သျှမ်းပြည် တောင်ပိုင်း မိုင်းကိုင်မြို့နယ် အတွင်း ကုမ္ပဏီ အသစ် ကျောက်မီးသွေးတူးဖော်ရန် ကြိုးစားနေသည့် အပေါ် ဒေသခံပြည်သူများ ကန့်ကွက်လိုက်သည်။
ကျောက်မီးသွေးကျောက်မီးသွေးကျောက်မီးသွေး
မိုင်းကိုင်မြို့နယ် အတွင်း ယခင်တွင်လည်း ကျောက်မီးသွေး တူးဖော်ပြုလုပ်ခဲ့သည့် ကုမ္ပဏီများကို ဒေသခံများက ဆန္ဒပြပြီး ရပ်ဆိုင်းခဲ့သည်။
သို့သော်လည်း လက်ရှိမှာ “ ရွှေမြေတောင်ကြီး” ဆိုသည့် ကုမ္ပဏီ အသစ်က ကျောက်မီးသွေး စမ်းသပ်တူးဖော်ရန် ယခင် ဝမ့်ယတ်အုပ်စု ခမ်းနားကျေးရွာ ဘက်တွင် ကြိုးစားနေကြောင်း သိရသည်။
“ ရွှေမြေတောင်ကြီး” ကုမ္ပဏီ သည် အစမ်းသပ် တူးဖော်ရန် ကန့်ကွက်လိုပါက ဒီဇင်ဘာ ၉ ရက်ထိသာ လက်ခံကြောင်းလည်း ကြေညာချက် ထုတ်ထားသည်။
ထို့ကြောင့် ယမန်နေ့ (နိုဝင်ဘာ ၁၉ ) ရက်တွင် လွိုင်လုင်ကျောင်း ပရိယတ္တိ စာသင်တိုက် တွင် သံဃာတော်များ၊ဌာနဆိုင်ရာ အဖွဲ့အစည်းများနှင့် ဒေသခံ ပြည်သူများတွေ့ဆုံမှု ပြုလုပ်ခဲ့ကြောင်း မိုင်းကိုင် မြို့နယ် မဲဆန္ဒနယ် အမှတ်(၂) ဦးစိုင်းလုံ က သျှမ်းသံတော်ဆင့် သို့ပြောသည်။
“ မနေ့က သံဃာတော်နဲ့ ပြည်သူတွေ အသံ နားထောင် ရအောင် ဆိုပြီး မိုင်းကိုင် မြေစာရင်းရုံးကလူတွေခေါ်သွားတယ်။ ဒေသခံတွေ ကန့်ကွက်တာ သိသွားအောင်ပါ။ ကုမ္ပဏီသစ်ကို ကန့်ကွက်ဖို့ စာသီးသန့် တင်ရမလားလို့ မေးတော့ သူတို့က မတင်လည်း ရတယ်လို့ ပြောပါတယ်” ဟု ဦးစိုင်းလုံ က ပြောပြသည်။
လက်ရှိ လာရောက်တူးဖော်မည့် ကုမ္ပဏီသစ်သည် မည်သူပိုင်ဆိုင်သည့် ကုမ္ပဏီ မသိရှိသေးကြောင်း၊ တူးဖော်မည့်နေရာ အတိအကျလည်း မသိရှိရသေးကြောင်း ဦးစိုင်းလုံ က ပြောသည်။
“ ကျနော်တို့ က ရှင်းရှင်းလင်းလင်း သိချင်တယ်။ ပြည်သူတွေနဲ့ မတွေ့ဘဲ အပေါ်ကနေ လုပ်ချင်တာလုပ်နေတဲ့သဘောပဲ။ ပိုင်ရှင်နာမည်လည်း မသိရသေးဘူး။ ထွေအုပ်ကို မေးလည်း မသိ။ မြေစာရင်းလည်း ဒါကို မသိဘူးဖြစ်နေတယ်” ဟု ဦးစိုင်းလုံ က ထပ်လောင်းဖြည့်စွတ်ပြောသည်။
ယမန်နေ့တွင် ကျောက်မီးသွေး စမ်းသပ်မှု ပြုလုပ်ရန် ကြိုးစားနေသည့် “ ရွှေမြေ တောင်ကြီး ” ကုမ္ပဏီ ကိစ္စ့အစည်းအဝေး ပွဲတွင် ပြည်သူ ၁၂၀ ကျော် တက်ရောက်ပြီး ကန့်ကွက်ကြောင်း သဘောထားထုတ်ပြန်ခဲ့သည် ဟု မိုင်းကိုင် လွိုင်လုင်ကျောင်း ပရိယတ္တိ စာသင်တိုက် ဆရာတော် ဦးဆောတေယ က သျှမ်းသံတော်ဆင့် သို့ ပြောသည်။
“ ကျနော်တို့ အသစ်လာတူးတဲ့ ကုမ္ပဏီ တော့သိတယ်။ ဘယ်သူဘယ်ဝါ ဆိုတာတော့မသိဘူး။ လုပ်ကွက်တော့များတယ်။အရင် ကျောက်မီးသွေး တူးဖော်တဲ့နေရာနားမှာပါပဲ” ဟု ဦးဆောတေယ က ဆိုသည်။
ကျောက်မီးသွေး တူးဖော်မည့် ကုမ္ပဏီ ကို ကန့်ကွက်သည့် စာကို သက်ဆိုင်ရာသို့ ပို့သွားမည် ဟုလည်း ဦးဆောတေယ က ထပ်လောင်းပြောသည်။
ကျောက်မီးသွေး စမ်းသပ် တူးဖော်မည့် “ ရွှေမြေ တောင်ကြီး” ကုမ္ပဏီသည် ယခင်ကုမ္ပဏီ နှင့် ပတ်သက်မှုမရှိကြောင်း သိရသည်။
ယခင်နှစ် တွင် မိုင်းကိုင်မြို့နယ် အတွင်းရှိ ထင်းရှူးတော ဧက ၁၀၀၀ ခန့် အကျယ် တွင် ပြည့်အောင်ဟိန်း နှင့် ဟိန်းမေတ္တာကုမ္ပဏီက ကျောက်မီးသွေးတူးဖော်မှု ပြုလုပ်ကာ ဒေသခံများ ကန့်ကွက်ဆန္ဒပြခဲ့သည်။
