သျှမ်းပြည်မြောက်ပိုင်း လားရှိုးမြို့နယ် အီနိုင်းကျေးရွာ တွင် စစ်ရှောင် ၅၄၀ ကျော် အတွက် အစားအသောက်များ လိုအပ်နေကြောင်း သတင်းရရှိသည်။

ဒီဇင်ဘာ ၁၆ ရက် မနက် ၉ နာရီ က လက်နက်သံများကြားရသဖြင့် ပန်ဟုန်း၊ မန်ပြိန်း၊ လွယ်တောက်ကျေးရွာနှင့်     နမ္မတူမြို့နယ် နမ့်ကက် ကျေးရွာတို့မှ ဒေသခံ ၅၄၆ ဦး သည် အီနိုင်းကျေးရွာ ဘုန်းကြီးကျောင်းတွင် လာရောက်ခိုလှုံနေကြကြောင်း အီနိုင်းကျေးရွာ ဥက္ကဌ စိုင်းအောင်မြင့် က သျှမ်းသံတော်ဆင့် သို့ ပြောသည်။

“ တိုက်ပွဲဖြစ်မှာ စိုးရိမ်လို့ ထွက်ပြေးလာတာပါ။ စစ်ရှောင်တွေ အတွက်က စားသောက်ဖွယ်ရာလိုတယ်။ ရေလည်းလိုတယ်။တချို့ ကလေးတွေ အနွေးထည် မပါလာဘူး” ဟု စိုင်းအောင်မြင့် ကဆိုသည်။

အဆိုပါ စစ်ရှောင်များကို လူမှုကယ်ဆယ်ရေး အဖွဲ့များ က ယမန်နေ့လည်ပိုင်းတွင် သွားရောက်ခေါ်ဆိုခဲ့ကာ အီနိုင်းကျေးရွာ သို နေ့လည် ၃နာရီ ဝန်းကျင် ရောက်ရှိလာကြောင်းလည်း စိုင်းအောင်မြင့် က ပြောသည်။

“ မနေ့က နမ္မတူကနေ လှမ်းပစ်တဲ့လက်နက်သံကြားရလို့ပြောတာပဲ ၂ဖက် ပစ်ခတ်မှု မရှိဘူး။ အခု အဲ့ဘက် အခြေအနေ စောင့်ကြည့်နေဆဲပါ။ ပြန်လို့ရ၊ မရ ကြည့်နေတုန်းပါ” ဟု စိုင်းအောင်မြင့် က ထပ်လောင်းပြောသည်။

ယမန်နေ့က ပန်ဟုန်းနှင့် လွယ်တောက်ကျေးရွာ အနီးတိုက်ပွဲဖြစ်ပွားမည်ကို ကျေးရွာဒေသခံများက စိုးရိမ်သဖြင့် ကာလာရောက်ဆောင်ပေးရန် ဖုန်းဆက်အကြောင်းကြားခဲ့ကြောင်း ၊ ထို့ကြောင့် သွားရောက် ကယ်ထုတ်ခဲ့ခြင်းဖြစ်ကြောင်း ပေးသောလက် လူမှုကူညီရေး အသင်း မှ တာဝန်ရှိသူ တဦးက ပြောသည်။

“ကျနော်တို့ ကို ဖုန်းဆက်ခေါ်လို့သွားခေါ်တာ။ တိုက်ပွဲဖြစ်မှာစိုးလို့ လာခေါ်ပေးဆိုလို့သွားခေါ်တာပါ။ ကျေးရွာ ၄ရွာ က ပြည်သူတွေ ကို ကျနော်တို့ပရဟိတ ကားတွေ က သွားကယ်ထုတ်ပြီး အီနိုင်း ဘုန်းကြီးကျောင်းမှာ လာထားပါတယ်” ဟု ပေးသောလက် လူမှုကူညီရေး အသင်းမှ တာဝန်ရှိသူ က ဆိုသည်။

အီနိုင်းကျေးရွာအုပ်စုအနီး လားရှိုးနှင့် နမ္မတူ နယ်စပ်ရှိ ကျေးရွာများတွင်လည်း ယခင်အပတ်ကတည်းက ခရီးသွား ရွာသားများအား တားဆီးစစ်ဆေးမေးမြန်းကာ မှတ်ပုံတင် များ လက်ကိုင်ဖုန်းများပါမကျန် တင်းကျပ်စစ်ဆေးကြောင်း စစ်ရှောင်ရွာသားများပြောပြချက်အရသိရသည်။

အဆိုပါ ကျေးရွာ ဒေသခံများသည် ယမန်နှစ်တွင်လည်း လက်နက်ကိုင် တပ်ဖွဲ့များ စစ်ရေး တင်းမာ မှုကြောင့် ထွက်ပြေးတိမ်ရှောင်ခဲ့ရသည့် သူများဖြစ်ကြသည်။