သျှမ်းပြည် မြောက်ပိုင်း နမ့်ဆန်မြို့နယ်အတွင်း တိုက်ပွဲများ ဆက်တိုက်ဖြစ်ပွားကာ စစ်ရှောင်များ ၁ထောင်ကျော် ရှိလာကြောင်း သတင်းရရှိသည်။
နမ့်ဆန်မြို့နယ် အတွင်း တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) နှင့် မြန်မာ့ တပ်မတော်တို့သည် နိုဝင်ဘာ ၁၁ရက်နေ့ မှစတင်ကာ ယနေ့တိုင် ဖြစ်ပွားနေဆဲ ဖြစ်သည်ဟု သိရသည်။
“ မနေ့က ကျနော် တို့သွားတာက ကျောက်ဖြူလေး စစ်ရှောင်ပါ။ အဲ့မှာက ၆၀၀ကျော်တယ်။ တခြားနေရာပါရင်တော့ ၁၀၀၀ အထက်မှာရှိမယ်” ဟု အိုမ်တမောဝ် လူမှု ကူညီရေး အသင်းမှ အဘမ်း က သျှမ်းသံတော်ဆင့် သို့ ပြောသည်။
လက်ရှိ စစ်ရှောင်များသည် ကျောက်မဲမြို့နယ် ပန်နင်းကျေးရွာ၊ ကျောက်ဖြူလေး ကျေးရွာ နှင့် မန်ခေါက် ကျေးရွာ တွင် တိမ်းရှောင်နေရကြောင်း ရကြောင်း အဘမ်းက ပြောသည်။
“ စစ်ရှောင်တွေ အတွက်က တော့ အစားအသောက်လိုတယ်။ တချို့ နေရာတွေက သွားရခက်တော့ ကျနော်တို့ ကျောက်ဖြူလေးပဲရောက်ခဲ့တယ်။ တခြားနေရာကလည်း အစားအသောက် က လိုအပ်နေတုန်းပါပဲ” ဟု အဘမ်းက ထပ်လောင်းပြောသည်။
TNLA နှင့် မြန်မာ့ တပ်မတော်သည် နမ့်ဆန်မြို့နယ် ကိုက်တိုင်ကျေးရွာ တွင် မနက် ၆နာရီခွဲ ၌ တကြိမ်ဖြစ်ပွားပြီး၊ မနက် ရ နာရီခွဲကျော်တွင် ဟူးခင်းကျေးရွာ နှင့် မန်မိုင် မိန်းကွမ်းလမ်းခွဲ ၌ တကြိမ် ဖြစ်ပွားခဲ့ကြောင်း TNLA ၏ ထုတ်ပြန်ချက် အရ သိရသည်။
ထို့ပြင် မြန်မာ့တပ်မတော် စစ်ရဟတ်ယာဉ်သည် မကြာခဏ လာရောက်ပျံဝဲနေကြောင်း ဒေသခံများပြောပြချက် အရ သိရသည်။
တိုက်ပွဲနှင့် ပတ်သက်ပြီး TNLA နှင့် မြန်မာ့တပ်မတော်တို့ကို သျှမ်းသံတော်ဆင့်မှ ဆက်သွယ်မေးမြန်းရာ ကြိုးစားခဲ့သော်လည်း မရရှိခဲ့ပေ။
