သျှမ်းသက္ကရာဇ် ၂၁၁၄ ခုနှစ် သျှမ်းနှစ်သစ်ကူးပွဲတော်ဖွင့်ပွဲကို  အဝါရောင် သျှမ်းဝတ်စုံများ ဝတ်ဆင်ကာ ရပ်နီးရပ်ဝေးမှဧည့်သည်တော်များ တက်ရောက်ကြသည်။

၂၁၁၄ ခုနှစ်ရောက်တော့မည်ဖြစ်သော သျှမ်းသက္ကရာဇ်သစ်ကို စုပေါင်းကြိုဆိုသည့်ပွဲတော် ၊ သျှမ်းနှစ်သစ်ကူးပွဲတော်ကို နိုဝင်ဘာ ၂၁ ရက် မှ နိုဝင်ဘာ ၂၇ ရက်ထိ တောင်ကြီးမြို့ တွင် စည်ကား သိုက်မြိုက်စွာ ကျင်းပသွားမည်ဖြစ်သည်။  နိုဝင်ဘာ ၂၁ ရက် ညနေ ၅ နာရီ ဝန်းကျင်က ပြုလုပ်သော ဖွင့်ပွဲအခမ်းအနားအား တောင်ကြီးမြို့ သျှမ်းနှစ်သစ်ကူး ဖြစ်မြောက်ရေး ကော်မတီ ဦးစိုင်းထွန်းမြ နှင့် သျှမ်းပြည်နယ် အစိုးရ ဝန်ကြီးချုပ် ဒေါက်တာလင်းထွဋ် တို့မှ   ဖွင့်လှစ်ပေးခဲ့သည်။

သျှမ်းနှစ်သစ်ကူး ပွဲတော်ကြီး ကို ၂ နှစ်တကြိမ် သျှမ်းအရှေ့ ကျိုင်းတုံ၊ သျှမ်းမြောက် လားရှိုး နှင့် သျှမ်းတောင် တောင်ကြီးတို့တွင် အလှည့်ကျ ကျင်းပသည်။

ထိုသို့အလှည့်ကျ စုပေါင်းကျင်းပသည့် သျှမ်းနှစ်သစ်ကူးပွဲတော် ကြီးကို သျှမ်းအရှေ့ ကျိုင်းတုံမြို့က တာဝန်ယူထားကာ လာမည့် ၂၀၂၀ မှသာကျင်းပရမည်ဖြစ်သော်လည်း ၂၀၂၀ တွင် ပြည်လုံးကျွတ် အထွေထွေ ရွေးကောက်ပွဲကြီးနှင့် တိုက်ဆိုင်မည်ဖြစ်သဖြင့် ယခုနှစ်တွင် စုပေါင်းပွဲတော်ကျင်းပရခြင်းဖြစ်သည်ဟု သိရသည်။

သို့သော် ပွဲတော်ကျင်းပရန် အလှည့်ကျတာဝန်ယူထားသည့် ကျိုင်းတုံမြို့အနေဖြင့် လက်ရှိတွင် ပွဲကျင်းပရန် အဆင်သင့်မဖြစ်ခြင်းကြောင့် သျှမ်းတောင် တောင်ကြီးမြို့တွင်သာ ကျင်းပလိုက်ရခြင်းဖြစ်သည်။

“ တကယ်ဆိုရင် ဒီနှစ် ကျင်းပဖို့ ကျနော်တို့ မစီစဉ်ထားဘူး။ အလှည့်ကျတဲ့ သျှမ်းရှေ့ကလည်း အဆင်သင့်မဖြစ်လို့ သျှမ်းတောင်က ကျင်းပဖို့ လက်ခံလိုက်ရတာပါ။ တဖက်ကလည်း နောက်နှစ် မှာ နိုင်ငံတော် က အထွေထွေ ရွေးကောက်ပွဲ ပြုလုပ်မှာဖြစ်တဲ့အတွက် နိုဝင်ဘာလထဲမှာ ဘယ်လိုမှ မအားလပ်နိုင်ကြတော့ဘူးလေ။ ” သျှမ်းနှစ်သစ်ကူး ပွဲဖြစ်မြောက်ရေး ကော်မတီ မှ ဦးစိုင်းထွန်းမြ က ပြောသည်။

သျှမ်းနှစ်သစ်ကူးပွဲတော် ကို သျှမ်းပြည်နယ် အတွင်း နေထိုင်သည့် သျှမ်းလူမျိုးများ သာမက မြန်မာနိုင်ငံအနှံ့ နေထိုင်သည့် သျှမ်းလူမျိုးစုများ၊ ကမ္ဘာတဝန်း အထူးသဖြင့် တရုတ်၊ ထိုင်း နှင့် လာအို တွင် နေထိုင်သည့် သျှမ်းလူမျိုးစုများ ပါ ဆင်နွှဲခဲ့ကြသည်။

“ သျှမ်းပြည်နယ်မှာ ရှိတဲ့ သျှမ်းတွေ တိုင်းရင်းသားတွေ အပြင် မြန်မာပြည်မှာ ရှိတဲ့ သျှမ်းတိုင်းရင်းသားအားလုံးကို ဖိတ်ကြားတယ်။ တရုတ်ပြည် ၁၂ ပန်းနား၊ အိန္ဒိယနိုင်ငံ အာသံ ၊ ယိုးဒယား နဲ့ လာအို က သျှမ်းလည်း ဖိတ်ကြားထားပြီး ရိုးရာ ယဉ်ကျေးမှု ဓလေ့တွေကိုလည်း ဖလှယ်ဖို့ ဖျော်ဖြေဖို့ အားလုံးကို လုပ်ထားပါတယ်” ဟု ဦးစိုင်းထွန်းမြ က ပြောသည်။

ပွဲတော်တက်ရောက်မည့် ဧည့်သည်တော်မှာ ခန့်မှန်းခြေ ၁ သောင်းကျော် ရှိမည်ဖြစ်ကြောင်း၊ အဝေးမှ လာသည့် ဧည့်သည်များကို ဘုန်းကြီးကျောင်းများ နှင့် သက်ဆိုင်ရာအမျိုးများနေအိမ် တွင် တည်းခိုရန် စီစဉ်ထားကြကြောင်း လည်း ပွဲဖြစ်မြောက်ရေး ကော်မတီ က ပြောသည်။

သျှမ်းနှစ်သစ်ကူးပွဲတော် ကျင်းပမည့် ရ ရက် အတွင်း သျှမ်းရိုးရာ ယဉ်ကျေးမှု အက၊ စာပေပြိုင်ပွဲ၊ စာတမ်းဖတ်ပွဲများနှင့် ရိုးရာ အားကစားများနှင့် တေးသီချင်းသီဆို ဖျော်ဖြေမှုများ ရှိမည်ဖြစ်ကြောင်းသိရသည်။

ရိုးရာ ယဉ်ကျေးမှု အက ကို သျှမ်းပြည်နယ် အတွင်းနေထိုင်သည့် ပအိုဝ်း၊ အင်းသား၊ ဓနု၊ တောင်ရိုး၊ လီဆူ၊ ကိုးကန့် နှင့် သျှမ်း တို့ လာရောက်ဖျော်ဖြေမည်။

သျှမ်းနှစ်သစ်ကူး ၏ အနှစ်သာရ သည် ကောက်သစ်များဖြင့်သံဃာတော် အရှင်သူမြတ်များထံ ဆွမ်းကပ်လှူဒါန်းခြင်း၊ လူကြီးမိဘများအား ဦးချကန်တော့ခြင်း နှင့်ပျော်ပွဲရွှင်ပွဲများ၊ အဆိုအကများ ဖြင့် ကြိုဆိုခြင်းတို့ဖြစ်ကြသည်။

နိုဝင်ဘာလ ၂၆ ရက်မနက် ၈ နာရီ တွင် မြို့လုံးကျွတ်ပဒေသာပင် လှည့်လည်သွားမည်ဖြစ်သည်ဟု သိရသည်။

သျှမ်းပြည်နယ် အတွင်း တဖက်တွင် တိုက်ပွဲများ ဆက်တိုက်ဖြစ်ပွားကာ စစ်ဘေးရှောင်များ ရှိနေသဖြင့် သျှမ်းနှစ်သစ်ကူး ပွဲတော်ကို ရ ရက်တိုင် ပြုလုပ်သည့် အပေါ် လူမှု ကွန်ရက် စာမျက်နှာ တွင် ဝေဖန်မှုများလည်း ရှိနေသည်။

သျှမ်းမြောက်ပိုင်းတွင် တိုက်ပွဲဖြစ်ပွားမှုကြောင့် ပြည်သူများ စားနပ်ရိက္ခာ၊ ပညာရေး အဖက်ဖက် ချို့ တဲ့နေချိန် သျှမ်းတောင်ပိုင်းတွင် ပျော်ပွဲ ရွှင်ပွဲများဖြစ်သည့် အပေါ် အားမရကြောင်းလည်း ရေးသားထားသည်ကို တွေ့ရသည်။

၂၀၁၈ တွင် သျှမ်းမြောက် နမ္မတူ မြို့နယ် အတွင်း တိုက်ပွဲများဖြစ်ပွားမှုကြောင့် ကောက်မရိတ်သိမ်းကြရသဖြင့် ကောက်သစ် မစားနိုင်ဘဲ သျှမ်းနှစ်သစ်ကူးပွဲတော်ကိုလည်း မကြိုလိုက်ရသည့် ကျေးရွာများလည်းရှိနေသည်။