သျှမ်းပြည် မြောက်ပိုင်း မြန်မာ- တရုတ်နယ်စပ် နမ့်ခမ်းမြို့ နယ် အတွင်း တရုတ်နိုင်ငံသား ၄ဦး တရားမဝင် ကျူးကျော် မြေတူးမှု ပြုလုပ်နေကြောင်း သတင်းရရှိသည်။
ဖြစ်စဉ်မှာ အောက်တိုဘာ ၉ ရက်နေ့က တရုတ်နိုင်ငံသား ၄ ဦးသည် နမ့်ခမ်းမြို့နယ် နယ်စပ် နောင်ခမ်းကျေးရွာဘက်သို့ ပေ ၆၀ ခန့် ကျူးကျော်ကာမြေတူးစက်ဖြင့် မြောင်းများလာရောက် တူးဖော်ခဲ့ကြောင်း၊ ထိုးကျူးကျော်ပြုလုပ်နေသည့် ကိစ္စများကို ဗဟို အစိုးရ အနေဖြင့် ကွင်းဆင်းကြည့်ရှုပေးစေလိုကြောင်း နမ့်ခမ်းမြို့နေ မြို့မိမြို့ဖ၊ ပါတီနှင့်လူမှုရေးအသင်းများ စုပေါင်းပြီး သဘောထားကြေငြာချက်တစောင်ထုတ်ပြန်လိုက်သည်။
၎င်းနှင့်ပတ်သက်ပြီး နမ့်ခမ်းမြို့ လူမှုညီညွတ်ရေး အသင်း မှ ဦးစိုင်းအောင်ဝင်း က “ အောက်တိုဘာ ၉ ရက် ညနေပိုင်းမှာ အရပ်ဝတ် တရုတ်နိုင်ငံသား ၄ ဦး က မြေတူးစက်နဲ့ နောင်ခမ်း ကျေးရွာ ဝင်လာပြီး မြောင်းဖော်တယ်။ တညလုံး အလုပ်လုပ်တယ်” ဟု က သျှမ်းသံတော်ဆင့် သို့ ပြောသည်။
မြန်မာဘက်ခြမ်းသို့ တရုတ်နိုင်ငံသား ကျူးကျော်ဝင်ပြီး မြေတူးသည့်သတင်း ကြားကြားချင်း နမ့်ခမ်းမြို့နယ် အုပ်ချုပ်ရေးမှူး မှ သွားရောက် ကြည့်ရှု့ပြီး၊ တရုတ်ပြည် ရွှေလီမြို့ပြည်ပ ဆက်ဆံရေး ရုံးသို့ အကြောင်းကြားထားကြောင်း သိရသည်။
နှစ်နိုင်ငံ နယ်နိမိတ် ပြဿနာသည် အလွန်အရေးကြီး သည့်အလျောက် မြန်မာ-တရုတ်နယ်စပ် ရွှေလီချိုင့်ဝှမ်း တလျှောက်တွင်လည်း မကြာခဏ ဖြစ်ပွားလေ့ရှိရာ သက်ဆိုင်ရာ ဗဟိုအစိုးရ အဖွဲ့ မှ ကွင်းဆင်းကာ ကိုင်တွယ် ဖြေရှင်း ပေးရန် နမ့်ခမ်းမြို့နယ်အသင်း ၅ သင်းက တောင်းဆိုလိုက်သည်။
ကြေငြာချက်ထုတ်ပြန်သော နမ့်ခမ်းမြို့ အသင်း ၅ သင်းမှာ နမ့်ခမ်းမြို့မိ မြို့ဖ များ၊ သျှမ်းတိုင်းရင်းသားများ ဒီမိုကရက်တစ်ပါတီ(SNDP) ကျားဖြူ၊ နမ့်ခမ်းမြို့နယ် တောင်သူလယ်သမားများအသင်း၊ လူမှု ညီညွတ်ရေး အသင်း ၊ ရှေးဟောင်းအမွေအနှစ် နှင့် သမိုင်းဝင် နေရာများ ထိန်းသိမ်းကာကွယ်စောင့်ရှောက်ရေး အသင်းတို့ ဖြစ်သည်။
ထို ထုတ်ပြန်ချက် ထုတ်ရခြင်းသည် နောက်နောင်တွင် တရုတ်နိုင်ငံသားများ မြန်မာပိုင်နက်တွင်းသို့ လာရောက် မကျူးကျော်ရန် ဖြစ်သည်ဟု ဆိုပါသည်။
“ တရုတ်တွေ ဘာကြောင့်လာလည်းဆိုတာ မသိဘူး။ ကျနော်ကတော့ နယ်ကျူးတယ်လို့ပဲ မြင်တယ်။ ကျနော်တို့ကတော့ ၁လက်မ ကျူးကျော်မခံရအောင် ကာကွယ်တဲ့သဘောပါပဲ” ဟု ဦးစိုင်းအောင်ဝင်း က ပြောသည်။
လွန်ခဲ့သည့် ၂၀၁၄ ကလည်း နမ့်ခမ်းမြို့နယ် ကုန်းဆာ ကျေးရွာ နယ်မြေတွင်လည်း တရုတ်နိုင်ငံသားများ တကြိမ် လာရောက် ကျူးကျော်ခဲ့ဖူးကြောင်း၊ ယခုနှစ် အတွင်း မူဆယ်မြို့ဆင်ဖြူဂိတ်အနီးတွင်တကြိမ်နှင့် ကြူကုတ်( ပန်ဆိုင်း) တွင် တကြိမ် ကျူးကျော်မှု ပြုလုပ်ခဲ့ကြောင်းသိရသည်။
တရုတ်နိုင်ငံသား ၄ ဦး နမ့်ခမ်းမြို့နယ် နောင်ခမ်း ကျေးရွာ ဘက် ကျူးကျော် မြေတူးသည့် ကိစ္စနှင့်ပတ်သက်ပြီး နမ့်ခမ်းမြို့နယ် အုပ်ချုပ်ရေးမှူး ဦးထွန်းသိန်းအောင်ထံ သျှမ်းသံတော်ဆင့် မှ ဖုန်းဆက်သွယ်မေးမြန်းရာ ဖုန်းလက်ခံခဲ့သော်လည်း ဖုန်းလိုင်းမကောင်းဟုဆိုကာ စကားပြောခွင့်မရခဲ့ပေ။
Leave a Comments