သျှမ်းပြည်နယ် မြောက်ပိုင်း လားရှိုးမြို့နယ် အရှေ့ဘက်မိုင် ၃၀ ခန့်အကွာ မိုင်းယန်းကျေးရွာ အုပ်စု မန်ကောင်းကျေးရွာတွင် ပြည်သူ့စစ် ခေါင်းဆောင်၏နေအိမ်အား လက်နက်ကိုင်လူတစုက ၀င်ရောက်ပစ်ခတ်သဖြင့် ၄င်းနှင့်ဇနီး သေဆုံးခဲ့ ကြောင်း သတင်းရရှိသည်။
သြဂုတ်လ ၂၀ ရက် ည ၈ နာရီခွဲ အချိန်ခန့်က မိုင်းယန်းအုပ်စုနေ ဌာနေပြည်သူ့စစ်ခေါင်းဆောင် ဦးဝင်းမောင် ၏နေအိမ်အား ၀င်ရောက်ပစ်ခတ်ကြခြင်းဖြစ်ကြောင်း ၊ မည်သည့်အဖွဲ့ဖြစ်သည်ကို မသိရကြကြောင်း လားရှိုး အခြေစိုက် သျှမ်းလူငယ်ဖွဲ့ TYO မှ စိုင်းဟန် က သျှမ်းသံတော်ဆင့်ကို ပြောသည်။
“ မနေ့က ည ၈နာရီခွဲလောက် ဖြစ်တဲ့ ပစ်ခတ်မှုက တိုက်ပွဲမဟုတ်ဘူး။ လက်နက်ကိုင်အဖွဲ့တဖွဲ့ လာပစ်တာပါ။ ဘယ်သူဆိုတာ ဘယ်သူမှမသိကြဘူး။ မိုင်းယန်းပြည်သူ့စစ် ဦးဝင်းမောင် အသက် ၆၀ နဲ့သူ့အမျိုးသမီး ပါ့မြ အသက် ၅၈ နှစ်တို့ သေဆုံးသွားတယ်။ အိမ်ထဲက အသက် ၁၆နှစ် အရွယ် ကောင်လေးကတော့ ထွက်ပြေး လွှတ်မြောက်သွားတယ်” ဟု စိုင်းဟန် က ပြောပြသည်။
အဆိုပါ အမည်မသိ လက်နက်ကိုင် တဖွဲ့ သည် မိုင်းယန်း ပြည်သူ့စစ်ခေါင်းဆောင် နေအိမ်ကို သေနတ်များ၊ လက်ပစ်ဗုံးများ ပစ်ခတ်ခဲ့သည့် အပြင် နေအိမ်၊ ဆိုင်ကယ် နှင့်ထော်လာဂျီ တို့ကိုပါ မီးရှို့ ပစ်ခဲ့ ကြောင်း စိုင်းဟန် က ပြောသည်။
“မိုင်းယန်း ပြည်သူ့စစ် အိမ်ကို ကျနော်တို့ ရောက်သွားတော့ သေနတ်ကျည်တွေ၊ လက်ပစ်ဗုံးတွေ နောက် အိမ်ကို မီးရှုှ့ိထားတာ တွေ့ရတယ်။ ဦးဝင်းမောင်ရဲ့ အလောင်းကိုတော့ နေအိမ်ရဲ့ အိမ်သာထဲမှာ တွေ့တယ်။ ပါ့မြကတော့ အိမ်ထဲမှာ လက်နက်ကြီးထိပြီးသေနေတယ်” ဟု စိုင်းဟန် က ဆက်လက်ပြောသည်။
ထို လက်နက်ကိုင် အဖွဲ့သည် တရုတ်ဘာသာစကားဖြင့်သာ ပြောဆိုခဲ့ကြကြောင်း မိုင်းယန်းပြည်သူ့စစ် နေအိမ်ကို ည ၈ နာရီ ခွဲမှ ည ၉ နာရီ ခွဲ ထိ ပစ်ခတ်ခဲ့ကြကြောင်း မိုင်းယန်းကျေးရွာအုပ်စု မန်ကောင်း ကျေးရွာ ဒေသခံများ ပြောဆိုချက် အရသိရသည်။
လက်နက်ကိုင်များပစ်ခတ်မှုမှ ကျည်ခွံများ
အဆိုပါပစ်ခတ်မှုကို ဒေသခံများကထိတ်လှန့်ကာ ဘုန်းကြီးကျောင်းသို့သွားရောက်ခိုလှုံခဲ့ကြကြောင်း သိရသည်။
လက်ရှိတွင် ဦးဝင်းမောင် နှင့် ပါ့မြ တို့၏ရုပ်အလောင်း ကို လားရှိုးမြို့လူမှုကူညီရေးအဖွဲ့တို့က သွားရောက်ကူညီသယ်ဆောင်ကာ လားရှိုးပြည်သူ့ဆေးရုံ သို့ ပို့ဆောင်ထားကြောင်း သိရသည်။
