ယနေ့နံနက်ပိုင်းက လားရှိုးမြို့ ဘူတာကြီး နှင့် စစ်တိုင်းရုံးအနီး ရှော့တိုက်ဒုံး ပစ်ခတ်ခံရရာ လူထု အသက်အိုးအိမ်ထိမှန်သောကြောင့် ယနေ့ ညနေပိုင်းအတွင်း စစ်တိုင်းရုံး ပတ်ပတ်လည်လမ်းမ များအား ပိတ်ထားကြောင်းဒေသခံများပြောပြချက်အရသိရသည်။
လားရှိုးကြီးမှ လေယာဉ်ကွင်း – ဘူတာဘက်သွားသည့် မြို့ပတ်လမ်း၊ ခိုင်းဟျိုး (ခါးရိုး)မှ စစ်တိုင်းရုံးဘက်သွားသည့်လမ်း၊ လားရှိုး ပြည်သူ့အားကစားကွင်းဘက်မှာ ဟော်ကောဝ့်လန် ဘက်သွားသည့် လမ်းများ ယနေ့ည ဦးပိုင်းမှစ၍ ဒေသခံ အာဏာပိုင်များ ပိတ်ထားကြောင်း လားရှိုးမြို့ခံများ ပြောပြချက်အရသိရသည်။
“လားရှိုးကြီးကနေ အသွား ပေါက့်စန့်လိတ် နားမှာစပိတ်တာ၊ လေယာဉ်ကွင်း နားမတောင် မရောက်သေးဘူး။ လွယ်ရိုး – ဘူတာ အဆင်း တက္ကသိုလ် ဘက်မှာလဲ ပိတ်တယ် ” – ဟု လားရှိုးတက္ကသိုလ် ကျောင်းသား စိုင်းခမ်း က ပြောသည်။
ယနေ့နံနက်ပိုင်းအတွင်း လားရှိုးမြို့ပေါ် ပစ်ခတ်မှု တွင် – လေယာဉ်ကွင်း ဘက် တလုံးဦးတည် ပစ်ခတ်ကြောင်း၊ ရပ်ကွက် ၉ ဘက် နှစ်လုံး ကျကြောင်း၊ ၆၂၆ ထောက်/ပို့တပ်အနောက်ဘက် တလုံးကြကြောင်း၊ ပစ်ခတ်မှုတွင် လားရှိုးမြို့ခံ တဦး ထိမှန်ဒဏ်ရာရသည့်အပြင် နေအိမ် နှင့် ကားများ ထိမှန်ကြောင်း သိရသည်။
“ဒါတောင်ထိပ်ဖူးဘဲကွဲတာ တလုံးလုံးသာပေါက်ရင်တော့ အကုန်သေလောက်ပြီ။ မြို့ထဲမှာကျရင်ပိုဆိုးမှာ”- ဟုလည်း ရပ်ကွက်သား ကိုဦးကပြောသည်။
ယခုပစ်ခတ်မှုတွင် မြောက်ပိုင်းမဟာမိတ်တပ်ဖွဲ့လက်ချက်ဟု ဒေသခံများပြောဆိုနေကြသော်လည်း အတည်ပြုချက်ရယူရန် TNLA ပြောရေးဆိုခွင့်ရှိသူထံ သျှမ်းသံတော်ဆင့်မှ ဆက်သွယ်မေးမြန်းရာတွင် ဖုန်းပိတ်ထားသဖြင့် ဆက်သွယ်မရခဲ့ပေ။
သြဂုတ်လယ်ကလည်း မြောက်ပိုင်းစစ်ရေးမဟာမိတ်တို့မှ ပြင်ဦးလွင် နည်းပညာတက္ကသိုလ် ၊ စစ်ဆေးရေးဂိတ်၊ ဂုတ်တွင်းဂိတ်၊ တံတားများ ပစ်ခတ်မိုင်းခွဲခဲ့ရာ သျှမ်းပြည်မြောက်ပိုင်းတွင် စစ်မြေပြင်အဖြစ်ပြောင်းလဲသွားပြီးနောက်ပိုင်း ယခု နိုဝင်ဘာလ အတွင်း စစ်ရေး ပြန်လည်တင်းမာလာခြင်းဖြစ်သည်။