တာချီလိတ်မြို့မှ မိုင်းဖုန်းအသွားလမ်းရှိ စက်မှုဇုံနယ်မြေအနီး လယ်ယာမြေများအား ဟုန်ပန်းကုမ္ပဏီမှ ခြံခတ်သိမ်းယူမှုပြုလုပ်ရာ ဒေသခံများလက်မခံဘဲ ခြံစည်းရိုးများအား ယနေ့သွားရောက်ဖျက်ဆီး လိုက်ကြောင်းသိရှိရသည်။

၂၀၁၉ နိုဝင်ဘာ ၁၇ ရက် နံနက်ပိုင်းက ဟုန်ပန်းကုမ္ပဏီက တာချီလိတ်မြို့ ဟောင်လိတ်ရပ်ကွက် – ဆေခမ်း နှင့် ၀မ်ဟောင်အပိုင်း လယ်ယာမြေဧက ရာဂဏန်းအား သွားရောက်ခြံခတ်မှုပြုလုပ်ခဲ့ကြောင်း၊ အဆိုပါ ကိစ္စ လယ်ယာမြေပိုင်ရှင်များကလက်မခံဘဲ ဟုန်ပန်းကုမ္ပဏီခတ်သည့်ခြံစည်းရိုးများအားဖျက်ဆီးပစ်ခဲ့ကြောင်း၊ အမှုကိစ္စများမပြီးဘဲ ရပ်ကွက်အုပ်ချုပ်ရေးရုံးမှ မြို့နယ်ရုံးသို့ သွားရောက်ဖြေရှင်းနေ ရကြောင်းကြားသိရ သည်။

“ဒီကိစ္စကျနော့်အနေနဲ့လဲ ဒေသခံလယ်သမားတွေကို သနားတယ်။ ဒီအပိုင်းဘဲမဟုတ်ဘူး အရင်ကတည်းက လည်းသိမ်းယူမှုတွေကြောင့်အများကြီးနစ်နာဆုံးရှုံးခဲ့ရတယ်။ စစ်အစိုးရလက်ထက်ကသိမ်းယူတဲ့နယ်မြေ တွေ အသုံးမပြုရင်ပြန်ပေးမယ်လို့ သမ္မတ ကလဲ ပြောထားတယ်လေ။ ကျနော်တို့အတတ်နိုင်ဆုံး ကူညီ ဆောင်ရွက်ပေးပါ့မယ် ” – ဟု ဟောင်လိတ် အုပ်ချုပ်ရေးမှူး စိုင်းချုံ ကပြောသည်။

ထို့အတူ သျှမ်းပြည်နယ်အစိုးရ ၀န်ကြီးချုပ် ဒေါက်တာလင်းထွဋ်ကလည်း သိမ်းဆည်းထားသည့်လယ်ယာ မြေ များအား အသုံးပြုခြင်းမပြုပါက ပြန်လည်ပေးအပ်မည်ဟု ၂၀၁၈ ခုနှစ်က ပြောဆိုထားခဲ့ဖူးသည်။

အဆိုပါမြေများသည် အစိုးရ ချမှတ်ပေးသည့် မြေနေရာဖြစ်သည့်အတွက် ရာဘာချက်စက်ရုံတည် ဆောက်ရန် လျာထားပြီးဖြစ်ကြောင်း ကုမ္ပဏီဘက်မှ ပြောဆိုသည်။

“ဒီမြေ ၊ ဒီလယ်က ကျမတို့ဟာ၊ အခု က အရင်စစ်အစိုးရခေတ်က နာမည်သိမ်းထားတယ်။ ဘာမှ အသုံးမပြုခဲ့ဘူး။ ကျမတို့လဲ ဒီမြေပေါ်မှာ မိသားစု ၀မ်းရေးအတွက်ဘဲ၊ ဘိုးဘွားခေတ်ကတည်းက ထွန်ယက်စိုက်ပျိုးလာတာ ”- ဟု လယ်မြေပိုင်ရှင် နန်းရင် ကပြောသည်။

အဆိုပါ မြေဧက ၆၀၀ ကျော်အား ၁၉၉၈-၉၉ ခုနှစ်က စစ်အစိုးရ သိမ်းပိုက်ထားကြောင်း၊ စက်မှုဇုံမြေနေရာ လည်း အဆိုပါလယ်မြေထဲမှ ပါ၀င်ကြောင်း၊ ထို့်အတွက်အဆိုပါ လယ်မြေများပြန်ရသည်အထိ တိုက်ပွဲ ၀င် ဆောင်ရွက်သွားမည်ဖြစ်ကြောင်း လယ်သမားများက သံဓိဌာန်ပြုထားသည်။

လက်ရှိလယ်မြေများသိမ်းယူသည့် ဟုန်ပန်း ကုမ္ပဏီသည် ၀ တပ်ဖွဲ့ပိုင်ဆိုင်သည့် ကုမ္ပဏီဖြစ်ကြောင်း၊ လက်ရှိ ၄င်းတို့ရုံးစိုက်ထားသည့် မြေနေရာသည်လည်း ၁၉၈၉ ၀တပ်ဖွဲ့ ငြိမ်းချမ်းရေး ယူပြီး နောက်ပိုင်း တောင်ကော့နိုင်း၊ တောင်ကော့နောက် နှင့် ပါဆက် ကျေးလက်ရွာသားများပိုင် လယ်ယာမြေများအား စစ်အစိုးရမှ သိမ်းယူပြီး ၄င်းတို့အား ပေးအပ်ထားလိုက်ကြောင်း ဒေသခံများပြောပြချက်အရသိရသည်။