သျှမ်းပြည် မြောက်ပိုင်း တိုက်ပွဲဖြစ်ပွားနေသည့် ကျောက်မဲမြို့နယ် မိုင်းငေါ့မြို့ နယ်ခွဲ မန်ခေါက်ကျေးရွာ တွင် အသက် ၂၅ နှစ် အရွယ် အမျိုးသားတဦး မိုင်းနင်းမိကာ ဒဏ်ရာရရှိကြောင်း သတင်းရရှိသည်။
နိုဝင်ဘာလ ၁၉ ရက် မနက် ၆ နာရီက အသက် ၂၅ နှစ် အရွယ် ရှိ မိုင်းအိုက်လူသည် မန်ကန်ရွာ နှင့် နားလွေရွာ ကြားရှိ တောင်ယာ စိုက်ခင်း တွင် ညအိပ်ပြီးအိမ်အပြန်လမ်း၌ မိုင်းထိမိပြီး ဒဏ်ရာရရှိခဲ့ကြောင်း အိုမ်တမောဝ် လူမှုကူညီရေး အသင်း မှ ကိုအဘမ်း က သျှမ်းသံတော်ဆင့် သို့ပြောသည်။
“ ကျနော်တို့ ကို ဆက်သွယ်လာလို့ ကျနော်တို့သွားခေါ်ပြီး ကျောက်မဲဆေးရုံကိုပို့ထားပါတယ်။ ဒဏ်ရာကတော့ ခြေ ၂ဖက် ၊ လက် နဲ့ တင်ပါးထိသွားတယ်။ အရိုး ပါထိသွားတယ်” ဟု ကိုအဘမ်း က ဆိုသည်။
ယာခင်းသွားအိပ်စောင့်သည့် မိုင်းအိုက်လူသည် နေအိမ်ပြန်ပြီး စပါးရိတ်သိမ်းရင်း ရိက္ခာ ယူရန်အတွက် အပြန် မြန်မာ့တပ်မတော်နှင့် တအာင်း(ပလောင်) တပ်တို့ နိုဝင်ဘာ ၁၁ ရက်နေ့မှ စတင်ကာ တိုက်ပွဲ ပြင်းထန်ခဲ့သည့်နေရာအရောက် မိုင်းနင်းမိသဖြင့် ဒဏ်ရာပြင်းထန်စွာရရှိကာ လက်ရှိတွင် ကျောက်မဲဆေးရုံ ၌ဆေးကုသမှုခံယူနေကြောင်း သိရသည်။
ကျောက်မဲမြို့နယ် အတွင်း စက်တင်ဘာ မှစတင်ကာ ယနေ့တိုင် မြေမြုပ်မိုင်း နင်းမိသည့် ဦးရေ ၂၀ ဝန်းကျင် ရှိပြီဖြစ်ကြောင်း သတင်းရရှိသည်။
