သျှမ်းပြည်နယ်မြောက်ပိုင်း ကွတ်ခိုင်မြို့နယ် အတွင်း အစိုးရတပ်မတော်နှင့် တအာင်း(ပလောင်) အမျိုးသား လွတ် မြောက်ရေး တပ်မတော် TNLA တို့တိုက်ပွဲဖြစ်ပွားခဲ့ကြောင်း သတင်းရရှိသည်။
အောက်တိုဘာ ၁၆ ရက် မနက် ၆ နာရီက ကွတ်ခိုင်မြို့နယ် မန်စွပ်ရွာ နှင့် နောင်ပိုက်ရွာကြား တိုက်ပွဲဖြစ်ပွားရာ TNLA တပ်သား တဦး ကျဆုံးကာ၊ တဦးဒဏ်ရာရရှိခဲ့ကြောင်း နှင့် အစိုးရတပ်မတော် ဖက်မှ ၃ ဦး ကျဆုံး တဦး ဒဏ်ရာရရှိကြောင်း TNLA သတင်းထုတ်ပြန်ချက် အရ သိရသည်။
“ မနက် ကသေနတ်သံရော၊ လက်နက်ကြီးသံရော ပါပဲ။ ဒေသခံတွေကတော့ ကြောက်နေရတယ်။ ကွတ်ခိုင်မြို့ထဲမဟုတ်ပေမယ့် အသံက ကျယ်တော့ ဗုံးခိုကျင်းထဲ မှာ သွားနေနေရတယ်” ဟု ကွတ်ခိုင်ဒေသခံ ဒေါ်လွယ်ညွယ်က သျှမ်းသံတော်ဆင့် သို့ပြောသည်။
တိုက်ပွဲဖြစ်ပွါးသောနေရာသည် ကွတ်ခိုင်မြို့နှင့် လွန်စွာနီးကပ်ကြောင်း၊ ကွတ်ခိုင် အခြေစိုက် မြန်မာ့ တပ်မတော် ဘက်မှ လက်နက်ကြီးဖြင့် ပစ်ကူမှုများရှိကြောင်း လည်း ဒေါ်လွယ်ညွယ်က ပြောသည်။
“ အခုတော့ ငြိမ်နေတယ်။ ဒါပေမယ့် ဒေသခံတွေကတော့ စိုးရိမ်မှုနဲ့နေနေရတယ်။ စျေးဆိုင်တွေလည်း ပိတ်ထားကြတယ်” ဟု ဒေါ်လွယ်ညွယ်က ဆိုသည်။
ယနေ့မနက် TNLA နှင့် အစိုးရတပ်မတော်တို့တိုက်ပွဲသည် မနက်ပိုင်း ၆ နာရီ ကျော်မှ ရ နာရီခွဲခန့်အထိ ကြာမြင့်ကြောင်းသိရသည်။
ယခုလ ၉ ရက်နေ့ကလည်း အစိုးရတပ်မတော်နှင့် TNLA တို့သည် သိန္နီမြို့လယ်ခေါင်တွင် တိုက်ပွဲဖြစ်ပွားရာ အရပ်သား ၇ ဦး ဒဏ်ရာရရှိခဲ့ပြီး ၊ သြဂုတ်လ ၃၁ ရက်နေ့ကလည်း ကွတ်ခိုင်မြို့နယ်အတွင်း တိုက်ပွဲဖြစ်ပွားကာ အမျိုးသမီး နှင့် လသားကလေး အပါအဝင် ၅ ဦး သေဆုံးခဲ့သည်။
Leave a Comments