လူမျိုးသုဉ်းသတ်ဖြတ်မှု ဖြင့် တရားစွဲဆိုခံရသော မြန်မာနိုင်ငံကိုယ်စား နယ်သာလန်နိုင်ငံ တဟိတ်မြို့ရှိ နိုင်ငံတကာတရားရေးခုံရုံးသို့ တက် ရောက်နေသော ဒေါ်အောင်ဆန်းစုကြည်အား ထောက်ခံအားပေးသည့် တာချီလိတ်လူထု ထောက်ခံပွဲတွင် ပါတီဆန္ဒသဘောထားမပါဘဲ ရှမ်းတိုင်းရင်းသားများဒီမိုကရေစီအဖွဲ့ချုပ် SNLD (ခေါ်) ကျားခေါင်းပါတီအမည်ပါ ဆိုင်းဘုတ်ကို အသုံးပြုမှုအတွက် သက်ဆိုင်သူများမှ ၀န်ချတောင်းပန်ရန် ရန်ကုန် SNLD ဗဟိုရုံးက တောင်းဆို လိုက်သည်။
“ဒါလိမ်လည်မှုတခုဖြစ်တယ်။ကျနော်တို့ပါတီရဲ့ပုံရိပ်ကိုထိခိုက်စေတယ်။ ကျနော်တို့ပါတီဝင် မဟုတ်တဲ့ လူကို ကျနော်တို့ပါတီအမည်ပါ ဆိုင်းဘုတ်ကိုင်ခိုင်းတာဟာ အလွဲသုံးစားလုပ်သွားတာဘဲဖြစ်တယ်။ ဒီကိစ္စအပေါ် ကျနော်တို့ပြင်းထန်စွာဘဲ ရှုပ်ချတယ်။ ပြင်းထန်စွာကန့်ကွက်တယ်။ဒီအပေါ်မှာ သက်ဆိုင်တဲ့လူ လုပ်ဆောင်သွားတဲ့လူပုဂ္ဂိုလ်အဖွဲ့အစည်းအနေနဲ့ ကျနော်တို့ပါတီကိုအတည့်အလင်း တောင်းပန်ဖို့လိုအပ်တယ်။ လိုအပ်တဲ့အနေအထားအထိ မတောင်းပန်ဘူးဆိုရင်တော့ နာမည်အလွဲသုံးစားမှုနဲ့ ဖော်ထုတ်ပြီးတော့မှအရေးယူဆောင်ရွက်သွားဖို့ကျနော်တို့စီစဉ်ရပါလိမ့်မယ်။ အဲတာကြောင့်မို့လို့ သက်ဆိုင်တဲ့ပုဂ္ဂိုလ်များအနေနဲ့ ကျနော်တို့ပါတီကိုအမြန်ဆုံးတောင်းပန်ဖို့ကျနော်တို့တောင်းဆိုလိုက်ပါတယ် ”- ဟု ရှမ်းတိုင်းရင်းသားများဒီမိုကရေစီအဖွဲ့ချုပ်ပြောရေးဆိုခွင့်ရှိသူ စိုင်းလိတ်က သျှမ်းသံတော်ဆင့်အား ပြောသည်။
တရားရင်ဆိုင်ရန်သွားသည့် ဒေါ်အောင်ဆန်းစုကြည်နှင့် တာဝန်ရှိသူများအား ထောက်ခံဝန်းရံသည့် လူထုချီတက်ခြင်းလှုပ်ရှားမှုကို ဒီဇင်ဘာလ ၁၀ ရက်နေ့ ယနေ့မနက်ပိုင်းက ရှမ်းရိုးမကွင်းအတွင်း ပြုလုပ်ကြသည် ။
မနက် ရ နာရီခွဲအချိန် တာချီလိတ်မြို့နယ်အတွင်းရှိ ဌာနဆိုင်ရာဝန်ထမ်းများ၊ ယဉ်ကျေးမှုအဖွဲ့အစည်းများ စုစုပေါင်းလူအင်အား ၄၀၀ ၀န်းကျင်က ထိုင်း-မြန်မာချစ်ကြည်ရေးတံတားအမှတ် ၁ တံတားထိပ်မှ စတင်ကာ ဗိုလ်ချုပ်အောင်ဆန်းလမ်းမကြီးအတိုင်း ရှမ်းရိုးမ ကွင်းအထိ လမ်းလျှောက်ခဲ့ကြသည်။
