သျှမ်းပြည် မြောက်ပိုင်း ကျောက်မဲမြို့နယ် မိုင်းငေါ့မြို့ အနီး တွင် အမျိုးသား ၂ဦး မိုင်းနင်းမိကာ၊ တဦး ဒဏ်ရာ ပြင်းထန်ကြောင်း သတင်းရရှိသည်။
ဖြစ်စဉ်မှာ ဇန်နဝါရီ ၆ ရက် ညနေ ၅နာရီ ဝန်းကျင်တွင် မိုင်းငေါ့မြို့ တွင် စက်ပစ္စည်း ဝယ်ပြီး အပြန်လမ်း ၌ မိုင်းနင်းမိခဲ့ပြီး၊ မိုင်းနင်းမိသူ၂ဦးကို ဇန်နဝါရီ ၇ရက်နေ့တွင်သွားရောက်ခေါ်ခဲ့ကြောင်း အိုမ်းတမောဝ် လူမှုကူညီရေးအသင်းမှ အဘမ်း က သျှမ်းသံတော်ဆင့် သို့ပြောသည်။
မိုင်းနင်းမိသူ ၂ဦး အနက် အသက် ၃၂ အရွယ် အမျိုးသား တဦး ဒဏ်ရာ ပြင်းထန်ကာ လားရှိုးဆေးရုံသို့ ပို့ဆောင်ခဲ့ပြီး၊ အသက် ၃၁ နှစ် အရွယ် အမျိုးသား သည် ဒဏ်ရာ မပြင်းထန်သဖြင့် ကျောက်မဲ ဆေးရုံတွင် ဆေးကုသခံယူနေကြောင်း အဘမ်း က ပြောသည်။
“ ဒဏ်ရာပြင်းတဲ့တယောက်ကိုတော့ ကျနော်တို့ ကျောက်မဲဆေးရုံရောက်တော့ ဓာတ်မှန်ရိုက်ပြီး လားရှိုး ဆေးရုံ ချက်ချင်းပို့လိုက်တယ်။ တယောက်တော့ ကျောက်မဲဆေးရုံမှာပဲ ဆေးကုနေပါတယ်” ဟု အဘမ်း က ပြောသည်။
၂၀၁၉ ခုနစ် အတွင်း သျှမ်းပြည် မြောက်ပိုင်း တွင် မြေမြုပ်မိုင်း ပေါက်ကွဲမှုကြောင့် သေဆုံးသူ ၁၆ဦး နှင့် ဒဏ်ရာရရှိသူ ၃၄ ဦး ရှိကြောင်း သတင်းရရှိသည်။
သျှမ်းပြည် မြောက်ပိုင်း မြေမြုပ်မိုင်း အများဆုံး နင်းမိသည့် နေရာသည် ကျောက်မဲမြို့နယ်၊ သီပေါမြို့နယ်။ နမ့်ဆန်မြို့နယ်၊ နမ္မတူမြို့နယ်၊ မန်တုံမြို့နယ် တို့ ဖြစ်ကြောင်း သိရသည်။
လက်ရှိ မြေမြုပ်မိုင်း ပေါက်ကွဲမှု အများဆုံးနေရာသည် မြန်မာ့တပ်မတော်၊ တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) နှင့် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည် တပ်မတော် (RCSS/SSA) တို့ လှုပ်ရှားသည့်နေရာ ဖြစ်သည်။
