မြန်မာ့ တပ်မတော် အနေဖြင့် အပစ်ရပ်ကာလ ၂၁ ရက် ထပ်တိုးထားသော်လည်း သျှမ်းမြောက်တွင် တိုက်ပွဲများ ဆက်လက် ဖြစ်ပွားနေသေးကြောင်း သတင်းရရှိသည်။
အမျိုးသားပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာန NRPC နှင့် မြောက်ပိုင်းမဟာမိတ် ၄ ဖွဲ့တို့ လက်ရှိ ဆွေးနွေးဆဲ အခြေအနေ ဆက်လက် ဆောင်ရွက်နိုင်ရန် တိုင်းစစ်ဌာနချုပ် နယ်မြေများ စစ်ရေး လှုပ်ရှားမှုကို စက်တင်ဘာ ၂၁ ရက်ထိ တိုးမြှင့် ရပ်ဆိုင်းလိုက်ကြောင်း တပ်မတော် ကာကွယ်ရေး ဦးစီးချုပ်ရုံး မှ သြဂုတ် ၃၁ ရက်နေ့တွင် ထုတ်ပြန်ကြေညာထားသည်။
မြန်မာ့ တပ်မတော်ဘက် မှ တဖက်သတ် စစ်ရေး လှုပ်ရှားမှု ရပ်ဆိုင်းသော်လည်း မြေပြင် အခြေအနေ အရ တိုက်ပွဲများ ဆက်လက်ပြင်းထန်ကာ ဒေသခံများ စိုးရိမ်ထိတ်လန့်မှု ဖြစ်ပွားနေကြောင်း သျှမ်းမြောက် ဒေသခံများ ပြောပြချက် အရ သိရသည်။
“ တိုက်ပွဲကတော့ ရှိနေတုန်းပါပဲ။ မနေ့ကဆိုရင် နမ့်ဖတ်ကာနဲ့ မူဆယ်အထွက် ပန်ဂျလော့ကျေးရွာ မှာ ကားဘီးကို သေနတ်နဲ့ ဖောက်ထားတယ်။ လမ်းပိတ်ထားတယ်။ ကားတွေကတော့ တိုက်ပွဲ အခြေအနေကို ကြည့်ပြီး သွားနေရတယ်” ဟု ယမန်နေ့ က တိုက်ပွဲကြားပိတ်မိနေသည့် နမ့်ဖတ်ကာ ရောက် ကားသမား တဦး ကပြောသည်။
မြန်မာ့ တပ်မတော် အနေဖြင့် တဖက်သတ်အပစ်ရပ်ကာလ ကို ၂၀၁၈ ဒီဇင်ဘာ ၂၁ ရက်နေ့မှ စတင်ကာ ယနေ့ အချိန်ကာလထိ ၈ လကြာ ရပ်ဆိုင်းခဲ့သော်လည်း သျှမ်းမြောက် ဒေသမှာ တိုက်ပွဲဖြစ်ပွားကာ ဒေသခံများ စိုးရိမ် ထိတ်လန့်မှု ဖြစ်နေသည်ဟု သျှမ်းမြောက် ဒေသခံများက ပြောဆိုသည်။
“ အရင် မြန်မာ့ တပ်မတော် အပစ်ရပ်ကာလ ၄ လ တုန်းကလည်း နေ့တိုင်း နီးပါးတိုက်ပွဲရှိနေတော့ ပြည်သူလူထုအနေနဲ့စိုးရိမ်နေမှုတွေအများကြီးရှိပါတယ်” သျှမ်းပြည်နယ် မြောက်ပိုင်း လူသားချင်းစာနာ ထောက်ထားမှု ပူးပေါင်း ဆောင်ရွက်ရေး အဖွဲ့ မှ ပြောရေး ဆိုခွင့် ရှိသူ ဦးဟောင်းဒေါင် က သျှမ်းသံတော်ဆင့် သို့ပြောသည်။
ယခင် အပစ်ရပ်ကာလ အတွင်း မကြာခဏ တိုက်ပွဲ ဖြစ်သောကြောင့် သျှမ်းမြောက် ဒေသခံများအနေ အတွက် လက်ရှိ အပစ်ရပ် ကာလ တိုးမြင့်ခြင်းသည် ထူးခြားခြင်းမရှိကြောင်း လည်း ဦးဟောင်းဒေါင် က ဆိုသည်။
အပစ်ရပ် ကာလ ၂၁ ရက် တိုးမြင့်လိုက်သည် ကြေညာထားပြီး မြေပြင်တွင် စစ်ရေး တင်းမာမှု၊ တိုက်ပွဲများဆက်လက်ဖြစ်ပွားနေသေးကြောင်း မြန်မာနိုင်ငံလုံးဆိုင်ရာ သျှမ်း လူငယ်ကွန်ရက် (TYN) မှ စိုင်းနော်ဆိုင် က သျှမ်းသံတော်ဆင့်သို့ပြောသည်။
“ ငြိမ်းချမ်းရေး ဆွေးနွေးတဲ့ သူက ဆွေးနွေးတယ်။ အောက်ခြေက ဖြစ်နေတယ်။ ဘယ်လို ပုံစံမျိုးဖြစ်နေတယ်ဆိုတာ ကျနော်တို့ နားမလည်ဘူး။ ဒီနေ့တော့ ကွတ်ခိုင်ဘက် သေနတ်သံမကြားပေမယ့်နမ့်ပေါင်ဘက်ကတော့ကြားနေရတယ်” ဟု စိုင်းနော်ဆိုင် ကဆိုသည်။
သြဂုတ် ၃၁ ရက် ကျိုင်းတုံမြို့ တွင် NRPC နှင့် မြောက်ပိုင်း မဟာမိတ် (၄) ဖွဲ့ တို့တွေ့ဆုံစဉ်တွင် သျှမ်းမြောက်ကွတ်ခိုင်တွင် တိုက်ပွဲဖြစ်ပွားကာ အရပ်သားအမျိုးသမီး နှင့် လသား ကလေးငယ် အပါအဝင် ၅ဦး သေဆုံးကာ ၃ဦး ဒဏ်ရာရခဲ့သည်။
လက်ရှိ မြန်မာ တပ်မတော် ဘက်မှ စစ်ရေးဆိုင်ရာ လှုပ်ရှားမှု ရပ်ဆိုင်း ပေးသည့် တိုင်း ၅ တိုင်းမှာ မြောက်ပိုင်းတိုင်း စစ်ဌာနချုပ်နယ်မြေ၊ အရှေ့မြောက် တိုင်း စစ်ဌာနချုပ် နယ်မြေ၊ အရှေ့ပိုင်း စစ်ဌာနချုပ် နယ်မြေ၊ အရှေ့ အလယ်ပိုင်းတိုင်းစစ်ဌာနချုပ် နယ်မြေ တို့ဖြစ်သည်။
