ကျိုင်းတုံအရှေ့မြောက်ဘက်ဒေသ ၀ နှင့် အစိုးရတပ် စစ်ရေးတင်းမာ မိုင်းလားအထူးဒေသအတွင်းကူးစက်

သျှမ်းပြည်အရှေ့ပိုင်း ကျိုင်းတုံမြို့နယ် အရှေ့မြောက်ဒေသ မိုင်းယန်း နှင့် မိုင်းခတ် မြို့နယ်အတွင်း အစိုးရတပ် နှင့် ၀ တပ် တို့ အောက်တိုဘာလ နှောင်းပိုင်းက စစ်ရေးတင်းမာမှုများဖြစ်ပွါးရာ ယခုရက်ပိုင်းအတွင်း မိုင်းလားနယ်မြေအတွင်းသို့ ကူးစက်လာနေကြောင်း ဒေသခံများပြောပြချက်အရ သိရသည်။

“မိုင်းခတ်ဗျူဟာမှူးက ၀ါးတားဂိတ် သွားလုပ်တာပြီးခဲ့တဲ့အပတ်က၊ အဲဒါကို ၀ က သူတို့သွားလာတဲ့ လမ်းကြောင်းကို ပိတ်ဆို့စစ်ဆေးရမလားဆိုပြီး အင်အား အလုံးအရင်းနဲ့ ၂ ရက်ကြာလာဝိုင်းတယ်။ အဲဒီဝါးတားဂိတ်တွေကိုလဲ အကုန်ဖျက်ဆီးပစ်တာ။ ကျိုင်းတုံအထိ သွားရှင်းမှ ပြီးသွားတာ။ အခု ဘယ်လိုလုပ်ပြီး ၀ က မိုင်းလား နယ်မြေထဲ ထပ်ဝင်တာလဲမသိဘူး ” – ဟု မိုင်းယန်းမြို့နယ် အတွင်းက ရပ်ကျေး အုပ်ချုပ်ရေးမှူး တဦးကပြောသည်။

ပြီးခဲ့သည့်အောက်တိုဘာ ၂၃ ရက် က မိုင်းခတ်ဗျူဟာမှူး ဗိုလ်မှူးကြီး သူရိန်ထွန်းက လက်အောက်ခံ တပ်ရင်းအား မိုင်းညှင်းကျေးရွာဘက် ၀ါးတားဂိတ် ထောင်ပြီး လမ်းသွားလမ်းလာများအား စစ်ဆေးခဲ့ကြောင်း၊ အောက်တိုဘာ ၂၅ ရက် မိုင်းပေါက်အခြေစိုက် UWSA ၀ တပ်မဟာ ၄၆၈ မှ အင်အားဖြင့် ၀န်းရံပြီး ၀ါးတားဂိတ်နှင့် ယာယီကင်းစခန်းများအား ဖျက်ဆီးပစ်ခဲ့ကြောင်း သိရသည်။

ကျိုင်းတုံရှိ ၀ ဆက်ဆံရေးရုံးက တြိဂံတိုင်းစစ်ဌာနချုပ် သို့ သွားရောက်တွေ့ဆုံဆွေးနွေးပြီးမှသာ အောက်တိုဘာ ၂၇ ရက် နေ့က ၀ တပ်များ ပြန်ဆုတ်သွားသည်ဟုလည်းသိရသည်။

ထို့နောက်ပိုင်း အစိုးရတပ်များက မိုင်းခတ်မြို့ အဝင်အထွက်၊ မိုင်းယန်းမြို့အဝင်အထွက် ဂိတ်များအား လုံခြုံရေးတင်းကြပ်စစ်ဆေးခဲ့ကြောင်း၊ ၀ တပ်မိသားစုဝင်များသာမက ၀ လူထုအားလည်း သွားလာခွင့် တင်းကြပ်ခဲ့ကြောင်း၊ ထို့အတူ ၀တပ်ကလည်း ၄င်းနယ်မြေအတွင်း ၀င်ထွက်သည့် ဂိတ်များအားလည်း လုံခြံုရေးတိုးမြင့်စစ်ဆေးလာသည်ဟု ဒေသခံများပြောပြချက်အရသိရသည်။

ထို့အပြင် အောက်တိုဘာ ၂၈ ရက်နေ့ အထူးဒေသ ၄ မိုင်းလားတပ် ထိန်းချုပ်နယ်မြေ နှင့် ၀ တပ်ဖွဲ့ထိန်းချုပ်နယ်မြေအကြား ခိုဆုန်ဂိတ်စခန်းအား ၀ တပ် မှ ကျူးကျော်ကာ နောင်ဟုတ် ၊ ၀မ်နမ့် ၊ ပါဆန်၊ ၀မ်ချိန်း ကျေးရွာဘက်အထိ ၀င်ရောက်လာခဲ့ကြောင်း၊ ကျူးလွန်လာသည့် ၀ တပ်ဖွဲ့ဝင်များအား မိုင်းလားတပ်မှ ပိတ်ဆို့ပြီး ပြန်လည်ဆုတ်ခွါပေးရန် ခေါင်းဆောင်များက ဆွေးနွေးနေကြောင်း သိရှိရသည်။

“အထက်က စေခိုင်းလို့ ကျနော်တို့ လဲ မတတ်နိုင်ဘူး။ မိုင်းညှင်းဘက် သွားဝိုင်းတုန်းက အစိုးရတပ် ဆိုတော့ စိတ်ပါသေးတယ်။ အခု က မိုင်းလားဆိုတော့ ကျနော်တို့ မိတ်ဆွေတွေဘဲလေ၊ ဒါပေ မယ် ့အထက် အမိန့်ဆိုတော့ ကျနော်တို့လဲ မလွန်ဆန်နိုင်ဘူး။ ကျနော်တို့ တပ် တွေ စစ်ကားတွေ မိုင်းလားနယ်မြေ အတွင်း ၀င်သွားတော့ မိုင်းလား တပ်ဘက်ကလဲ အင်အား အလုံးအရင်း နဲ့ ပြန်လာဝိုင်းတယ်။ ပစ်မိန့်တော့ မရှိဘူး၊ နှစ်ဘက်လုံးဘဲ။ အထက်က လူကြီးတွေ က ဆွေးနွေးနေတယ်ပြောတယ်။ ဆုတ်ဆိုလဲ ဆုတ်ရမှာဘဲ၊ နေဆိုလဲ နေရမှာဘဲ စစ်သားဆိုတော့ မတတ်နိုင်ဘူး” – ဟု ၀တပ် အရာရှိ တဦးဖြစ်သည့် ဗိုလ်အိုက်နပ် က သျှမ်းသံတော်ဆင့်ထံသို့ပြောသည်။

အဆိုပါ သတင်းနှင့် ပတ်သက်၍ ရှေ့တန်းရောက် မိုင်းလား တပ်မှူး တဦးကလည်း သျှမ်းသံတော်ဆင့်သို့ အတည်ပြုသည်။

၂၀၁၆ စက်တင်ဘာ ၂၈ ရက်နေ့ တုန်းကလည်း ၀ တပ် အင်အား ၁၀၀၀ ခန့် သည် ၄င်းတို့၏ စစ်မဟာမိတ်ဖြစ်သည့် မိုင်းလားနေမြေအတွင်း ၀င်ရောက်ကာ တပ်စခန်း ၅ ခု ကို သိမ်းပိုက်လိုက်သည်။ ယနေ့အ ထိ မွန့်ဆမ်ဆုန် တပ်စခန်းအား ပြန်လည်ရုတ်ပေးခြင်းမရှိသေးပေ။ နေပြည်တော်အစိုးရကလည်း အဆိုပါ တပ်စခန်း မှ ၀တပ်ဖွဲ့များ ရုတ်ပေးခြင်းမပြုပါက တာ့ပင်းချေင်း ဂိတ်တံတား အား ပြန်လည်ဖွင့်လှစ်ပေး မည်မဟုတ်ဟုပြောဆိုခဲ့ကြောင်း ငြိမ်းချမ်းရေးကိုယ်စားလှယ်တော်ကြီးများထံမှ ကြားသိရသည်။