သျှမ်းပြည် မြောက်ပိုင်း လားရှိုးမြို့ မန်ဆူ ဘုန်းကြီးကျောင်းတွင် ယမန်နေ့ (ဒီဇင်ဘာ ၁၉ ) ည ၄နာရီတွင် စစ်ရှောင် ၅၀၀ကျော် ရောက်ရှိလာကြောင်း သတင်းရရှိသည်။

လက်ရှိ လားရှိုး မန်ဆူ ဘုန်းကြီးကျောင်းသို့ ရောက်ရှိနေသူများသည် လွယ်တောက်ကျေးရွာ၊ ပန်ဟုန်းကျေးရွာ မှ ပြည်သူများဖြစ်ကြပြီး ထိုသူများသည် ဒီဇင်ဘာ ၁၆ ရက်နေ့ တွင် လားရှိုးမြို့နယ် အီနိုင်းကျေးရွာ သို့ တကြိမ် စစ်ဘေးရှောင် ခဲ့ဖူးသူများဖြစ်ကြသည်။

“ မနေ့ကညနေ ၄နာရီ မှ စစ်ရှောင် ၅၀၀ကျော် ရောက်လာတယ်။ သူတို့က အီနိုင်းကျေးရွာ မှာ တခါရှောင်ဖူးတယ်။ တိုက်ပွဲတွေ ငြိမ်ပြီဆိုပြီး ရွာပြန်သွားတယ်။ အခု နောက်ထပ် ပြန်ရှောင်ရပြန်တယ်” ဟု လားရှိုး မန်ဆူဘုန်းကြီးကျောင်းမှာ ဆရာတော် ဦးပုညနန္ဒ က မိန့်ကြားသည်။

စစ်ရှောင် ၅၀၀ ကျော် အတွက် အစားအသောက်ကို အလှူရှင်များ လာရောက် လှူဒါန်းပြီး၊ စစ်ရှောင် အတွက် ကျန်းမာရေး ကိုလည်း ကြည့်ရှု့ပေးကြောင်း ဆရာတော် ဦးပုညနန္ဒ က မိန့်သည်။

“ စစ်ရှောင်ထဲမှာ ကလေးတွေ က ပိုများတယ်။ အေးတဲ့အချိန်ဆိုတော့နှာစေး၊ ချောင်းဆိုး အဖြစ်များတယ်” ဟု ဆရာတော် က ထပ်မံ မိန့်သည်။

တိုက်ပွဲများငြိမ်သွားပြီး စိတ်ချသည့် အချိန်မှ နေရပ်ပြန်ရန်၊ ထိုသို့မဟုတ်ပါက မကြာခဏ စစ်ရှောင်နေရမည် ဟုလည်း ဆရာတော် က ဆိုသည်။

ထို့ပြင် နမ့်ဆန်မြို့နယ် လွယ်ပျက် ကျေးရွာ အနီးတွင် TNLA နှင့် မြန်မာ့ တပ်မတော် တို့ယနေ့ ထိ နေ့တိုင်းတိုက်ပွဲဖြစ်ပွားနေသေးကြောင်း လွယ်ပျက်ဒေသခံများ ပြောပြချက် အရသိရသည်။

“ ဒီနေ့မနက် အစောပိုင်းမှာ သေနတ်သံ ကြားနေရတယ်။ မြန်မာတပ်တွေက ကျနော်တို့ ရွာထဲမှာနေတယ်။ ဘုန်းကြီးကျောင်းနဲ့ နေအိမ်မှာ လာအိပ်တယ်။ကျနော်တို့အခု ရွာထဲမှာပဲ တခြားနေရာ မှာ စုနေရတယ်” ဟု လွယ်ပျက်ဒေသခံ ဦးလှအောင် က သျှမ်းသံတော်ဆင့် သို့ ပြောသည်။

ဆက်လက်ပြီး အစိုးရတပ်မတော်သည် ကျေးရွာအတွင်း ဝင်အိပ်သည့် အပြင် ပြည်သူများ၏ နေအိမ်ကို မွှေနှောက်ကာ အဝတ်များ၊ဆန်၊ဆီ များနှင့် ပိုက်ဆံများကို ယူဆောင် သွားသည် ဟုလည်း ဦးလှအောင် က ပြောသည်။

“ ပြည်သူတွေ ရဲ့ အိမ်မှာလည်း အိပ်တယ်။ နောက် အိမ်က ပစ္စည်းလည်း ယူတယ်။ အဝတ်အစားတောင် မိန်းမ အဝတ်တွေပါ မကျန် ယူတာ ကျနော် အံ့သြတယ် ” ဟု ဦးလှအောင်က ထပ်လောင်းပြောသည်။

ဒီဇင်ဘာ ၁၅ ရက်တွင် နမ့်ဆန်မြို့နယ် လွယ်ပျက်ကျေးရွာတွင် လက်နက်ကြီး ၃လုံးကျကာ တလုံးသည် နေအိမ်တလုံးပေါ်ကျကာ မီးလောင်ခဲ့ကြောင်း၊ ကျန် ၂လုံးမှာ လွယ်ပျက် ဘုန်းကြီးကျောင်း ဝန်းထဲသို့ ကျကာ ဘုန်းကြီးကျောင်း ပျက်စီးမှု ရှိခဲ့ကြောင်း လွယ်ပျက် ဒေသခံများက ပြောသည်။

ယမန်နေ့ (ဒီဇင်ဘာ ၁၉ ) နေ့လည် ၁နာရီ ဝန်းကျင်တွင် လားရှိုးမြို့နယ် လားရှိုး- နမ္မတူ ကားလမ်းပေါ် တွင် တအာင်း(ပလောင်) အမျိုးသားလွတ်မြောက်ရေး တပ်မတာ် (TNLA ) နှင့် မြန်မာ့တပ်မတော်တို့ တိုက်ပွဲဖြစ်ပွားခဲ့ကြောင်း TNLA ထုတ်ပြန်ချက် အရသိရသည်။

ထို့ပြင် ဒီဇင်ဘာ ၁၈ ရက်တွင် လည်းလားရှိုးမြို့နယ် နမ့်ဆန်မြို့နယ် နှင့်မန်တုံမြို့နယ် တွင် TNLA နှင့် မြန်မာ့တပ်မတော် တို့တိုက်ပွဲဖြစ်ပွားခဲ့သည်။