သျှမ်းပြည်နယ် မြောက်ပိုင်း ကျောက်မဲမြို့ DENKO စက်သုံးဆီ ဆိုင်တွင် လက်လုပ်မိုင်း အတု ဖြင့် ခြိမ်းခြောက်ခံရကြောင်း သတင်းရရှိသည်။
ယနေ့ အောက်တိုဘာ ၂၁ ရက် မနက်ပိုင်းတွင် ကျောက်မဲမြို့အဝင် ပြည်ထောင်စု လမ်းမကြီးဘေးရှိ DENKO စက်သုံးဆီဆိုင်တွင် လက်လုပ်မိုင်းအတုဖြင့်ခြိမ်းခြောက်ကာ ငွေကျပ် (၁၀) သိန်းတောင်းခံရန်ကြိုးစားခဲ့ကြောင်း စိုင်းထွန်း ပြောသည်။
“ ကျနော်သိရသလောက်တော့ မနက် မှာ သန့်ရှင်းရေးလုပ်တဲ့ သူက အဲ့စာကို မြင်လိုက်တာ။ အိမ်သာထဲမှာ မိုင်းထောင်ထားတယ်။ ခလုတ်တချက်နှိပ်ရင် မိုင်းပေါက်မယ်။ တောင်းတဲ့ငွေလာပေးပါ ဆိုတဲ့စာပါ” ဟု စိုင်းထွန်း က ပြောသည်။
လက်ရှိ အချိန်မှာ အဆိုပါ ခြိမ်းခြောက်စာကို မည်သူက လာရောက်ချထားပြီး လက်လုပ်မိုင်း အတုကို မည်သည့်အဖွဲ့က လာထောင်သည်ကို စုံစမ်းနေဆဲ ဖြစ်ကြောင်း ကျောက်မဲမြို့ ရဲစခန်း မှ တာဝန်ရှိသူတဦး က ပြောသည်။
“ ဗုံးက အန္တရာယ်မရှိဘူး။ လက်လုပ်ဗုံးအတု ပါ” ဟုအဆိုပါ တာဝန်ရှိသူက ဆိုပြန်သည်။
အောက်တိုဘာ ၂၁ ရက်နေ့ တွင် လားရှိုးမြို့နယ် ခေးနင်း ဘုန်းကြီးကျောင်း ကျောင်းထိုင် ဆရာတော် တပါးကို အမည်မသိ လက်နက်ကိုင် ၂ ဦး က ဆိုင်ကယ်ဖြင့် ဝင်ရောက် ပစ်ခတ်ပြီး၊ ဆရာတော် ပွဲချင်းပြီး ပျံလွန်တော်မူခဲ့ကြောင်း သိရသည်။
ထို့ပြင် ယမန်နေ့ ညတွင်လည်း သျှမ်းပြည်နယ်မြောက်ပိုင်း သျှမ်းလူ့အခွင့်အရေး တက်ကြွလှုပ်ရှားသူများ၏ လူမှုကွန်ရက် ( facebook) တွင် ခြိမ်းခြောက်ခံရကြောင်း သိရသည်။