သျှမ်းပြည် မြောက်ပိုင်း ကွတ်ခိုင်မြို့နယ် ကာလိုင်ကျေးရွာအုပ်စု ပန်းဆေးရွာအတွင်း လက်နက်ကြီး ကျည်ကျရာ အသက် ၅၀ ၀န်းကျင်အမျိုးသားတဦး ကျည်စထိမှန် သေဆုံးခဲ့ကြောင်းသိရသည်။
သြဂုတ်လ ၂၆ ရက် ယမန်နေ့ ညနေ ရ နာရီဝန်းကျင်က ကွတ်ခိုင်မြို့နယ် ရပ်ကွက် ၅ ဘုရားကျောင်းအနီးတွင် ပစ်ခတ်မှု ဖြစ်ပွားခဲ့ပြီး ပန်းဆေးကျေးရွာ အတွင်း လက်နတ်ကြီး ကျည် ကျရာ အသက် ၅၀ ဝန်းကျင် ဦးအိုက်ငို (ခ) ကွန်းဌေးမှာ ကျည်စ ထိမှန်သေဆုံးခဲ့ကြောင်း ကွတ်ခိုင်မြို့နယ် တာအာင်း စာပေနှင့်ယဉ်ကျေးမှု ဥက္ကဌ မိုင်းအိုက်မွန်း က သျှမ်းသံတော်ဆင့် သို့ ပြောသည်။
“ မနေ့ည က ၆ နာရီ ကနေ စပြီး လက်နက်ကြီး တောက်လျှောက်ကျတယ်။ အဲ့မှာ ဘုရားရှိခိုးဖို့ လုပ်နေတဲ့ ကွန်းဌေး လက်နက်ကြီးစ ထိမှန််လို့ ပွဲချင်းပြီးသေသွားတယ်။သူ့ဇနီးကတော့ ခြေထောက် မှာ ကျည်စထိတယ်။ ဒဏ်ရာက မစိုးရိမ်ရဘူး” ဟု မိုင်းအိုက်မွန်း က ဆိုသည်။
လက်နက်ကြီးများစွာ ကျေးရွာအတွင်း ကျရောက်သဖြင့် ပန်းဆေး ကျေးရွာ ဒေသခံများသည် ဗုံးခိုကျင်းများသို့ ပုန်းရှောင်နေရကြောင်း လည်း မိုင်းအိုက်မွန်း က ပြောသည်။
ယမန်နေက ပန်းဆေး ကျေးရွာအတွင်း လက်နက်ကြီး ၈လုံးခန့် ကျရောက်ပြီး၊ နေအိမ်တလုံး ပျက်စီး သွားကြောင်း၊အဆိုပါ လက်နက်ကြီးသည် တပ်မတော် အသုံးပြု နေသည့် လက်နက်ကြီး များဖြစ်နိုင်သည် ဟု ဒေသခံများ က ခန့်မှန်းပြောဆိုကြသည်။
“ ဒီလက်နက်က တပ်မတော် တပ်ကနေ ပစ်လာတဲ့ လက်နက်ကြီးတွေပါ်” ဟု ဒေသခံ အမျိုးသား တဦး က ထပ်လောင်းပြောသည်။
အဆိုပါ ပန်းဆေး ကျေးရွာသည် ကွတ်ခိုင် ခြေလျင်တပ်ရင်း ခလရ ၂၄၂ နှင့် ကပ်လျက်ရှိနေသည့် ကျေးရွာတရွာဖြစ်ပြီး အဆိုပါလက်နက်ကြီးကျည်များသည် ခလရ ၄၅ မှပစ်ခတ်သည်ဟုလည်း တအာင်းပြန်ကြားရေးကသတင်းထုတ်ပြန်ပါသည်။
သျှမ်းပြည်နယ် မြောက်ပိုင်း ကွတ်ခိုင်မြို့နယ် အတွင်း မြောက်ပိုင်း မဟာမိတ် (၃)ဖွဲ့ နှင့် မြန်မာ့တပ်မတော်တို့ ကြား တိုက်ပွဲပြင်းထန်ကာ ယနေ့ထိ နယ်စပ်ကုန်သွယ်ရေး လမ်းကြောင်း သွားလာမှု ခက်ခဲနေ သည်။တိုက်ပွဲကြောင့် ဒေသခံပြည်သူလူထု ၁၀ ထက်မနည်းထိခိုက်ဒဏ်ရာရရှိပြီး ၈ ဦးသေဆုံးခဲ့ကြောင်း လူသားချင်းစာနာမှုဆိုင်ရာ အဖွဲ့က ထုတ်ပြန်သည်။ ထို့အပြင် ဒေသခံလူထု ၇၀၀၀ ထက်မနည်း နေရပ်မှစွန့်ခွါကာ စစ်ဘေးရှောင် နေရကြောင်း လည်း UNOCHA ကထုတ်ပြန်ထားသည်။
Leave a Comments