သျှမ်းပြည် မြောက်ပိုင်း နမ့်ဆန်မြို့နယ် ဟူးခင်းကျေးရွာအုပ်စု ဟိုမိန်းကျေးရွာ အနီးတွင် လက်နက်ခဲယမ်းများ သိမ်းဆည်းရမိကြောင်း သတင်းရရှိသည်။
နမ့်ဆန်မြို့နယ် ဟူးခမ်းကျေးရွာအုပ်စု ဟိုမိန်းကျေးရွာ အနီးတွင် နိုဝင်ဘာ ၂၂ရက် တွင် သိမ်းဆည်းရမိသည့် လက်နက်ခဲယမ်းများသည် တအာင်း(ပလောင်) အမျိုးသား လွတ်မြောက်ရေး တပ်မတော် (TNLA) ၏ လက်နက်ခဲယမ်းများဖြစ်ကြောင်း တပ်မတော် ကာကွယ်ရေး ဦးစီးချုပ်ရုံက နိုဝင်ဘာ ၂၃ရက် တွင် ထုတ်ပြန်ကြေညာခဲ့သည်။
အဆိုပါ သိမ်းဆည်းရမိသည့် လက်နက်ခဲယမ်းများတွင် FN-6 ပခုံးထမ်းလေယာဉ်ပစ်လက်နက် ၁လက်၊ လက်နက်မျိုးစုံ ၁၇၀ လက်၊ ခဲယမ်းမျိုးစုံ ၈မျိုး နှင့် TNLA စစ်ဝတ်စုံ နှင့် ဆက်စပ်ပစ္စည်းများကို လည်း ရှာဖွေ တွေ့ရှိကြောင်း ထုတ်ပြန်ချက်တွင် ရေးထားသည်။
ထို သိမ်းဆည်းရမိသည့် လက်နက်ခဲယမ်းနှင့် ပတ်သက်ပြီး TNLA မှ ပြောရေးဆိုခွင့်ရှိသူ တားအိုက်ကျော် က“ တပ်က ကျနော်တို့ လက်နက်တွေ သိမ်းဆည်းသွားတယ်ဆိုတာ ဟုတ်ပါတယ်။ လက်နက်က ဘယ်လောက် ဆိုတာ မသိသေးဘူး” ဟု သျှမ်းသံတော်ဆင့် သို့ ပြောသည်။
TNLA လက်နက်၊ခဲယမ်းမျာကို မြန်မာ့တပ်မတော် ဘက်မှ သိမ်းဆည်းသည့်အတွက် မကြာမီ သျှမ်းပြည်မြောက်ပိုင်း တိုက်ပွဲများ ပိုမိုပြင်းထန်လာနိုင်သည် ဟုလည်း ပြည်သူများက ပြောဆိုနေကြသည်။
