သျှမ်းပြည် မြောက်ပိုင်း လားရှိုးမြို့ အမှတ်(၅) ရပ်ကွက်၊ ပန်အုပ် ကျောင်းအနီးတွင် ယမန်နေ့ တွင် အမျိုးသားတဦး ဓားထိုးဒဏ်ရာဖြင့် သေဆုံးကြောင်း သတင်းရရှိသည်။
ဖြစ်စဉ်မှာ အောက်တိုဘာ ၃၁ရက် လားရှိုး အမှတ်(၅) ရပ်ကွက်၊ တွင် အသက် ၃၀ အရွယ်ရှိ ကိုသက် သည် ဓားထိုးဒဏ်ရာဖြင့် သေဆုံးနေကြောင်း၊ သေဆုံးသူသည် မူးယစ်ဆေး သုံးစွဲသူဟု ယူဆရကြောင်း သျှမ်းလူငယ်အဖွဲ့ (TYO) မှ စိုင်းဟန် က သျှမ်းသံတော်ဆင့် သို့ပြောသည်။
“ ကျနော်အထင် မူးယစ်ဆေးကြောင့်ပဲ။ ဘာလို့ လဲဆိုတော့ ရပ်ကွက် (၅) မှာ မူးယစ်ဆေးသုံးတဲ့သူများတယ်။ မူးယစ်ဆေး သုံးသူအချင်းချင်း ဖြစ်တယ်လို့ ထင်ပါတယ် ” ဟု စိုင်းဟန် က ပြောသည်။
အဆိုပါ သေဆုံးသူ သည် ခါးနှင့် ဝဲပေါင် တွင် ထိုးသွင်းဒဏ်ရာ ရကြောင်း သိရသည်။
လက်ရှိမှာ ဓားထိုးခံရသည့် ကိုသက် နှင့် ပတ်သက်ပြီး လားရှိုးမြို့ မန်မိုင်း တောင်ကုန် မိအယ်(ခ) ဝဏ္ဏစံ ကို လားရှိုးမြို့ မရဲစခန်း မှ (ပ) ၄၅၃/ ၂၀၁၉ ရာဇသတ်ကြီး ပုဒ်မ ၃၀၂ ဖြင့် အမှုဖွင့် ကာ ဖမ်းဆီးထားကြောင်း လားရှိုးမြို့ မရဲစခန်းမှ စုံစမ်းသိရသည်။
လားရှိုးမြို့ ပေါ်တွင် မူးယစ်ဆေးဝါး အလွယ်တကူ ရရှိကာ မကြာခဏ ဒုစရိုက်မှု ဖြစ်ပွားကြောင်း လည်း လားရှိုး ဒေသခံများက ပြောသည်။
ယခုနှစ် ဇူလိုင် ၈ ရက်တွင်လည်း အမှတ်(၆) ရွှေလီရပ်ကွက် တွင် အရက်မူးပြီး လမ်းသွားလမ်းလာများအား ဓားကိုင် ကာ ရမ်းကားဆဲဆိုသည့် အမျိုးသား သည် ရပ်ကွက် အုပ်ချုပ်ရေးမှူး ကို ဓားရှည်ဖြင့် ခုတ်ခဲ့ကြောင်း သိရသည်။
