စစ်ရေးပဋိပက္ခ ရပ်တန့်ရန် ကြိုးပမ်းရာတွင် စစ်ကြောင့် ထိခိုက်၊နစ်နာ ဆုံးရှုံးမှုများရင်ဆိုင်ခဲ့ရသည့် အမျိုးသမီးအကြောင်း ထည့်သွင်းဆွေးနွေးမှုမှာ အားနည်းနေကြောင်း သိရသည်။
ပြည်တွင်းစစ် တိုက်ပွဲ များတွင် ပါဝင်သည့် ခေါင်းဆောင်များသည် အမျိုးသားများဖြစ်ကြပြီး၊ စစ်ပဋိပက္ခ များရပ်တန့်ဖို့ ကြိုးပမ်းနေမှုများ ညှိနှိုင်း ဆွေးနွေးမှုများမှာလည်း ထိုအမျိုးသား များသာဖြစ်သဖြင့် စစ်ရေးကြောင့် ထိခိုက်၊ နစ်နာ ဆုံးရှုံးသည့် အမျိုးသမီးများအကြောင်းကို ထည့်သွင်း ဆွေးနွေးခြင်း နည်းပါးသည်ဟု အမျိုးသမီးများ အဖွဲ့ချုပ် (မြန်မာနိုင်ငံ) က ပြောဆိုလိုက်သည်။
ယနေ့ စက်တင်ဘာ ၂၀ ရက်နေ့ က “ငြိမ်းချမ်းရေးအတွက် အမျိုးသမီးများ” ဖိုရမ်ကို “ ငြိမ်းချမ်းရေး အတွက် အတူတကွ- အားလုံးအတွက် လုံခြုံရေး” ဆောင်ပုဒ်ဖြင့် ရန်ကုန်မြို့ ကျင်းပရာတွင် အမျိုးသမီးများ အဖွဲ့ချုပ်(မြန်မာနိုင်ငံ) မှ အတွင်းရေးမှူး နော်ဆဲဆဲ က ပြောကြားခဲ့သည်။
ထို ဖိုရမ် ပြုလုပ်ရသည့် ရည်ရွယ်ချက်မှာ ပြည်တွင်းစစ် ရပ်တန့်ရေး၊ အမျိုးသမီးများအပေါ် လိင်ပိုင်းဆိုင်ရာ အကြမ်းဖက်မှု များအားလုံးရပ်တန့်ရေး နှင့်ငြိမ်းချမ်းရေး တည်ဆောက်ရေး လုပ်ငန်းစဉ်များတွင် အမျိုးသမီးများပိုမို ပါဝင်လာနိုင်အောင် စည်းရုံးလှုံ့ဆော်သွားမည် ဟုလည်း နော်ဆဲဆဲက ပြောသည်။
ထို့ပြင် အမျိုးသမီးများ ကိုယ်စွမ်း၊ ဉာဏ်စွမ်း ဖြင့် အမျိုးသမီး လှုပ်ရှားမှု ပိုမိုများလာပြီး ငြိမ်းချမ်းရေး အတွက် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး ပိုမိုပါဝင်လာနိုင်ရန်၊ ကျား၊ မ တန်းတူညီမျှရေး အပြန်အလှန် ဖလှယ်ဆွေးနွေးပြီး တန်းတူညီမျှရေးဖော်ဆောင်ရာတွင် ထိရောက်သည့်နည်းလမ်းများရှာဖွေနိုင်ရန်တို့ဖြစ်သည်။
မြန်မာနိုင်ငံတွင်နေထိုင်သည့် အမျိုးသမီး ထု အားလုံးအတွက် လုံခြုံဘေးကင်းသည့် လူမှုအသိုင်းအဝန်း တရပ်တည်ဆောက်ရေး လုပ်ငန်းတွင်း အထောက်အကူပြုစေမည့် ရလဒ်များ၊မူဝါဒရေးရာ အကြံပြုချက်များရရှိလာမည် ဟု အမျိုးသမီးများအဖွဲ့ချုပ်(မြန်မာနိုင်ငံ) နော်ဆဲဆဲ က ပြောသည်။
အမျိုးသမီးလှုပ်ရှားမှုကြီးသည် ပိုမို ခိုင်မာကျယ်ပြန့်လာပြီး ပြည်တွင်းစစ်ရပ်တံ့ရေး၊ စစ်မှန်သည့် ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးနှင့်ကျား၊မ တန်းတူရေးမှတဆင့် နှစ်ရှည်လ များလိုလာတောင့်တ သည့် ပြည်တွင်း ငြိမ်းချမ်းရေး ကို တည်ဆောက်နိုင်မည်ဟု နော်ဆဲဆဲက ထပ်လောင်းပြောသည်။
စစ်ပဋိပက္ခ အတွင်း မှ အမျိုးသမီးများအတွက် ကမ္ဘာ့ကုလသမဂ္ဂ လုံခြုံရေးကောင်စီ ဆုံးဖြတ်ချက် အမှတ် ၁၃၂၅ နှင့် ၁၈၂၀ ကို ချမှတ်ခဲ့ကြသည်။
ထိုဆုံးဖြတ်ချက်ကို နိုင်ငံတော် ဆင့် စီမံဆောင်ရွက်မှု National Action Plan ချ မှတ်အကောင်အထည်ဖော်ဆောင်ရွက်ကြသည်။
ငြိမ်းချမ်းရေး အတွက် အမျိုးသမီးများ ဖိုရမ် မှသည် အားလုံးအတွက် လုံခြုံဘေးကင်းရေး များရရှိစေရန် အတူတကွ ဝိုင်းဝန်း ကြိုးပမ်းသွားကြရန် လည်း အမျိုးသမီးများ အဖွဲ့ချုပ်(မြန်မာနိုင်ငံ) က တိုက်တွန်းပြောဆိုလိုက်သည်။
၂၀၁၉ ခုနှစ် ငြိမ်းချမ်းရေးအတွက် အမျိုးသမီးများဖိုရမ်ကို မြန်မာနိုင်ငံ ဒေသအသီးသီး နှင့် အဖွဲ့အစည်းအသီးသီးတို့မှ စုစုပေါင်း ၃၀၀ ကျော်တက်ရောက်ခဲ့သည်။
တက်ရောက်လာသော ခေါင်းဆောင်များမှ အမျိုးသမီးငြိမ်းချမ်းရေး၊ လုံခြုံရေး နှင့် စပ်လျဉ်းပြီး ရင်ဆိုင်ကြုံတွေ့နေရသော အခက်အခဲ နှင့် စိန်ခေါ်မှုများ၊ အမျိုးသမီး ငြိမ်းချမ်းရေး နှင့် လုံခြုံရေးဆိုင်ရာ လုပ်ငန်းများ စသည့်ခေါင်းစဉ်များကို အုပ်စုငယ်လိုက်ဖွဲ့ပြီး ဆွေးနွေးခဲ့ကြကြောင်း သိရသည်။
အမျိုးသမီးများအဖွဲ့ချုပ် (မြန်မာနိုင်ငံ)သည် အမျိုးသမီး အဖွဲ့အစည်း ၁၃ဖွဲ့ ဖွဲ့စည်းထားသည့် အဖွဲ့တခုဖြစ်သည်။
