မြောက်ပိုင်းမဟာမိတ် ၄ ဖွဲ့ ကို ယခုလလယ် ထပ်မံတွေ့ဆုံရန် အစိုးရ ကမ်းလှမ်း

0

မြောက်ပိုင်းမဟာမိတ် ၄ ဖွဲ့ ကို ယခုလလယ် ကျိုင်းတုံတွင် ထပ်မံ တွေ့ဆုံဆွေးနွေးရန် အစိုးရ မှ ကမ်းလှမ်းဖိတ်ကြား ထားကြောင်း သတင်းရရှိသည်။

သြဂုတ်လ ၃၁ ရက်နေ့က ကျိုင်းတုံမြို့တွင် ပြုလုပ်ကျင်းပသော မြောက်ပိုင်းမဟာမိတ်တပ်ဖွဲ့ ၄ ဖွဲ့၏ ကိုယ်စားလှယ်များနှင့် ငြိမ်းချမ်းရေးကော်မရှင်ကိုယ်စားလှယ်များတွေ့ဆုံပွဲ

ငြိမ်းချမ်းရေး ကော်မရှင် ကိုယ်စားလှယ် အဖွဲ့ နှင့် မြောက်ပိုင်းမဟာမိတ် ၄ ဖွဲ့ ဖြစ်သည့် ကချင် တပ်ဖွဲ့၊ တအာင်းတပ်ဖွဲ့၊ ကိုးကန့်တပ်ဖွဲ့ နှင့် ရခိုင်တပ်ဖွဲ့ တို့မှ ကိုယ်စားလှယ်များ ယခုလ ၁၆ နှင့် ၁၇ ရက် တို့တွင် ထပ်မံတွေ့ဆုံ ဆွေးနွေးရန် သဘောတူညီခဲ့ကြကြောင်းသိရသည်။

ထို့ကြောင့် သျှမ်းပြည်အရှေ့ပိုင်း ကျိုင်းတုံမြို့ တွင် ကျင်းပကြရန်အတွက် စက်တင်ဘာ ၉ ရက်နေ့ ရက်စွဲဖြင့် မြောက်ပိုင်းမဟာမိတ် ၄ ဖွဲ့ ကို အစိုးရဘက်မှ အဆိုပြုစာ ပေးပို့ထားကြောင်း သိရသည်။

“ ကျနော်တို့ဆီကို ဖိတ်စာရောက်လာပါတယ်။ သူတို့က ကျိုင်းတုံမှာ ပြန်တွေ့ဖို့ ပြောတယ်။ ကျနော်တို့ ဘက် ကတော့ ပန်ဆန်း၊ မိုင်းလားနဲ့ တရုတ်ပြည် တနေရာရာကို တောင်းဆိုထားပါတယ်။ ဘယ်နေရာ ဆိုတာတော့ မသိသေးဘူး။ လက်ရှိမှာလည်း ကျနော်တို့ ၄ ဖွဲ့ ဆွေးနွေးနေတုန်းပါ” ဟု တအာင်း (ပလောင်) အမျိုးသားလွတ်မြောက်ရေး တပ်မတော်(TNLA) မှ ပြောရေးဆိုခွင့်ရှိသူ တားအိုက်ကျော် က သျှမ်းသံတော်ဆင့်သို့ ပြောသည်။

ယခု ထပ်မံတွေ့မည့် တွေ့ဆုံဆွေးနွေးပွဲကို မြန်မာ့တပ်မတော် ကိုယ်စားလှယ်များပါ တက်ရောက်စေချင်ကြောင်း၊ ငြိမ်းချမ်းရေး ကော်မရှင် ကိုယ်စားလှယ်အဖွဲ့ တည်းသာ တွေ့မည်ဆိုပါက စစ်တပ်ဆိုင်ရာ ကိစ္စဆွေးနွေးရန် မဖြစ်နိုင်ကြောင်း လည်း တားအိုက်ကျော် က ဆိုသည်။

အဆိုပါဆွေးနွေးပွဲသို့ တက်ရောက်ကြမည့် မြောက်ပိုင်းမဟာမိတ်(၄)ဖွဲ့ ကိုယ်စားလှယ်များ၏ ခရီးစဉ် ဖြစ်သည့် မိုင်းလား-ကျိုင်းတုံ ယာဉ်တန်းလုံခြုံရေး၊ လမ်းကြောင်းလုံခြံုရေး နှင့် လုံခြံုရေးဆိုင်ရာ ကိစ္စရပ်များကို တာဝန်ယူမည်ဖြစ်ကြောင်းလည်း ငြိမ်းချမ်းရေး ကော်မရှင် အဖွဲ့ မှ ပြောဆိုထားသည်။

ယမန်နေ့တွင် မြောက်ပိုင်းမဟာမိတ် တပ်ဖွဲ့ ဖြစ်သည့်TNLA နှင့် မြန်မာ့တပ်မတော်သည် ယမန်နေ့ စက်တင်ဘာ ၉ ရက်နေ့တွင် သျှမ်းပြည်နယ်မြောက်ပိုင်းကွတ်ခိုင်မြို့နယ် နမ့်ဖက်လွန် အနီးတွင်တိုက်ပွဲ ၂ ကြိမ်၊ နမ့်ပန် တွင် တကြိမ် ဖြစ်ပွားခဲ့ကြောင်း သတင်းရရှိသည်။

ဢုပ်ႇဢူဝ်း ၽူႈတွႆႇႁွၵ်ႈ

SHARE