PNO ဖိတ်ကြားချက် အရ ဒေါ်အောင်ဆန်းစုကြည် တောင်ကြီး ကျောက်တလုံးဘုရားထီးတင်ပွဲတက်ရောက်

0

“ အဓိက က ကျမ ဘုရားထီးတင်တဲ့ ကိစ္စနဲ့ လာတာပါ” ဟု ယမန်နေ့က ပြုလုပ်သော တောင်ကြီးမြို့ လူထု တွေ့ဆုံပွဲ တွင်နိုင်ငံတော် အတိုင်ပင်ခံ ဒေါ်အောင်ဆန်း စုကြည် က ပြောကြားခဲ့သည်။

Photo SHAN-နို၀င်ဘာလ ၁၉ ရက် ၂၀၁၉ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် တောင်ကြီးမြို့လူထုနှင့်တွေ့ဆုံ

နိုင်ငံတော် အတိုင်ပင်ခံ ဒေါ်အောင်ဆန်း စုကြည် သည် ပအိုဝ်း အမျိုးသားအဖွဲ့ချုပ် ( PNO) ဖိတ်ကြားချက် အရ ယနေ့ နို၀င်ဘာလ ၂၀ ရက် မနက် ပိုင်း က တောင်ကြီးမြို့ ကျောက်တလုံးကြီး ကျေးရွာ တွင် ဘုရား ထီးတော်တင်ပွဲ နှင့် သံဃာ ၅၂၈ ပါး ဆွမ်းလောင်း ပွဲကို တက်ရောက်ရန် ရောက်ရှိလာခြင်းသာဖြစ်ကြောင်းသိရသည်။

ယနေ့ နေ့လည်ပိုင်းတွင်လည်း PNO ဥက္ကဌ ဦးအောင်ခမ်းထီ နှင့် နေ့လည်စာ အတူ စားသုံးရန် ရှိသည် ဟု သိရသည်။

ကျောက်တလုံးကျေးရွာ ဘုရားထီးတင်သွားရန် အတွက် နေပြည်တော်မှရောက်ရှိလာသော နိုင်ငံတော်အတိုင်ပင်ခံပုဂ္ဂိုလ်သည် နိုဝင်ဘာ ၁၉ ရက်က တောင်ကြီးမြို့တွင် ခေတ္တရပ်နားကာ  ၂ နာရီခန့်အကြာ လူထုနှင့် တွေ့ဆုံပွဲလုပ်ရခြင်းဖြစ်ကြောင်း  ပြောသည်။

တောင်ကြီးမြို့ မြို့တော်ခန်းမတွင် ပြုလုပ်သော လူထု တွေ့ဆုံပွဲတွင် လာရောက်တွေ့ဆုံသည့် ရပ်မိရပ်ဖ နည်းကြောင်း၊ ပွဲတက်ရောက်မည့်သူကို သက်ဆိုင်ရာမှ ရွေးချယ်ဖိတ်ကြားခဲ့ခြင်းဖြစ်ကြောင်း ဒေါ်အောင်ဆန်းစုကြည် က ယမန်နေ့က ထောက်ပြပြောဆိုလိုက်သည်။

“ ကျမ ဒေသခံတွေနဲ့ တွေ့ချင်လို့ လူထု တွေ့ဆုံပွဲလုပ်တာပါ။ ပြည်သူတွေကို ဘယ်လို ရွေးထားလဲ မေးချင်တယ်” ဟုလည်း ဒေါ်အောင်ဆန်းစုကြည် က မေးခွန်းထုတ်လိုက်သည်။

Photo SHAN-နို၀င်ဘာလ ၁၉ ရက် ၂၀၁၉ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် တောင်ကြီးမြို့လူထုနှင့်တွေ့ဆုံ

ထို တွေ့ဆုံပွဲတွင် လူထုက မိမိမေးလိုသည့် မေးခွန်းကို ကြိုတင် ပေးထားရပြီး၊ ထိုအနက်မှ (တက်ရောက်သူများအနက်မှ) လူ ၁၀ ဦးအတွက်သာ မဲနှိုက်ကာ ရရှိလာသည့် မေးခွန်း ၂၀ ခုကိုသာ သျှမ်းပြည် ဌာနဆိုင်ရာ ဝန်ကြီး အသီးသီးက ပြန်လည်ဖြေကြားပေးခဲ့သည်။

ဒေါ်အောင်ဆန်းစုကြည် နှင့် ပြည်သူလူထုတွေ့ဆုံပွဲတွင် သိလိုသည့် မေးခွန်းများ မေးမြန်းရန် အတွက် ကြိုတင် မဲ ၁၀ ခုတွင် အများစုသည် တောင်ကြီးမြို့ရေမြောင်း ပိတ်ဆို့ကာ ရေကြီး ရေလျှံမှုဖြစ်ပွားခြင်း ကိစ္စ၊ မီးရရှိရေးကိစ္စတို့သာ ဖြစ်ကြောင်းတွေ့ရသည်။

တက်ရောက်လာသည့် လူထု ၏မေးခွန်းအများစုမှာ မြေယာ ကိစ္စနှင့် ဌာနဆိုင်ရာ ကိစ္စများ လည်းဖြစ်နေကြောင်း တွေ့ရသည်။

လူထုတွေ့ဆုံပွဲကို တောင်ကြီးခရိုင် အတွင်းရှိ မြို့နယ် ၅ မြို့နယ် မှ ပြည်သူလူထု ၃၅၀ ဦး၊ တက်ရောက်ခဲ့ပြီး အရပ်ဖက် လူမှု အဖွဲ့အစည်းများ တက်ရောက်ခြင်းမရှိခဲ့ပေ။

“ ဒါက သူတို့လူတွေပဲ ခေါ်တာ။လက်တို့ခေါ်တဲ့သဘောပဲ။ မေးတဲ့ မေးခွန်းတွေလည်း သူတို့ပြင်ထားတဲ့ မေးခွန်းတွေပဲ” ဟု လူထုတွေ့ဆုံပွဲ ကို တက်ရောက် နားထောင်သည့် အမျိုးသမီး တဦးက ပြောသည်။

ထူးခြားချက်မှာ ညောင်ရွှေ ဟော်နန်းရရှိရန် အတွက် ကြိုးစားနေသည့် မြန်မာနိုင်ငံတော် သမ္မတဟောင်း ညောင်ရွှေစော်ဘွားကြီး စဝ်ရွှေသိုက်၏သမီး ဖြစ်သူ စဝ်ဟေမာန်သိုက်လည်း ဒေါ်အောင်ဆန်းစုကြည်ကိုတွေ့ဆုံရန် အတွက် လူထု တွေ့ဆုံပွဲသို့ တက်ရောက်လာ ခြင်းဖြစ်သည်။

“ ကျမကို ဖိတ်ကြားတာတော့မရှိဘူး။ ကျမ ဘာသာ ကျမ တက်လာတာပါ” ဟု စဝ်ဟေမာန်သိုက် ကပြောသည်။

သို့သော် တက်ရောက်ခွင့်သာရပြီး မေးမြန်းခွင့်တော့မရခဲ့ပေ။

Leave a Comments

SHARE