သျှမ်းပြည် ရပ်စောက်မြို့နယ် ကျောက်ဂူတိုက်နယ်တွင် စစ်ကောင်စီတပ်မှ ကျေးရွာအတွင်း ဝင်ရောက်တပ်စွဲပြီး ဒေသခံများကို ထွက်ပြေးတိမ်းရှောင်ခိုင်းကြောင်း စုံစမ်းသိရသည်။

ဇွန်လ ဒုတိယပတ်မှ စတင်ပြီး ရပ်စောက်မြို့နယ် အင်တောမြို့အနီး ကျောက်ဂူကျေးရွာအုပ်စုရှိ လွိုင်ဟောင်နှင့် ပုန်းအင်းကျေးရွာများသို့ စစ်ကောင်စီတပ်မှ ဝင်ရောက်တပ်စွဲခဲ့ပြီးနောက် ပြည်သူများကို ဘုန်းကြီးကျောင်းနှင့် ဘေးလွတ်ကင်းရာသို့ ထွက်ပြေးတိမ်းရှောင်ခိုင်းကြောင်း အင်တောမြို့ခံတစ်ဦးက သျှမ်းသံတော်ဆင့်ကို ပြောသည်။

“အနောက်ဘက်မှာ လေယာဉ်နဲ့ ဗုံးတွေနဲ့ ကြဲနေတော့ ရှောင်ခိုင်းတာ၊ အခု ရွာသားတွေတော့ ပြေးနေကြပြီ။ လွိုင်ဟောင်နဲ့ ပုန်းအင်း အဲ့နှစ်ရွာက အသက်ကြီးတဲ့ လူတွေတော့ ဘုန်းကြီးကျောင်းမှာ ထားထားတယ်။ ရွာထဲမှာ မနေနဲ့ ရှောင်ထားပေးလို့ စစ်တပ်က ပြောတာ၊ သူတို့ ပစ်ခတ်လို့ ထိမယ်လို့ ပြောတာ။ စစ်ကောင်စီတပ်ကတော့ ရွာထဲမှာ နေရာယူထားတယ်”ဟု အင်တောမြို့ခံ အမျိုးသားတစ်ဦးက ပြောသည်။

လက်ရှိ စစ်ကောင်စီတပ်မှ ကျေးရွာထဲ ဝင်ရောက်နေရာယူ တပ်စွဲထားသည့် လွိုင်ဟောင်နှင့် ပုန်းအင်းရွာမှ ဒေသခံများသည် လွိုင်ဟောင်ဘုန်းကြီးကျောင်းနှင့် ကျောက်ဂူ၊ အင်တောမြို့ဘက်သို့ ထွက်ပြေးတိမ်းရှောင်နေရကြောင်း ဒေသခံများထံမှ သိရသည်။

ထို့အပြင် လွိုင်ဟောင်ဘုန်းကြီးကျောင်းတွင် ခိုလှုံနေသည့် ဒေသခံများကို စစ်ကောင်စီတပ်မှ ကျေးရွာအတွင်းသို့ ရိက္ခာပြန်ယူခွင့် မပေးဘဲ ပစ်ခတ်မှု ဖြစ်ပွားပါက မသင်္ကာသူကို ခေါ်ယူစစ်ဆေးမည်ဟု ခြိမ်းခြောက်ပြောဆိုကြောင်း ဒေသခံများက ပြောသည်။

“ပုန်းအင်းကတော့ ရှောင်ခိုင်းတာ ကြာပြီ၊ ဆယ်ရက်လောက် ရှိပြီ။ လွိုင်ဟောင်ကတော့ ၅ ရက်လောက် ရှိပြီ။ ဘုန်းကြီးကျောင်းမှာ နေတဲ့လူလည်း ကိုယ့်ဟာကိုယ် ချက်စားပြီး အဲ့မှာပဲ နေကြ၊ ရွာထဲမသွားနဲ့ဦးလို့ ပြောထားတယ်။ ပစ်လို့ ခတ်လို့ မသင်္ကာရင် ခေါ်စစ်မယ်လို့ ပြောတယ်”ဟု အင်တောမြို့ခံ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။

စစ်ကောင်စီတပ်သည် အရပ်သားများ နေထိုင်ရာ၊ စစ်ဘေးရှောင်စခန်းများ ရှိရာသို့ တိုက်ပွဲဖြစ်ပွားခြင်း၊ စစ်သားများ ဝင်ရောက် နေရာယူခြင်း နှင့် တိုက်ခိုက်မှု ပြုလုပ်ခြင်းတို့သည် စစ်ရာဇဝတ်မှု (War Crimes) ပြစ်မှုမြောက်သကဲ့သို့ မြန်မာနိုင်ငံမှ ပါဝင် လက်မှတ်ရေးထိုးထားသည့် ဂျီနီဗာ ကွန်ဗင်းရှင်း စာပိုဒ်ပါ စစ်ပွဲအတွင်း အရပ်သားများ ထိခိုက်ကာကွယ်မှုကို အကာအကွယ်ပေးရမည့် စာချုပ်ကိုလည်း ကျူးလွန်ရာ ဖြစ်နေသည်။

ပြီးခဲ့သည့် ဇွန်လ ၁၄ ရက်ကလည်း ကျောက်ဂူကျေးရွာအုပ်စုရှိ လွိုင်ဟောင်ရွာ အနောက်ဘက် ၄ မိုင်ခန့်အကွာ တောထဲသို့ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ကြောင်း အင်တောမြို့မှ ၎င်းဒေသခံက ဆက်ပြောသည်။

အလားတူ မေလ ၂၀ ရက်နေ့ကလည်း ကျောက်ဂူတိုက်နယ်တွင် တိုက်ပွဲဖြစ်ပွားခြင်း မရှိဘဲ စစ်ကောင်စီတပ်မှ DPLA လှုပ်ရှားနေရာများသို့ ဓာတုအဆိပ်ငွေ့ဗုံးများကို လေကြောင်းဖြင့် ကြဲချတိုက်ခိုက်ခဲ့ကြောင်း DPLA ဘက်မှ သတင်းထုတ်ပြန်ထားသည်။

ယခုနှစ် ၂၀၂၅ ဇန်နဝါရီလမှ စတင်ပြီး ရပ်စောက်မြို့နယ်တွင် စစ်ကောင်စီတပ်နှင့် ဓနုပြည်သူ့လွတ်မြောက်ရေးတပ်တော် DPLA တို့ တိုက်ပွဲများ ဆက်တိုက်ဖြစ်ပွားလျက်ရှိရာ ကျောက်ဂူတိုက်နယ်အတွင်း နေထိုင်သည့် ဒေသခံများ တိမ်းရှောင်ထွက်ပြေးနေရသည်။

TNLA ပူးပေါင်းတပ်ဖွဲ့နှင့် စစ်ကောင်စီတပ်တို့ တိုက်ပွဲပြင်းထန်နေသည့် နောင်ချိုမြို့နယ် တောင်းခမ်းဒေသနှင့် ရပ်စောက်မြို့နယ် ကျောက်ဂူဒေသသည် မိုင် ၃၀ ခန့်သာ ကွာဝေးပြီး စစ်ကောင်စီ စစ်ကြောင်းများကို DPLA က ကြားဖြတ် တိုက်ခိုက်နေသည့် နေရာဖြစ်ကြောင်း ဒေသခံများက ပြောသည်။