သျှမ်းပြည်နယ် မြောက်ပိုင်းလားရှိုးမြို့နယ် အတွင်း ယခုရက်ပိုင်း အုပ်စုဖွဲ့ လုယက်မှုများသောင်းကျန်းနေသဖြင့် ဒေသခံများ စိုးရိမ် ထိတ်လန့်မှုဖြင့် သွားလာနေရကြောင်း သိရသည်။

လားရှိုးမြို့တွင် စက်တင်ဘာ လနှင့် အောက်တိုဘာ လဆန်းအတွင်း အုပ်စုဖွဲ့ လုယက်မှု၊ ဓါးပြ တိုက် မှုများ သောင်းကျန်းနေကြောင်း၊ ထိုအုပ်စုဖွဲ့ လုယက်မှု သက်ဆိုင်ရာ ရဲတပ်ဖွဲ့ မှ အမြန်ဆုံး ရှင်းလင်းပေးရန် လားရှိုးဒေသခံ တဦးဖြစ်သည့် ကိုနေမျိုး က သျှမ်းသံတော်ဆင့် သို့ပြောသည်။

“ အခုနောက်ပိုင်း နေ့တိုင်းနီးပါး ဖုန်း ၊ ပိုက်ဆံအိတ်တွေ လုယက်ခံရတယ်။ အိမ်ထဲထိ ဝင်ခိုးတယ်။ ဖောက်ထွင်းတယ်။ အုပ်စုလိုက် ကျူးလွန်နေတာပါ။ မဖမ်းမိဘူး” ဟု ကိုနေမျိုး က ဆိုသည်။

အုပ်စုဖွဲ့ ခိုးယူလုယက်သူများသည် ယခုနောက်ပိုင်း နေအိမ်အုတ်တံတိုင်းကို ကျော်ကာ ဆိုင်ကယ်များကို လူအုပ်ဖြင့် ထမ်းထုတ်ခိုးယူသည်အထိရှိနေကြောင်းလည်း ကိုနေမျိုး က ပြောသည်။

လွန်ခဲ့သည့် တပတ်ကလည်း  ကမ္ဘောဇဘဏ် သို့ ငွေလာထုတ်သည့် ပညာရေး ကောလိပ် ဆရာမ ၂ ဦး လည်း ငွေလုယက်ခံခဲ့ပြီး လုယက်သွား သူများကို ခုချိန်အထိ စုံစမ်းနေဆဲကြောင်း ၊  ညပိုင်းလမ်းသွားလမ်းလာများထံမှလည်း ဓါးထောက်ပြီး ဖုန်းနှင့် ပိုက်ဆံအိတ်များဓါးပြတိုက်ခဲ့သည်လည်းရှိကြောင်း  သိရသည်။

“ နေ့တိုင်း ဖြစ်ပေမယ့် တရားခံတွေကတော့ မှ ရဲတွေဖမ်းမိတာ မရှိဘူး။ လုံခြုံရေးကတော့ ကိုယ့်ဘာသာကိုယ်ယူနေရတဲ့ အဆင့်ပါပဲ။ ရဲတိုင်ရင်လည်း ထူးမှ မထူးတာ” ဟု လားရှိုး ဒေသခံ စိုင်းလှ က ပြောသည်။

လားရှိုးမြို့ ပေါ်တွင် တရားမဝင် ဂိမ်းဆိုင်များ၊ မူးယစ်ဆေးများ အလွယ်တကူ ဝယ်ယူသုံးစွဲနိုင်ပြီး ထို အုပ်စုဖွဲ့ လုယက်သူများသည် မူးယစ်သားကောင်များ ဖြစ်နိုင်ကြောင်းလည်း စိုင်းလှ က မှတ်ချက်ပြုသည်။

တချို့ နေအိမ် အိမ်စီးကားများ၊ ဆိုင်ကယ်များပါ ခိုးခံရကြောင်း၊ ထိုခိုးခံရသည် ကို သွားရောက်တိုင်ကြားသော်လည်း တရားခံ မဖမ်းမိကြောင်းလည်း သိရသည်။

“ တချို့ကတော့ ကား၊ဆိုင်ကယ် က လိုင်စင်မရှိလို့ ခိုးခံရလည်း ငြိမ်ခံနေရတယ်။ တချို့ ကား၊ဆိုင်ကယ်ကတော့ လိုင်စင်ရှိတယ် ဒါပေမယ့် တိုင်လည်း ခိုးတဲ့သူကို ဖမ်းမမိပါဘူး” ဟု စိုင်းလှ က ထပ်လောင်းပြောသည်။

ထို အုပ်စုဖွဲ့ လုယက်မှု၊ ခိုးမှုများကို သက်ဆိုင်ရာ က အမြန်ဆုံး ရှင်းလင်းပေးရန်၊ ဖမ်းဆီးပေးရန်လည်းလားရှိုးဒေသခံများ က ပြောဆိုလိုက်သည်။

သျှမ်းပြည်နယ် မြောက်ပိုင်း လားရှိုးမြို့ ပြည်သူများသည် တိုင်းရင်းသားလက်နက်ကိုင်တပ်ဖွဲ့ နှင့် မြန်မာ့ တပ်မတော် တိုက်ပွဲဖြစ်ပွားမည်ကို ကြောက်နေရသလို၊ တဖက်မှာလည်း ခိုးလုယက်မှုကို စိုးရိမ်ထိတ်လန့်နေရသည်။

“ ဒီမှာက အရာရာကို ကြောက်နေရတယ်။ ဘာမှ မလုံခြုံဘူး ခံစားရတယ်။ တိုက်ပွဲဖြစ်လိုက်၊ ခိုးလုယက်ဖြစ်လိုက်ပါပဲ။ ဘယ်သူ့ကို အားကိုးရမှန်းမသိဘူး” ဟု စိုင်းလှ က ထပ်လောင်းဖြည့်စွတ်ပြောသည်။

လားရှိုးမြို့နယ် ရဲတပ်ဖွဲ့ များအနေဖြင့် ဒေသခံများ လုံခြုံမှုရှိကြောင်း ခိုးမှု လုယက်မှု ကင်းအောင် ဆောင်ရွက်ပေးရန်လည်း ဒေသခံများက ပြောဆိုလိုက်သည်။

ထို လားရှိုး မြို့ လုံခြုံရေး နှင့်ပတ်သက်ပြီး လားရှိုးမြို့မ ရဲစခန်းမှ တာဝန်ရှိသူ က “ ကျနော်တို့ လုံခြုံရေး တွေ ကင်းလှည့်နေပါတယ်။ ခိုးမှုတွေ လုယက်မှုတွေ ကိုလည်း ဖမ်းဆီး အရေးယူတာတွေရှိပါတယ်” လို့ သျှမ်းသံတော်ဆင့် သို့ ပြောသည်။