မနက်ဖန်တွင် ကျင်းပမည့် တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ် အကောင်အထည်ဖော်မှုဆိုင်ရာ ညှိနှိုင်းရေး အစည်းအဝေး (JICM) ကို ထောင့်စေ့အောင် ပြင်ဆင်ရန် လိုအပ်ကြောင်း ဗိုလ်ချုပ်ကြီး ယွက်စစ် က ပြောဆိုလိုသည်။
အဆိုပါ ပြောဆိုမှုသည် ယနေ့ နေပြည်တော်ရှိ Horizon Lake View Hotel တွင် ပြုလုပ်သည့် တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) ထိုးထားသည့် တိုင်းရင်းသားလက်နက်ကိုင်အဖွဲ့အစည်း ၏ ငြိမ်းချမ်းရေး လုပ်ငန်းစဉ် ဦးဆောင်အဖွဲ့ ( PPST) အစည်းအဝေးတွင် ဗိုလ်ချုပ်ကြီး ယွက်စစ် က ပြောဆိုလိုက်ခြင်းဖြစ်သည်။
“ မနက်ဖန်မှ ကျင်းပပြုလုပ်မယ့် JICM အစည်းအဝေးအတွက် မိမိတို့ ဖက်ကနေ ထောင့်စေ့အောင် ပြင်ဆင်ထားဖို့ လိုအပ်ပါတယ်။ လက်ရှိ နိုင်ငံရေး၊ ငြိမ်းချမ်းရေး၊ စစ်ရေး၊ အခြေအနေ အရ JICM အစည်းအဝေးရဲ့ ရလဒ် ကိုတိုင်းရင်းသား ပြည်သူက စိတ်ဝင်တစား စောင်မျှော် နားစွင့်နေပါတယ်” ဟု ဗိုလ်ချုပ်ကြီး ယွက်စစ် က ဆိုသည်။
ထို့ကြောင့် ငြိမ်းချမ်းရေး လုပ်ငန်းစဉ် ရှေ့ဆက်နိုင်ရေး အတွက် ကောင်းမွန်သည့် ရလဒ် ရှိအောင် ကြိုးပမ်းဆွေးနွေးကြရန်လည်း PPST ယာယီ အဖွဲ့ခေါင်းဆောင် က တိုက်တွန်းလိုက်သည်။
JICM အစည်းအဝေးသည် ငြိမ်းချမ်းရေး လုပ်ငန်းစဉ် အဆင့်ဆင့် တရားဝင်ပြန်လည် စတင် နိုင်ရန် အရေး ပါသည့် အစည်းအဝေး ဖြစ်သည့် အတွက် နှစ်ဖက် လက်ခံ နိုင်သည့် ဆုံးဖြတ်ချက် များ၊ လုပ်ငန်းစဉ်များ ချမှတ်နိုင်ရန် အတွက် မိမိတို့ ဘက်မှ တာဝန်ရှိကြောင်းလည်း ထည့်သွင်းပြောဆိုခဲ့သည်။
Leave a Comments