ထိုင်းနိုင်ငံကို မိမိမွေးရပ်ဇာတိကဲ့သို့ချစ်မြတ်နိုးရန် ရွှေ့ပြောင်းအလုပ်သမားများအား ထိုင်းဝန်ကြီးချုပ်တိုက်တွန်း

ထိုင်းနိုင်ငံဝန်ကြီးချုပ် ပရာယွတ်ကျန်အိုးချားက ထိုင်းနိုင်ငံ ဆမွတ်ဆာခွန်းခရိုင်ရှိ ရွှေ့ပြောင်း အလုပ်သမားများနှင့်တွေ့ဆုံကာ မိမိအလုပ်လုပ်ကိုင် ၀မ်းစာရှာဖွေနေဆဲ ထိုင်းနိုင်ငံအား မိမိနိုင်ငံ ကဲ့သို့ချစ်မြတ်နိုးကြရန်တိုက်တွန်းလိုက်သည်။

၀န်ကြီးချုပ် ပရာယွတ်ဦးဆောင်သည့် ထိုင်းနိုင်ငံ ပြည်ထဲရေးဝန်ကြီး၊ စိုက်ပျိုးမွေးမြူရေးဝန်ကြီးနှင့် သက်ဆိုင်ရာအာဏာပိုင်များသည် မတ်လ ၅ ရက်နေ့က ဆမွတ်ဆာခွန် ခရိုင် မြို့တွင်းမြို့နယ်ရှိ မြန်မာနိုင်ငံမှ ရွှေ့ပြောင်းအလုပ်သမားများအားတွေ့ဆုံရာတွင်ထိုသို့တိုက်တွန်းပြောဆိုခြင်းဖြစ်သည်။

“ထိုင်းမှာလာပြီးအလုပ်အကိုင်တွေ ရရှိတယ်။ အလုပ်လုပ်တယ် ၀င်ငွေရတယ်။ ဒီတော့ ခင်ဗျားတို့ မွေးရပ် ဇာတိကိုချစ်သလိုမျိုး ထိုင်းမြေကိုချစ်ပါ။ ထိုင်းရဲ့ဥပဒေကိုလေးစားပါ။ ပြသနာတွေအခက်အခဲ တွေရှိရင်လည်း ထိုင်းအာဏာပိုင်တွေနဲ့ NGO အဖွဲ့အစည်းတွေကို တိုင်ပင်ဆွေးနွေးပါ။ ”- ဟုတိုက်တွန်း ခဲ့ကြောင်း ထိုင်းနိုင်ငံ Bangkokbiz News တွင်ဖော်ပြထားသည်။

ထို့အပြင်ထိုင်းနိုင်ငံမှချမှတ်ထားသော စည်းမျဉ်းစည်းကမ်းအတိုင်း အလုပ်လုပ်ခွင့်ကတ်များ ၊ ကိုင်ဆောင်လျက်ရှိသော ယာယီပတ်စပို့နှင့် ထိုင်းအစိုးရမှထုတ်ပေးသော ရွှေ့ပြောင်းအလုပ်သမားများကတ် သက်တမ်းတိုးရေး အစရှိသည်တို့ကိုပါ တိုက်တွန်းပြောဆိုခဲ့သည်ဟုသိရသည်။

တွေ့ဆုံပွဲတွင် မြန်မာရွှေ့ပြောင်းအလုပ်သမားများဘက်မှ အခက်အခဲများကိုလည်း လက်ခံနားထောင်ခဲ့ကြောင်းသတင်းတွင်ဖော်ပြထားသည်။

ထိုင်းနိုင်ငံအစိုးရသည် ထိုသို့ရွှေ့ပြောင်းအလုပ်သမားများနှင့်တွေ့ဆုံမှုအပြီး မတ်လ ၆ ရက်နေ့တွင် ဖိတ်ပူးရီးခရိုင်၌ကျင်းပမည့် ၀န်ကြီးများအဖွဲ့အစည်းအဝေးသို့ တက်ရောက် ရွှေ့ပြောင်းအလုပ်သမားများနှင့်ပတ်သက်သည့် ခေါင်းစဉ်တွင်ထည့်သွင်းဆွေးနွေးသွားမည်ဖြစ်ကြောင်းသိရပါသည်။