင် သြဂုတ် (၁၀ရက် မှ ၁၁ရက်) ထိ ၂ ရက်သာ ကျင်းပဆွေးနွေးခဲ့ကြောင်း သိရသည်။
အဆိုပါ သဘောတူညီမှု ရရှိထားသည့် အချက် (၃)ချက်မှာ ( NCA အကောင်အထည်ဖော်ရေးမူဘောင် ၁၅ ချက် ရရှိထားခြင်း၊ ၂၀၂၀ အလိုမှာ ဆက်လက်ဆွေးနွေးသွားမည့် ခေါင်းစဉ်များနှင့် အဆင့်များ ခေါင်းစဉ်ကြီး ၈ ခုပေါ်တွင် သဘောတူညီမှု ရရှိထားခြင်း နှင့် ပြည်ထောင်စု အခြေခံမှုများ ဖက်ဒရယ် အခြေခံမှုများ နှင့် ပတ်သက်ပြီး ၃ ချက် သဘောတူညီမှု ရရှိထားကြောင်း သိရသည်။
“သူတို့ သဘောတူညီမှု ရထားတဲ့ ဥစ္စာကို မနက် JICM မှာ တင်ပြကြတယ်။ တင်ပြီးတော့မှ အတည်ပြုမယ်လို့တော့ မျှော်လင့်တာပေါ့။” – ဗိုလ်ချုပ်ကြီးယွက်စစ်နှင့်အတူ နေပြည်တော်သို့လိုက်ပါသွားသည့် သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA) ၏ အကြံပေး ပုဂ္ဂိုလ် ဦးခွန်စိုင်း က သျှမ်းသံတော်ဆင့်ကို ပြောသည်။
ထို့ပြင် သြဂုတ် ၁၄ မှ ၁၈ ထိ UPDJC အဖွဲ့မှ ပြည်ထောင်စု ငြိမ်းချမ်းရေး ညီလာခံကို တင်ပြမည့် ပုံစံကို ပြန်ပြီး ရေးဆွဲကြမည်ဖြစ်ပြီး ၅ ရက် အတွင်း စီမံရေးဆွဲပြီးလျှင် ပြည်ထောင်စု ညီလာခံတွင် တင်ပြသွားမည်ဖြစ်ကြောင်း သိရသည်။
“ဒီ ၅ ရက်အတွင်းမှာ စီမံရေးဆွဲလို့ ပြီးပြီဆိုလို့ရှိရင် ပြည်ထောင်စု ညီလာခံ ၁၉ ရက်နေ့မှာ တင်ပြမယ်။ တင်ပြပြီးတော့မှ ၂၁ ရက်နေ့မှာ အတည်ပြုကြမယ်” ဟု ဦးခွန်စိုင်း က ထပ်လောင်း ပြောသည်။
ယခု JICM အကြိုညှိနှိုင်းအစည်းအဝေးတွင် နှစ်ဖက်ညှိနှိုင်းရေးအဖွဲ့ မှ ညှိနှိုင်းမှုမပြီးပြတ်သေးသည့် အကြောင်းအရာများကို ဆက်လက်ညှိနှိုင်းသွားမှာဖြစ်ပြီး ပြည်ထောင်စု သဘောတူစာချုပ် အစိတ်အပိုင်း (၃) ကိစ္စ၊ ပြည်ထောင်စု ငြိမ်းချမ်းရေး ညီလာခံ (၂၁) ရာစုပင်လုံ စတုတ္တအစည်းအဝေး ဆိုင်ရာ ကိစ္စရပ်များနှင့် (၉ ) ကြိမ်မြောက် JICM အစည်းအဝေးအတွက် ပြင်ဆင်မှုများကို ဆွေးနွေးညှိနှိုင်းမှာ ဖြစ်ကြောင်း ဗိုလ်မှူးကြီး စိုင်းငင်း က အဖွင့်မိန့်ခွန်းမှာ ပြောကြားသည်။
