သျှမ်းပြည်တောင်ပိုင်း ရပ်စောက်မြို့နယ်တွင် အမျိုးသမီးတဦးအား သေနတ်သမားတဦးက နေအိမ်အထိ ဝင်ရောက်ပစ်ခတ်ခဲ့ကြောင်းသိရသည်။
နိုဝင်ဘာလ ၁၀ ရက် ညနေပိုင်းက ရပ်စောက်မြို့နယ် နောင်ဝိုးရွာနေ နန်းခမ်းစိန် အသက် ၄၃ နှစ်သည်လယ်တောမှ နေအိမ်ပြန်အရောက်တွက် အသက် ၂၅ နှစ်ခန့်အရွယ်ရှိအမျိုးသားတဦးက ဆိုင်ကယ်ဖြစ်အိမ်ဝင်းအတွင်းဝင်ရောက်ကာ ပစ်ခတ်ခဲ့သဖြင့် ကျည် ၄ ချက်ထိမှန်ပြီးနေရာတွင်ပင်ပွဲချင်းပြီးသေဆုံးခဲ့ကြောင်းသိရသည်။
“သူ့ရဲ့ ရင်ဘတ်မှာတချက်၊ ညာဘက်လက်မှာတချက်၊ ပေါင်မှာတချက်နဲ့ ဗိုက်မှာတချက် ကျည်ဆံဝင်သွားတယ်။ နေအိမ်မှာဘဲ ပွဲချင်းပြီးသေသွားတယ်။ သူ့ရဲ့အလောင်းကိုတော့ ရပ်စောက်ဆေးရုံမှာဘဲရင်ခွဲစစ်ဆေးပြီးတော့ မနေ့က ညနေ ၄ နာရီလောက်မှာ သဂြိုဟ်လိုက်ပါတယ်။ဘာကြောင့်လဲဆိုတာတော့ကျနော်တို့မသိပါဘူး။ အမျိုးတွေကြားမှာ ထင်မြင်ချက်ပေးနေတာတခုကတော့ ငွေရေးကြေးရေးကိစ္စဘဲရှိမယ်ထင်တယ်လို့ပြောပါတယ်။ ” – ဟု ဆွေမျိုးတော်စပ်သူ စိုင်းနောင့်ကပြောသည်။
ပစ်ခတ်ခံရသည့်ကျည်ခွံအား ရဲများစစ်ဆေးရာတွင် မြန်မာအစိုးရ၏ ကာကွယ်ရေးဌာနမှ ထုတ်ပေးသောကျည်မဟုတ်ကြောင်း၊ နယ်စပ်မှ ရောင်းဝယ်သည့်ကျည်ခွံဖြစ်ကြောင်း ၊ ပစ်ခတ်မှု တရားခံကိုလည်း ရှာဖွေနေကြောင်း ပြောဆိုနေကြသည်။
“သေနတ်သမားတွေက ခုတလော လူထုပါပစ်ခတ်လာတယ်၊ သံဃာတော်တွေပါမကျန် ပစ်ခတ် လာတယ် ဆိုတော့ စိုးရိမ်ရတဲ့အနေအခြေအနေပေါ့။ မလုံခြုံဘူးလို့ခံစားရတယ် ” – ဟု ရပ်စောက် ဒေသခံ စိုင်းသန်း ကလည်းပြောသည်။
နန်းခမ်းစိန်သည် ရပ်စောက်မြို့နေ လုံးဆန်နုတ်၊ ပါလိတ် တို့၏သမီးဖြစ်ပြီးမွေးချင်းညီအကိုမောင်နှမ ၄ ဦးရှိကြောင်းသိရသည်။ လက်ရှိတွင်ခင်ပွန်းဖြစ်သူ စိုင်းဘသိန်းနှင့်သားသမီး ၃ ဦး ကျန်ရစ်ခဲ့ကြောင်း သိရသည်။
Leave a Comments