“ လူသား အားလုံး အခွင့်အရေး လူငယ်များ က ရပ်တည်ပေး” ဆိုသည့် ခေါင်းစဉ်ဖြင့် ယမန်နေ့ (ဒီဇင်ဘာ ၁၀) ရက်တွင် တောင်ကြီးမြို့တွင် ကျင်းပပြုလုပ်သည်။

ဒီဇင်ဘာ ၁၀ ရက်သည့် နိုင်ငံတကာ လူ့အခွင့်အေရေး နေ့ဖြစ်ပြီး၊ ထိုနေ့ရောက်တိုင်း နိုင်ငံတကာ သာမက မြန်မာပြည် တဝှမ်းတွင်လည်း လူ့အခွင့်အရေး နေ့ အထိမ်းအမှတ် အနေဖြင့် ကျင်းပကြသည်။

ယခုနှစ် ထူးခြားသည်မှာ “ လူသားအားလုံး အခွင့်အရေး လူငယ်များ က ရပ်တည်ပေး” ဆိုသည့် ခေါင်းစဉ် အတိုင်း လူငယ်များက ဦးဆောင်သည့် ပွဲဖြစ်ပြီး၊ လူငယ်များစွာ လာရောက် ပူးပေါင်းသည် ဟု လူ့အခွင့်အရေး ပညာပေး ပြုလုပ်သည့် ဒေါ်နှင်းနန္ဒာအောင် က သျှမ်းသံတော်ဆင့် သို့ ပြောသည်။

“ ဒီနှစ်က လူငယ်တွေပူးပေါင်းပါဝင်မှုအားက များတယ်။လူငယ်တွေက ဦးဆောင်တဲ့ပွဲဖြစ်ပါတယ်။ လူငယ်တွေ ပူးပေါင်းပါဝင်မှုကိုပြတာပါ။ တက်ရောက်တဲ့ အဖွဲ့အစည်းကတော့ စုံတယ်” ဟု ဒေါ်နှင်းနန္ဒာအောင် က ဆိုသည်။

ထိုအခမ်းအနားကို တက်ရောက်လာသည့် အဖွဲ့များမှာ LGBTအဖွဲ့ဝင်များ၊ မသန်စွမ်း အဖွဲ့ဝင်များ နှင့် အမျိုးသမီး အဖွဲ့များဖြစ်ကြောင်း သိရသည်။

“ ကျမတို့ အားလုံးက လူသားတွေပါပဲ။ ကြားမှာခံထားတဲ့ လူမျိုးရေး၊ လိင်ပိုင်းဆိုင်ရာတွေ ခန္ဓာကိုယ်ဖြစ်တည်မှုတွေ အပေါ်မကြည့်ဘဲ လူသားလို့ ကြည့်ရင် အဆင်ပြေပါတယ်။ လူသားအားလုံး က တန်းတူ အခွင့်အရေး ရှိပါတယ်” ဟု ဒေါ်နှင်းနန္ဒာအောင် က ထပ်လောင်းပြောသည်။

သျှမ်းပြည် တောင်ပိုင်း တောင်ကြီးမြို့တွင် ၂၀၁၆ ခုနစ်မှ စတင်ကာ နိုင်ငံတကာ လူ့အခွင့်အရေးနေ့ကို ကျင်းပလာသည်မှာ ယနေ့တိုင်ဖြစ်ကြောင်း သိရသည်။

ဆက်လက်ပြီး နိုင်ငံတကာ လူ့အခွင့်အရေး နေ့ပွဲကို တက်ရောက်လာသည့် တောင်ကြီး LGBT ဥက္ကဌ ကိုမိုး က “ ကျနော်တို့ဒီလို လာပူးပေါင်းရတဲ့အတွက် ဝမ်းသာပါတယ်။ ကျနော်တို့ LGBT တွေမှာ လူ့အခွင့်အရေး ဆုံးရှုံးနေပါတယ်။ လူသားတိုင်းရတဲ့ အခွင့်အရေး LGBT တွေကိုလည်း ရစေချင်ပါတယ်” ဟု သျှမ်းသံတော်ဆင့် ကို ပြောသည်။

တောင်ကြီးမြို့ တွင် ကျင်းပသည့် နိုင်ငံတကာ လူ့အခွင့်အရေး နေ့တွင် လာရောက် ပူးပေါင်းသည့် အဖွဲ့ဝင်များ မှ အကများ၊ သီချင်းများ ဖြေဖျော်ပြီး၊ လူ့အခွင့်အရေး နှင့် ပတ်သက်ပြီး မေးခွန်းများ ပညာပေးများ ပြုလုပ်ကြောင်းသိရသည်။

လွန်ခဲ့သည့် ၂၀၁၈ ခုနစ်တွင် သျှမ်းပြည် တောင်ကြီးမြို့ ဗိုလ်ချုပ်ပန်းခြံတွင် နိုင်ငံတကာ လူ့အခွင့်အရေး “ Mobile” စနစ်ဖြင့် ကျင်းပသွားမည်ကို သက်ဆိုင်ရာက ခွင့်ပြုမိန့် ပိတ်ခဲ့ကြောင်း သိရသည်။

မြန်မာနိုင်ငံသည် နိုင်ငံတကာ လူ့အခွင့်အရေး ကြေညာစာတမ်း တွင် လက်မှတ်ရေးထိုးထားသည့် နိုင်ငံ တနိုင်ငံဖြစ်ပြီး၊ လက်ရှိ အချိန်ထိ တိုင်းရင်းသားနယ်မြေများ နှင့် မြန်မာနိုင်ငံ နေရာ အနှံ့ လူ့အခွင့်အရေးချိုးဖောက်မှု ခံနေရသေးကြောင်း သိရသည်။