သျှမ်းပြည် မြောက်ပိုင်း နမ္မတူ- လားရှိုး ကားလမ်း အနီး ၌ ယမန်နေ့ (ဒီဇင်ဘာ ၂၉ ) တွင် မွန်လွဲပိုင်း တိုက်ပွဲဖြစ်ပွားကာ ယာဉ်မောင်းတဦး ကျည်ထိမှန်သေဆုံးခဲ့ကြောင်း သတင်းရရှိသည်။
ဖြစ်စဉ်မှာ တအာင်း(ပလောင်) အမျိုးသားလွတ်မြောက်ရေး တပ်မတော် (TNLA )နှင့် မြန်မာ့တပ်မတော်တို့ သည့် နမ္မတူ-လားရှိုး ကားလမ်းပိုင်း လွယ်တောက်ကျေးရွာ အနီးတွင် ယမန်နေ့ မွန်းလွဲ ၂နာရီခွဲ ကျော် ၌ တိုက်ပွဲဖြစ်ပွားကာ ယာဉ်မောင်းတဦး ကျည်ထိမှန် သေဆုံးသွားကြောင်း နမ္မတူမြို့နယ် တအာင်း အမျိုးသား ပါတီ (TNP) မှ တားအိုက်ထိုက် က သျှမ်းသံတော်ဆင့် သို့ပြောသည်။
“ မနေ့က နေ့လည်ပိုင်းမှာ တိုက်ပွဲဖြစ်တယ်။ အဲ့မှာ နမ္မတူ ကနေ လားရှိုးကို သတ္တု ကားမောင်းတဲ့ ယာဉ်မောင်း ကျည်ထိပြီးသေသွားတယ်” ဟု တားအိုက်ထိုက် က ဆိုသည်။
ကျည်ထိမှန်ပြီး သေဆုံးသွားသည့် ကားသမားသည် နမ္မတူမြို့ တွင် နေထိုင်သည့် အသက် ၂၃ နှစ်သာရှိသေးကြောင်း၊ သတ္တုတွင်း တွင် ကားမောင်းသည့် သူလည်း ဖြစ်ကြောင်း တားအိုက်ထိုက် က ပြောသည်။
မြန်မာ့တပ်မတော်နှင့် TNLA တို့သည် ဒီဇင်ဘာ ၂၉ ရက် ၌ နမ့်ဆန်မြို့နယ် နှင့် လားရှိုးမြို့နယ် အတွင်း တိုက်ပွဲ ၄နေရာ ဖြစ်ပွားခဲ့ကြောင်း သိရသည်။
လားရှိုးမြို့ နယ် လားရှိုး-နမ္မတူ ကားလမ်းမကြီး လွယ်တောက်ကျေးရွာ အနီးတွင် TNLA နှင့် မြန်မာ့ တပ်မတော်တို့ ယမန်နေ့ မွန်းလွဲ ၂နာရီခွဲ မှ ၃နာရီ ထိ တိုက်ပွဲဖြစ်ပွားခဲ့ကြောင်း TNLA ၏ ထုတ်ပြန်ချက် တွင်ရေးသားထားသည်။
“ မနေ့ က တိုက်ပွဲဖြစ်ပွား ကားသမား တယောက် ရဲ့ ရင်းဘတ် ကျည်ထိမှန်ပြီး ပွဲချင်းပြီး သေဆုံးတာ ဟုတ်ပါတယ်။ နမ္မတူ က နာရေး ကားလာသယ်သွားတယ်” ဟု လည်း လားရှိုးမြို့နယ် ဒေသခံ တဦးက သျှမ်းသံတော်ဆင့် သို့ပြောသည်။
ထို့ပြင် ဒီဇင်ဘာ ၂၈ ရက် မွန်းလွဲ ၃နာရီ ဝန်းကျင်တွင်လည်း TNLA နှင့် မြန်မာ့တပ်မတော်တို့ နမ္မတူမြို့နယ် နာဆိုင်းကျေးရွာ အနီး နှင့် ပန်လောကျေးရွာ အနီး တိုက်ပွဲဖြစ်ပွားခဲ့ကြောင်း သိရသည်။
ယခုလ အတွင်း TNLA နှင့် မြန်မာ့တပ်မတော် တို့ လားရှိုးမြို့နယ် နှင့် နမ္မတူမြို့နယ် အတွင်း တိုက်ပွဲ မကြာခဏ ဖြစ်ပွားမှုကြောင့် ထိုဒေသတွင် နေထိုင်သည့် ပြည်သူများ နေရပ်စွန့်ခွာ ခဲ့ရသည်။
Leave a Comments