သျှမ်းပြည် မြောက်ပိုင်း နမ့်ဆန်မြို့နယ် အတွင်း စစ်ရှောင်ပြည်သူများ စားနပ်ရိက္ခာပြတ်လပ်မှု ရင်ဆိုင်နေရကြောင်း သတင်းရရှိသည်။

နမ့်ဆန်မြို့နယ် အတွင်း နိုဝင်ဘာ ၁၁ရက်နေ့မှ စတင်ကာ ယနေ့ ထိ တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) နှင့် မြန်မာ့တပ်မတော် တို့ တိုက်ပွဲဖြစ်ပွားကာ စစ်ဘေးရှောင် ၁ထောင်ကျော် ထွက်ပြေး တိမ်းရှောင်နေရသည်။

အဆိုပါ စစ်ဘေးရှောင်များသည် နမ့်ဆန်မြို့နယ် ခေနင်း၊ ကျောက်ဖြူလေး၊ မန်ခေါက်ကျေးရွာ နှင့် ခေးကွဲ ကျေးရွာတို့တွင် ခိုလှုံနေရကြောင်း သတင်းရရှိသည်။

လက်ရှိမှာ ကျောက်ဖြူလေး ကျေးရွာတွင် စစ်ရှောင် ၇၀၀ ကျော် နှင့် ခေးကွဲ ကျေးရွာတွင် စစ်ရှောင် ၈၀ ဝန်းကျင် သည် စားနပ်ရိက္ခာ ပြတ်လပ်မှု၊ ကျန်းမာရေး ချို့တဲ့မှုများ ရင်ဆိုင်နေရသည် ဟု ကျေးရွာအုပ်ချပ်ရေးမှူးများ က သျှမ်းသံတော်ဆင့် သို့ ပြောသည်။

“ စားနပ်ရိက္ခာကတော့ပြတ်နေပြီ။ နောက် ကလေးငယ်တွေ အသက်ကြီးတဲ့သူတွေ နေမကောင်းကြဘူး။ ကလေးတွေက ဝမ်းလေ ျှာတာတွေရှိတယ်။ လူက ၇၀၀ကျော်တော့ နေစရာတွေခက်၊ အိမ်သာတွေ အဆင်မပြေဘူး” ဟု ကျောက်ဖြူလေး ကျေးရွာအုပ်ချုပ်ရေးမှူး ဦးစောလှိုင် က သျှမ်းသံတော်ဆင့် သို့ ပြောသည်။

ကျောက်ဖြူလေးစစ်ရှောင် ဒုက္ခသည်များပြားမှုကြောင့် လက်ရှိမှာအိမ်သာများ အဆင်မပြေသဖြင့် ထပ်တူးနေကြရကြောင်း၊ စစ်ရှောင်များအတွက် လူမှု အဖွဲ့အစည်းများ၊ သက်ဆိုင်ရာ အာဏာပိုင် များအနေဖြင့် လာရောက် ကြည့်ရှု့ကူညီစေချင်ကြောင်းလည်း ဦးစောလှိုင် က ပြောသည်။

ထို့ပြင် ခေးကွဲ ကျေးရွာရှိ စစ်ရှောင်များမှာ ဆန်၊ဆီ၊ ရိက္ခာခြောက် များနှင့် တကိုယ်ရည်သုံး ဆပ်ပြာများလည်း လိုအပ်နေကြောင်း ခေးကွဲ ကျေးရွာ ဥက္ကဌ ဦးအိုက်ပ က ပြောသည်။

“ အခုက စစ်ရှောင်တွေ အတွက် ရိက္ခာတွေ ကူညီပေးစေချင်တယ်။ ဆောင်းရာသီဆိုတော့ ကလေးတွေ အတွက် အဝတ်အစားလည်း လိုတယ်” ဟု ဦးအိုက်ပ က ဆိုသည်။

တိုက်ပွဲကြောင့် စစ်ရှောင်နားခိုသည့် နေရာအနီးပတ်ဝန်းကျင်တွင် TNLA နှင့် မြန်မာ့တပ်မတော် စစ်ရေး တင်းမာမှုများ ရှိနေသေးကြောင်းလည်း ဦးစောလှိုင် က ပြောသည်။

“ စစ်ပွဲတွေ ရပ်စေချင်တယ်။ ပြည်သူမျက်နှာ ထောက်ပြီး အမြန်အေးချမ်းစေချင်တယ်” ဟု ဦးစောလှိုင်က တောင်းဆိုလိုက်သည်။

သျှမ်းပြည် မြောက်ပိုင်း နမ့်ဆန်ဒေသခံပြည်သူများသည် လက်ဖက်လုပ်ငန်းသာ တပိုင်တနိုင် လုပ်ကိုင်ကြပြီး၊ တိုက်ပွဲများ၊ မြေမြုပ်မိုင်းများကြောင့် လက်ဖက် လုပ်ငန်း ရပ်ဆိုင်းထားရကာ လူငယ်များ ပြည်ပ နိုင်ငံသို့အလုပ်အကိုင် သွားရောက် လုပ်ကိုင်နေရကြောင်း သိရသည်။