သျှမ်းပြည် တောင်ပိုင်း မြို့တော် တောင်ကြီးတွင် မိုးသည်းထန်စွာရွာသွန်းသဖြင့် မြေပြိုမှု ဖြစ်ပွားကာ လူနေအိမ်များ ပြောင်းရွှေ့လိုက်ရကြောင်း သတင်းရရှိသည်။
စက်တင်ဘာလ ၈ ရက်က မြို့မရပ်ကွက်တွင် မြေပြိုမှုကြောင့် အိမ်ထောင်စု ၉ စု၊ လူဦးရေ ၅၀ ကျော်ကို ဘုန်းကြီးကျောင်းနှင့်သက်ဆိုင်ရာ ဆွေမျိုးများ နေအိမ်သို့ရွှေ့ပြောင်းပေးရကြောင်း တောင်ကြီးမြို့ မြို့နယ် အုပ်ချုပ်ရေးမှူး ဦးဖြိုးမင်းထိုက် က သျှမ်းသံတော်ဆင့် သို့ပြောသည်။
အဆိုပါရပ်ကွက်တွင် စက်တင်ဘာလ ၃ ရက်နေ့ကတည်းက မြေစတင်ပြိုကျနေပြီး စက်တင်ဘာ ၈ ရက်နေ့တွင် မြေပြိုမှု သည် ၆ ပေ ခန့့်အနက်ရှိနေပြီ ဖြစ်ကြောင်း ၄င်းကပြောသည်။
“ ဒီနေရာ က မြေသားတွေက သာမာန်မြေတွေမဟုတ်ဘူး။ လွန်ခဲ့တဲ့ ၆ နှစ်ကျော်က ဖို့မြေတွေပါ။ အခု ပြိုတာ ပေ ၂၀၀ ပတ်ဝန်းကျင်လောက်ရှိတယ်” ဟု ဦးဖြိုးမင်းထိုက် က ဆိုသည်။
မြေပြိုမှု အတွက် ဆက်လက်ပြီး အန္တရာယ်မရှိစေရန်အတွက် မြို့နယ်၊ ရပ်ကွက် အုပ်ချုပ်ရေးမှူး နှင့် သက်ဆိုင်ရာ ဌာန ဆိုင်ရာများက ဆောင်ရွက်နေကြကြောင်း လည်း ဦးဖြိုးမင်းသိန်း က ပြောသည်။
“မြေပြိုတာကတော့ ၃ရက်နေ့မှာ မြေပြိုတယ်လို့ သတင်းရပါတယ်။ ဒါပေမယ့် ၃ရက်နေ့ ပြီးတော့ ၈ရက်နေ့မှာ မြေထပ်ပြီး ပြိုလာတယ်လို့သတင်းရလို့လာကြည့်ပါတယ်။ သက်ဆိုင်ရာ အစိုးရ ဝန်ကြီးတွေ မြို့နယ် အင်ဂျင်နီယာတွေ၊ သဘာဝပတ်ဝန်းကျင် က အဖွဲ့တွေလာပါတယ်။”
တောင်ကြီးမြို့နယ် အတွင်း မြေဆက်ပြိုနိုင်သည့် အလားအလာ ရှိသော နေရာများရှိနေသေးကြောင်း၊ထိုမြေပြိုနိုင်သည့် နေရာများတွင် အန္တရာယ် မဖြစ်ပေါ်စေရေး နှင့် ထိုအနီးနေထိုင်သူများဘေးကင်းမှုရှိအောင် စောင့်ကြည့်ဆောင်ရွက်မှုများလည်း ပြုလုပ်နေသည်ဟု သိရသည်။
“ တောင်ကြီး မှာက နှစ်စဉ် ဒီလို ဖြစ်စဉ်တွေဖြစ်ပါတယ်။ အုတ်တံတိုင်းပြိုတာ လူသွားလမ်းပြိုတာ နှစ်တိုင်းဖြစ်ပါတယ်” ဟု လည်း ဦးဖြိုးမင်းထိုက် က ထပ်လောင်းပြောသည်။
ယခု စက်တင်ဘာ ၄ ရက်နေ့တွင် မိုးသည်းထန်စွာ ရွာသွန်မှုကြောင့် အသက် ၁၇နှစ် အရွယ် အမျိုးသား တဦး ရေမြောင်းကျွံကျပြီး ရေစီးမျောပါသေဆုံးခဲ့ပြီး၊ သြဂုတ် ၁၈ ရက်တွင်လည်း ရေကြီးမှုကြောင့် အသက် ၆၀ အရွယ် အမျိုးသားတဦး နံရံပြိုကျ၍ သေဆုံးခဲ့ကြောင်း သိရသည်။
