အပစ်ခတ်ရပ်စဲရေး သဘောတူစာချုပ် (NCA) စာချုပ်ထဲတွင် လိုချင်တာကို ယူပြီး၊ မကြိုက်တာ ကို ရှောင်လွှဲ မည်ဆိုပါက ငြိမ်းချမ်းရေး လုပ်ငန်းစဉ်ကို အကျပ်အတည်း ဖြစ်ပေါ်စေနိုင်ကြောင်း ဒေါ်အောင်ဆန်းစုကြည် က ပြောဆိုလိုက်သည်။
အဆိုပါပြောဆိုမှုသည် ယနေ့ (ဇန်နဝါရီ ၈) ရက် မနက်ပိုင်းတွင် နေပြည်တော်တွင် ကျင်းပသည့် တနိုင်ငံလုံး အပစ်ခတ်တိုက်ခိုက်ရေး ရပ်စဲရေး သဘောတူစာချုပ် အကောင်အထည်ဖော်မှုဆိုင်ရာ ညှိနှိုင်းအစည်းအဝေး (JICM) အစည်းအဝေးတွင် ပြောဆိုလိုက်ခြင်းဖြစ်သည်။
“ အစုအဖွဲ့ တဖွဲ့ဖွဲ့ က လိုချင်တာကိုပဲ ကွက်ပြီးယူမယ်။ မကြိုက်တာ ဆိုရင် ရှောင်လွှဲနေမယ်ဆိုရင် ကျန်တဲ့ အစုအဖွဲ့ တွေ အားလုံးမှာလည်း အခက်အခဲတွေ ဖြစ်လာစေပြီး ငြိမ်းချမ်းရေး လုပ်ငန်းစဉ် အတွက် အကျပ်အတည်းတွေ ဆက်တိုက်ဖြစ်ပေါ်နိုင်ပါတယ်” ဟု နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် က ပြောသည်။
NCA စာချုပ်ထဲ မှ ကိုယ်ကြိုက်တာကို ပဲ ယူပြီး ၊ မကြိုက်တာမယူကာ ကိုယ်သဘောကျတဲ့အပိုင်း ကိုပဲ အကောင်အထည်ဖော်ပြီး သဘာမကျပါက အကောင်အထည် မဖော်သည့် ကိစ္စ ရှောင်ကြဉ်ကြရန်လည်း ဒေါ်အောင်ဆန်းစုကြည် က သတိပေးလိုက်သည်။
ထို့ပြင် NCA လက်မှတ်ရေးမထိုးထားသည့် တိုင်းရင်းသားလက်နက်ကိုင်များကိုလည်း အစိုးရ အနေဖြင့် အမြဲတမ်းတံခါးဖွင့်ထားကြောင်း၊ လက်နက်ကိုင်ပြီး အားသာချက်ယူတာ၊ ဖြေရှင်းချက် အသစ်များကို စိတ်ကူးယဉ်ခြင်းသည် နိုင်ငံပြဿနာ များကို မဖြေရှင်းနိုင်ကြောင်းလည်း ဒေါ်အောင်ဆန်းစုကြည် က ပြောသည်။
“နိုင်ငံရေး စားပွဲဝိုင်းတွေမှာ ဝင်ထိုင်ပြီး ကိုယ့်ရဲ့ လိုအင် ဆန္ဒ ကိုယ့်ရဲ့ လိုလားချက် တွေကို ပွင့်ပွင့်လင်းလင်း ပြောပြပြီး၊ ကျမတို့ရဲ့ ဆွေးနွေးဖို့ လိုပါတယ်။ ဒီလို ဆွေးနွေးနိုင်ဖို့ အတွက် လည်း ကျမတို့ ငြိမ်းချမ်းရေး တံခါးဖွင့် ထားပေးတာဖြစ်ပါတယ်” ဟု လည်း နိုင်ငံတော် အတိုင်ပင်ခံ ပုဂ္ဂိုလ် က ထပ်လောင်း ပြောကြားလိုက်သည်။
ဆက်လက်ပြီး ၂၀၂၀ ခုနစ် လ လယ်တွင် ပြည်ထောင်စု ငြိမ်းချမ်းရေး ညီလာခံ ၂၁ရာစု ပင်လုံ ညီလာခံ စတုတ္ထ အစည်းအဝေး ကျင်းပနိုင်ရေး ကို ဦးတည်ပြီး လုပ်ငန်းအစီအစဉ် အဆင့်ဆင့် ချမှတ်ဆောင်ရွက် သွားရန် လိုအပ်ကြောင်း လည်း PPST ယာယီ အဖွဲ့ခေါင်းဆောင် ဗိုလ်ချုပ် ကြီး ယွက်စစ် က ယနေ့ အဖွင့်မိန့်ခွန်းတွင် ပြောသည်။
ငြိမ်းချမ်းရေး လုပ်ငန်းစဉ် ချမှတ်ရာတွင် လက်ရှိ ဖြစ်ပွားနေသည့် အဖက်ဖက် က အခြေအနေ များကို ထည့်သွင်း စဉ်းစားရမည် ဟု လည်း ဗိုလ်ချုပ်ကြီး ယွက်စစ် က ပြောသည်။
ယနေ့ နေပြည်တော်တွင် ကျင်းပသည့် JICM အစည်းအဝေးတွင် နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ ဒုတိယ တပ်မတော် ကာကွယ်ရေး ဦးစီးချုပ် ဒုတိယ ဗိုလ်ချုပ်ကြီး စိုးဝင်း နှင့် အပစ်ရပ် တိုင်းရင်းသား လက်နက်ကိုင် (၁၀)ဖွဲ့တက်ရောက်ခဲ့သည်။
NCA လက်မှတ်ရေးထိုးထားသည့် အဖွဲ့ ၁၀ဖွဲ့သည် JICM အကြိုညှိနှိုင်းမှု ကို ယမန်နေ့တွင် နေပြည်တော်၌ တွေ့ဆုံဆွေးနွေးခဲ့သည်။
