သျှမ်းပြည် အရှေ့ပိုင်း တာချီလိတ်ခရိုင် နားဟိုင်းလုံကျေးရွာ တွင် ဒေသခံရွာသားတချို့ နေအိမ် များပြောင်းရွှေ့နေရကြောင်း သတင်းရရှိသည်။
တာလေမြို့နယ်ခွဲ နားဟိုင်းလုံ ကျေးရွာတွင် ရွှေဆက်လက်တူးဖော်နေမှုကြောင့် သဲနှုန်းများမြစ်ချောင်းအင်းအိုင်နှင့် လယ်မြေများအတွင်းသောင်ထွန်းကာ မိုးရွာသွန်းပါက ရုတ်ချည်းရေကြီး ရေလျှံမှု ဖြစ်ပေါ်သဖြင့် မြစ်ချောင်းဘေး နေထိုင်သည့် နေအိမ်တချို့ ရွာအပြင်ဘက်သို့ ပြောင်းရွှေ့နေထိုင်ရကြောင်း နားဟိုင်းလုံ ဒေသခံ စိုင်းလျိုးက သျှမ်းသံတော်ဆင့် သို့ ပြောသည်။
“ မိုးရွာတဲ့အချိန်ရေကြီးတော့ မြစ်ဘေးမှာနေထိုင်တဲ့သူတွေ က အဆင်မပြေဘူး။ အိမ်တွေ ရေလျှံတယ်။ ဒါကြောင့် သူတို့ရွာပြင် ပြောင်းနေရတာ” ဟု စိုင်းလျိုးက ပြောသည်။
နေအိမ်ပြောင်းရွှေ့ ရသည့်ရွာသားများသည် လက်ရှိတွင်အခက်အခဲများစွာ ရင်ဆိုင်နေရကြောင်း၊ ထိုသို့ပြောင်းရွှေ့ ရသည့်တိုင် သက်ဆိုင်ရာမှ လာရောက် ကြည့်ရှုပေးခြင်းမရှိကြောင်း လည်း နားဟိုင်းလုံ ဒေသခံများက ပြောသည်။
“ ရွာထဲမှာ အိမ်ရှိတယ်။ လယ်ရှိတယ်။ နေရာကတော့ ကိုယ့်အစီအစဉ်နဲ့ ပြောင်းရတယ်။ နေ့လည်ဆိုရင် လယ်လုပ်ဖို့ ရွာဘက်လာရတယ်။ ရွှေတူးဖော်မှု ပြသနာ က တနေ့ထက် တနေ့ ဆိုးလာတယ်” ဟု နေအိမ်ပြောင်းရွှေ့ရသည့် အမျိုးသား တဦး က ပြောသည်။
နားဟိုင်းလုံ ကျေးရွာ အနီး ရွှေတူးဖော်နေမှုများရပ်တန့်ရန် အတွက် ဒေသခံများ ခေတ်အဆက်ဆက်တောင်းဆိုလာခဲ့သော်လည်း ကုမ္မဏီနှင့် ဒေသတွင်းအာဏာပိုင်များ အလေးထားဆောင်ရွက်ပေးခြင်းမျိုးမရှိဘဲ ဆက်လက်တူးဖော်နေကြောင်း နားဟိုင်းလုံ ဒေသခံများက ပြောဆိုလိုက်သည်။
“ရွှေတူးတာတွေ ရပ်ပေးဖို့ ကျနော်တို့တောင်းတယ်။ဒီကိစ္စတွေကြောင့် ကျနော့် အဖေလည်း အသက်ပေးခဲ့ရပြီ။ ဒါပေမယ့် ဘယ်အစိုးရ တက်တက် ကျနော်တို့ကို ကြည့်ပေးတဲ့သူ မရှိဘူး” ဟု စိုင်းလျိုး က ပြောသည်။
တာချီလိတ်မြို့နယ် တာလေမြို့နယ်ခွဲအတွင်း ရွှေများကိုု ၂၀၀၇ ခုနှစ်ကတည်းက စတင် တူးဖော် လာခဲ့ကြသည်။
ရွှေတူးဖော်မှု စီမံကိန်းကြောင့် လယ်ယာမြေများ ဧကပေါင်း ရာနှင့်ချီ ပျက်စီး ခဲ့ပြီး၊ သဘာဝပတ်ဝန်းကျင် ထိခိုက်ပျက်စီးခြင်း၊ မြစ်ချောင်းများ ပျောက်ကွယ်ခြင်း၊ အဆိုးရွားဆုံးမှာ ဒေသခံလူထုတို့ အသက်ပေးရသည်အထိဖြစ်နေခြင်းတို့ ကြောင့် ၄င်းအားဒေသခံများ အလိုမရှိကြောင်း ဆန့်ကျင်ကန့်ကွက်ခဲ့ကြသော်လည်း ကုမ္မဏီများ ယနေ့တိုင်ဆက်လက်တူးဖော်နေဆဲဖြစ်ကြောင်းသိရသည်။
