သျှမ်းပြည် မြောက်ပိုင်း ကွတ်ခိုင်မြို့တွင် ယနေ့ မနက်ပိုင်းက တိုက်ပွဲကြောင့် အမျိုးသား ၂ ဦး ထိခိုက်ဒဏ်ရာရရှိကြောင်း သတင်းရရှိသည်။

နို၀င်ဘာလ ၁၄ ရက် ယနေ့မနက် ရ နာရီ ဝန်းကျင်က တအာင်း(ပလောင်) အမျိုးသား လွတ်မြောက်ရေး တပ်မတော် (TNLA) နှင့် မြန်မာ့တပ်မတော်တို့ ကွတ်ခိုင်မြို့ နယ် လွိုင်ဆမ်ဆစ် တောင်ခြေ အနီးတွင် တိုက်ပွဲဖြစ်ပွါးရာ အမျိုးသား ၂ ဦး ကျည်ဆန်ထိမှန်ဒဏ်ရာရရှိကာ ကွတ်ခိုင် ဆေးရုံသို့ ပို့ဆောင် ဆေးကု ရကြောင်း ကွတ်ခိုင် ပြည်သူ့ဆေးရုံ အုပ် ဒေါ်ဝင့်ဝင့်မြိုင် က သျှမ်းသံတော်ဆင့်သို့ ပြောသည်။

“ အမျိုးသား ၂ ယောက်ပါ။ အသက် က ၁၈၊ ၁၉ လောက်ဘဲရှိမယ်ထင်တယ်။ တယောက်ကတော့ လည်ပင်းမှာ တချက်၊ နောက်တယောကက်တော့ နောက့်စေ့မှာ ထိပါတယ်။ စိုးရိမ်စရာတော့ မရှိပါဘူး” ဟု ဒေါ်ဝင့်ဝင့်မြိုင် ကပြောသည်။

အလားတူယမန်နေ့ ကလည်း TNLA နှင့် မြန်မာ့ တပ်မတော်တို့ နမ့်ဖတ်ကာ အနီး မိုင်းယုနှင့် ဟိုမုန်းကျေးရွာ ကြားတိုက်ပွဲဖြစ်ပွားရာတွင် သံဃာတော်တပါး နှင့် အမျိုးသား တဦး ကျည်ထိမှန်ခဲ့ကြောင်း နမ့်ဖတ်ကာ မေတ္တာရှင် လူမူကူညီရေး အသင်းမှ တာဝန်ရှိသူ တဦးက သျှမ်းသံတော်ဆင့် သို့ပြောသည်။

ကျည်ထိမှန်သည့်သံဃာတော်သည် သက်တော် ၄၅ နှစ်ခန့်ရှိပြီး၊ အမျိုးသားမှာ အသက် ၃၅နှစ်ကျော်ရှိကြောင်း သိရသည်။

“သူတို့ ၂ ဦးက ပေါင်မှာထိတော့ သိပ်စိုးရိမ်စရာမရှိဘူး။ မနေ့က ကျနော်တို့မူဆယ်ဆေးရုံ ပို့လိုက်တယ်။ သက်သာသွားပြီ။ သူတို့ ၂ ဦးက လမ်းပိတ်ထားတာ မသိပဲ သွားတော့ ပစ်ခံရတာပါ” ဟု နမ့်ဖတ်ကာ မေတ္တာရှင် လူမှု ကူညီရေးအသင်းက တာဝန်ရှိသူက ဆိုသည်။

ယခုရက်ပိုင်းအတွင်း ကွတ်ခိုင်မြို့နယ်နှင့် ကျောက်မဲမြို့နယ် အတွင်း TNLA နှင့် မြန်မာ့တပ်မတော်တို့သည် နေ့စဉ် တိုက်ပွဲဖြစ်ပွားကာ တိုက်ပွဲမှာ ပြင်းထန်နေကြောင်း သိရသည်။

“ မနေ့က ဖြစ်တဲ့ တိုက်ပွဲ က ကျနော်တို့ TEC ကျောင်းဝင်းထဲ လက်နက်ကြီးကျတယ်။ ကျောင်းဝင်းထဲမှာ ၁လုံး၊ ကျောင်းပြင်နားမှာ ၂ လုံးကျတယ်။ ကလေးတွေတော့ မသိဘူး” ဟု ကွတ်ခိုင် တအာင်း စာပေ၊ယဉ်ကျေးမှု ဥက္ကဌ မိုင်းအိုက်မွန် က သျှမ်းသံတော်ဆင့် သို့ ပြောသည်။

ယမန်နေ့ တိုက်ပွဲဖြစ်ပွားမှုကြောင့် ကလေးများထိခိုက်ဒဏ်ရာရမှု မရှိသော်လည်း ကလေးများ ထိတ်လန့်မှု ရှိနေကြောင်း၊ ပြည်သူနှင့် နီးသည့်နေရာတွင် တိုက်ပွဲများမပြုလုပ်ကြစေလိုကြောင်းလည်း မိုင်းအိုက်မွန်က ပြောသည်။

ယနေ့ မနက် ပိုင်း ရ နာရီ အချိန်ခန့်တွင် TNLA နှင့် မြန်မာ့ တပ်မတော်တို့သည် ကျောက်မဲမြို့နယ် ခွန်ကော်ကျေးရွာတွင် တကြိမ်၊ ကွတ်ခိုင်မြို့နယ်တွင် ၂ ကြိမ်တိုက်ပွဲဖြစ်ပွားခဲ့ကြောင်း TNLA သတင်းထုတ်ပြန်ချက် အရ သိရသည်။