သျှမ်းပြည်နယ် မြောက်ပိုင်း တရုတ် မြန်မာ နယ်စပ် မူဆယ်မြို့ တွင် “ ပြည့်တန်ဆာ လုပ်ရန်” အလုပ်ခေါ်စာလိုက်ကပ်နေသူများအား အာဏာပိုင်များဖမ်းဆီးကာ ပြင်းထန်သည့် ပြစ်ဒဏ်ပေးရန် စိစစ်လုပ်ဆောင်နေကြောင်း သတင်းရရှိသည်။
စက်တင်ဘာ ၁၄ ရက် မနက် ပိုင်းက မူဆယ်မြို့ လူစည်ကားရာအရပ် ဈေးအနီး မီးပွိုင့်တွင် “ မူဆယ်မြို့တွင်း ပြည့်တန်ဆာလုပ်ရန်” နှင့် ဆက်သွယ်ရန် ဖုန်းနံပတ်ပါသည့်ကြော်ငြာ စာရွက်များ လိုက်လံကပ်နေသည့် အသက် ၃၀ ဝန်းကျင် ရှိ အမျိုးသမီး ၂ ဦး နှင့် အမျိုးသား ၃ ဦးတို့အား ရဲများဖမ်းဆီးထားကြောင်း သျှမ်းပြည်နယ် ရဲတပ်ဖွဲ့မှူး ရဲမှူးချုပ် ဇော်ခင်အောင် က သျှမ်းသံတော်ဆင့် သို့ ပြောသည်။
“ ကျနော်တို့ CCTV ကနေ အမျိုးသမီး ၂ ဦး အမျိုသား ၃ ဦးဖမ်းထားပါတယ်။ ပြည့်တန်ဆာ နှိပ်ကွပ်ရေး ဥပဒေ နဲ့ ဖွင့်ထားတယ်။ အဲ့ထက် ပြင်းတဲ့အမှု နဲ့ အရေးယူလို့ရအောင် ဥပဒေပညာရှင်တွေနဲ့ တိုင်ပင်နေပါတယ်” ဟု ရဲမှူးချုပ် ဇော်ခင်အောင် က ဆိုသည်။
ထိုသို့ကြော်ငြာစာရွက်လာကပ်ခြင်းသည် မြန်မာနိုင်ငံ ကို သိက္ခာကျအောင် ပြုလုပ်ခြင်းဖြစ်ကြောင်း၊ ထိုသူများကို ထိရောက်စွာအရေးယူရန် အတွက် အစိုးရ နှင့် သက်ဆိုင်ရာ အဖွဲ့အစည်းများကိုလည်း ညွှန်ကြားထားကြောင်း ရဲမှူးချုပ်ဇော်ခင်အောင် က ပြောသည်။
“ ဒီလို ကြေညာကပ်တာကို အမြဲ စောင့်ကြည့်ဖို့ ကခက်တယ်။ ထိရောက်စွာအရေးယူဖို့ အတွက် အစိုးရကိုလည်း တင်ပြထားတယ်။ သက်ဆိုင်ရာ လူကုန်ကူး တားဆီးရေး အဖွဲ့ နယ်မြေ ရဲတပ်ဖွဲတွေ ကို ကြပ်မတ်လုပ်ဖို့ ညွန်ကြားထားတယ်” ဟု ရဲမှူးချုပ် က ထပ်လောင်း ပြောသည်။
အဆိုပါ ဖမ်းဆီးထားသော ကြော်ငြာစာရွက်လိုက်လံကပ်နေသူ ၅ ဦးသည် တရုတ်နာမည်များဖြစ်နေပြီး၊ မည်သည့် နိုင်ငံသား ခံယူထားသည်ကို စိစစ်နေဆဲဖြစ်သည်ဟု လည်း သိရသည်။
မူဆယ်မြို့လူသွားများသည့် လမ်းမပေါ် ထိုကဲ့သို့ကြော်ညာ လာကပ်ခြင်းသည် မူဆယ်မြို့တွင်နေထိုင်သည့် အမျိုးသမီးများ အတွက် စိုးရိမ်ထိတ်လန့်စရာ ကိစ္စရပ်တခုဖြစ်သည် ဟု ဒေသခံများကလည်း ပြောဆိုလိုက်သည်။
“ မူဆယ်မြို့ ပြည်သူတွေ ကို စော်ကား သွားတဲ့ ကြော်ညာစာပါ။ နောက် အမျိုးသမီးတွေအတွက်လည်း စိုးရိမ်စရာ ကိစ္စတွေဖြစ်လာတယ်။ ပြည့်တန်ဆာကို ပေါ်တင် ခေါ်လို့ရတယ်ဆိုတဲ့ ပုံစံမျိုးလုပ်သွားတာ” ဟု မူဆယ် မြောက်ရပ်ကွက် နန်းစံ က သျှမ်းသံတော်ဆင့် သို့ပြောသည်။
လွန်ခဲ့သည့် ၂၀၁၉ ဒီဇင်ဘာ တွင်လည်း သျှမ်းပြည်နယ်မြောက်ပိုင်း တရုတ် မြန်မာနယ်စပ် မူဆယ်မြို့ မြို့လယ်ခေါင် တွင် အငှားကိုယ်ဝန် လက်ကမ်းစာစောင်ကို နေရာ အနှံ့ ကပ်ခဲ့ထားကြောင်း သိရသည်။
