သျှမ်းပြည် မြောက်ပိုင်း နမ့်ဆန်မြို့နယ် မန်မိုင်မိန်းကွမ်းကျေးရွာ အုပ်ချုပ်ရေးအဖွဲ့ဝင် တဦး ရိုက်ခံရပြီး ဒဏ်ရာ ပြင်းထန်စွာ ရရှိကြောင်း ဒေသခံများက ပြောဆိုသည်။
ဖြစ်စဉ်မှာ ယမန် (နိုဝင်ဘာ ၂၂ရက်) မနက် ၉ နာရီ တွင် မြန်မာ့ တပ်မတော် တပ်မ(၈၈) မှ မန်မိုင်မိန်းကွမ်းကျေးရွာ ဒေသခံ ၆၀ ကျော် ကို ဖမ်းဆီးသွားကာ ကျေးရွာ အတွင်းရေးမှူး ကိုလည်း ရိုက်နှိက်ခဲ့ကြောင်း ဒေသခံများ ပြောပြချက် အရ သိရသည်။
အဆိုပါ မန်မိုင်မိန်းကွမ်း ကျေးရွာ သည် ယမန်နေ့ မနက် ၇ နာရီ တွင် တအာင်း(ပလောင်) အမျိုးသား လွတ်မြောက်ရေး တပ်မတော် (TNLA) နှင့် မြန်မာ့တပ်မတော် တို့ တိုက်ပွဲ ဖြစ်ပွားခဲ့သည့် နေရာလည်း ဖြစ်သည်။
မြန်မာ့ တပ်မေတော်မှကျေးရွာ ဒေသခံများကို ဖမ်းဆီးသွားရာတွင် ထိုထဲ၌ ကျောင်းဆရာ၊ဆရာမ များ၊ ကျောင်းသားများ၊ အသက်ကြီး သည့်သူများနှင့် ကလေးမိခင်များ ပါသည့် အပြင် ကျေးရွာအတွင်းရေးမှူး လည်း ပါကြောင်း ဒေသခံ လွေးခင် က သျှမ်းသံတော်ဆင့် သို့ ပြောသည်။
“ မနေ့က ညနေ ၄နာရီ မှာ အားလုံးကို တော့ ပြန်လွှတ်ပေးတယ်။ ရွာ အတွင်းရေးမှူး က တော့ ရိုက်ခံရတယ်။ အခြေအနေကတော့ မငြိမ်သေးဘူး။ တော်တော်ဆိုးတယ်။ အခု နမ့်ဆန်ဆေးရုံမှာ တင်ထားတယ်” ဟု လွေးခင် က ပြောသည်။
ကျေးရွာ အတွင်းရေးမှူးသည် လက်ရှိမှာ မျက်နှာ၊ခေါင်း၊ ရင်ဘတ်များတွင် ကန်ခံ၊ ရိုက်ခံထားရသဖြင့် ဒဏ်ရာ ပြင်းထန်နေပြီး နမ့်ဆန် ဆေးရုံတွင် ဆေးကုသခံနေရဆဲ ဟု လွေးခင် က ပြောသည်။
အဆိုပါ ကိစ္စနှင့် ပတ်သက်ပြီး ယမန်နေ့တွင် မြန်မာ့တပ်မတော် မှ ကျေးရွာ ဒေသခံများကို ဖမ်းဆီးခေါ်ဆောင်သွားရခြင်းသည် ထိုနေရာတွင် မိုင်းနင်းမိမည် ကို စိုးရိမ်သဖြင့် လမ်းပြ အဖြစ် ခေါ်ဆောင်သွားခြင်း ဖြစ်ကြောင်း၊ စစ်သားတဦးလျှင် ရွာသား တဦး တွဲပြီး ခေါ်ဆောင်သွားကြောင်း ဒေသခံများ ပြောပြချက် အရ သိရသည်။
“ စစ်ပွဲ အတွင်း ရွာသားတွေကို အသုံးချခြင်းက ဂျီနီဗာစာချုပ် ကို ချိုးဖောက်လိုက်တာပဲ။ လူသားဖြစ်မှုကို ဆန့်ကျင်တဲ့ ပြစ်မှု စစ်ရာဇာဝတ်မှု မြောက်ပါတယ်။ ပြီးတော့ ကလေးတွေ သက်ကြီးရွယ်အိုတွေ ပါတော့ ပိုဆိုးတယ်” ဟု တအာင်း(ပလောင်) ဥပဒေ အကျိုးဆောင် အဖွဲ့ မှ မိုင်းမျိုးအောင် က ထောက်ပြ ပြောဆိုလိုက်သည်။
မြန်မာ့ တပ်မတော် မှ မန်မိုင် မိန်းကွမ်း ကျေးရွာ ဒေသခံများ ကို ဖမ်းဆီးသည့် ကိစ္စ နှင့် ပတ်သက်ပြီး သတင်းမှန်ပြန်ကြားရေး ဌာနကို သျှမ်းသံတော်ဆင့် မှ ဆက်သွယ်မေးမြန်းရာ ပြန်လည် ဖြေကြားခြင်းမရှိပေ။
TNLA နှင့် မြန်မာ့တပ်မတော်တို့သည် နိုဝင်ဘာ ၁၁ရက်မှ စတင်ကာ တိုက်ပွဲများဖြစ်ပွားခဲ့ပြီး စစ်ဘေးရှောင် ၁ထောင်ကျော် ထွက်ပြေး တိမ်းရှောင်နေရကြောင်း သိရသည်။
Leave a Comments