သျှမ်းပြည်မြောက်ပိုင်း ဟိုပန်မြို့နယ် ကောင်းဟုန်းရပ်ကွက်တွင် လင်မယား အခြေအတင် စကားများကြရာမှ ဇနီးနှင့်ယောက္ခမ များကို လင်ယောက်ျားဖြစ်သူက သေနတ်ဖြင့် ပစ်ခတ်ကြောင်း သတင်းရရှိသည်။
စက်တင်ဘာ ၂၃ ရက်နေ့ ညနေပိုင်းတွင် စိုင်းသိန်းအောင်နှင့် နန်းခမ်းအောင် တို့လင်မယားသည် အချင်းချင်း စကားများရာ ဇနီးဖြစ်သူနှင့် ဇနီး၏မိဘ၂ ဦးကို သေနတ်ဖြင့် ပစ်ခတ်ခဲ့ပြီး စိုင်းသိန်းအောင်မှာ ထွက်ပြေးသွားခဲ့ကြောင်း သိရသည်။
စက်တင်ဘာ ၂၄ ရက် ညနေပိုင်းတွင် စိုင်းသိန်းအောင်၏ ရုပ်အလောင်းကို နောင်ဟတ်ဟိုင်း အနီးတွင် သေနတ်ဒဏ်ရာဖြင့် သေဆုံးနေသည် ကို တွေ့ရှိကြောင်း ဟိုပန်မြို့နယ် ဒေသခံ စိုင်းထွန်းလုံ က သျှမ်းသံတော်ဆင့်သို့ပြောသည်။
သေနတ်ပစ်ခံရသည့် နန်းခမ်းအောင်သည် ဘယ်ရင်အုံဘေး၊ ဘယ်လက်မောင်း၊ ခါး တို့တွင်ထိမှန်ပြီး အဖေဖြစ်သူ ဦးဆန်ရီ မှာ ဘယ်တံတောင်ဆစ် တချက် နှင့် အမေဖြစ်သူ ဒေါ်အေးဆင်း မှာ ဘယ်ရင်အုံ တချက်၊ ဘယ်လက်ကောက်ဝတ်တွင်တချက်ထိမှန်ဒဏ်ရာရခဲ့ကြောင်း စိုင်းထွန်းလုံ က ပြောသည်။
“ အဖေနဲ့ အမေကတော့ သက်သာတယ်။ သမီးကတော့ အာရုံကြောထိသွားလို့ အောက်ပိုင်းသေချင် သလိုဖြစ်နေတယ်။ ခုမန္တလေး ကိုသွားခိုင်းတယ်။ ပစ်တဲ့ သူကတော့ မနေ့ညနေပိုင်းက ကိုယ့်ကိုယ်ကိုပြန်ပစ်သတ်ပြီး သေဆုံးသွားတယ်” ဟု စိုင်းထွန်းလုံ က ဆိုသည်။
ပစ်ခတ်ခံရမှုကြောင့် ဒဏ်ရာရရှိသည့် မိသားစုများကို လားရှိုးပြည်သူ့ဆေးရုံသို့ ပို့ဆောင်ကာ ဆေးကုသ နေရပြီး မိဘ ၂ ဦးမှာ ဒဏ်ရာ မစိုးရိမ်ရသော်လည်း နန်းခမ်းအောင် ၏ ဒဏ်ရာများသည် စိုးရိမ်နေ ရကြောင်း သိရသည်။
အဆိုပါ ကိစ္စနှင့် ပတ်သက်ပြီး ဟိုပန် မြို့မရဲစခန်းမှ ရာဇသတ်ကြီး ပုဒ်မ ၃၀၇/ ၃၀၉ အရ အမှုဖွင့်ကာ အသေးစိတ်ကို စုံစမ်းနေကြောင်း သိရသည်။
