သျှမ်းပြည်နယ်မြောက်ပိုင်း တွင် တိုက်ပွဲများ ဆက်တိုက်ဖြစ်ပွားမှု ကြောင့် ဒေသခံ ၂၀၀၀ ကျော်မှာ စစ်ဘေးတိမ်းရှောင်ကာ ဘုန်းကြီးကျောင်းများတွင် ခိုလှုံနေရသည် ဟု သတင်းရရှိသည်။

သျှမ်းပြည်နယ် မြောက်ပိုင်း အတွင်း သြဂုတ် ၁၅ ရက်နေ့ မှစတင်ကာ ညီနောင် မဟာမိတ် (၃) ဖွဲ့ နှင့် မြန်မာ့ တပ်မတော် တို့ကြားဖြစ်ပွားသည့် တိုက်ပွဲကြောင့် စစ်ရှောင် ၁ ထောင် ကျော် နေရပ်စွန့်ခွာနေရပြီး၊ တချို့ မှာ ပစ်ခတ်သံများကြား ပိတ်မိနေကြောင်း သျှမ်းပြည်နယ် မြောက်ပိုင်း လူမှု ကူညီရေး အဖွဲ့ များ ၏ ပြောပြချက် အရ သိရသည်။

တိုက်ပွဲကြောင့် ထွက်ပြေးလာသည့် စစ်ရှောင် အများစု သည် သျှမ်းပြည်နယ် မြောက်ပိုင်း လားရှိုးမြို့နယ် ရှိ မိုင်းတင် ဘုန်းကြီးကျောင်းတွင် (၈၀၀) ကျော်၊ မတ်ချီနူဘုန်းကြီးကျောင်းတွင် ၄၀၀ ကျော်၊ လားရှိုး မန်ဆူ ဘုန်းကြီးကျောင်းတွင် ၁ထောင်နီးပါး ၊ တာယောဝ်ဘုန်းကြီးကျောင်းတွင် ၂၀၀ ကျော် ကွတ်ခိုင်မြို့နယ် မဟာစည် ဘုန်းကြီးကျောင်းတွင် ၂၃၀ ကျော်နှင့် သိန္နီ မြို့ နမ့်စလပ် ကက်သလစ် ဘော်ဒါဆောင် တွင် ၃၀၀ ကျော် ထွက်ပြေး တိမ်းရှောင်နေရကြောင်း သျှမ်းပြည် မြောက်ပိုင်း စစ်ရှောင်များ ကို ကူညီပေးနေသည့် အဖွဲ့များ က သျှမ်းသံတော်ဆင့် ကို ပြောပြသည်။

“ ကွတ်ခိုင် စစ်ရှောင် စာရင်း ကတော့ မဟာစည် ဘုန်းကြီးကျောင်းမှာ ၂၃၀ ရှိတယ်။ သူတို့ရှောင်လာပြီး ပြန်သွားကြတာရှိတယ်။ ဆွေမျိုးအိမ်မှာခိုလှုံနေသူတွေတော့ စာရင်း မကောက်နိုင်သေးဘူး။ အခု ဘုရားကျောင်းမှာ ရာဂဏန်းတော့ထပ် ရောက်နေတယ်” ဟု ကွတ်ခိုင် ကချင်လူငယ်အဖွဲ့ မှ မိုင်းမိုင် က သျှမ်းသံတော်ဆင့် သို့ပြောသည်။

စစ်ဘေးရှောင် အများစု သည် ကွတ်ခိုင် မြို့ ပေါ်ရှိ ဆွေမျိုးအိမ်တွင် တိမ်းရှောင်နေသဖြင့် စစ်ရှောင် အတိအကျမသိရသေးကြောင်း ၊ ထို့ ပြင် တိုက်ပွဲ များ ဆက်လက် တင်းမာနေသေးသဖြင့် မူဆယ်၊ ကွတ်ခိုင် နှင့် သိန္နီမြို့ ကြားရှိ ကျေးရွာ ပြည်သူများ ပိတ်မိနေကြောင်းလည်း မိုင်းမိုင် က ပြောသည်။

“ စစ်ရှောင်တွေ အတွက် ကတော့ အဓိက ကျန်းမာရေး စောင့်ရှောက်မှု နဲ့ အစားအစာ နေထိုင်ဖို့ ပဲ အရေးကြီးတယ်။ လိုအပ်တယ်” ဟု မိုင်းမိုင် က ထပ်လောင်း ပြောသည်။

အလားတူ လားရှိုးမြို့နယ် ကုန်းဆာ ကျေးရွာတွင် ယမန်နေ့ သြဂုတ်လ ၁၈ ရက် ည ၈ နာရီ ဝန်းကျင်က လက်နက်ကြီးကျည်ကျသဖြင့် ကုန်းဆာ ဒေသခံများသည် မိုင်းတင်ကျေးရွာ ဘုန်းကြီးကျောင်း သို့ ထွက်ပြေး တိမ်းရှောင်ခိုလှုံနေရာစားဝတ်ေနေရေး လိုအပ်ချက် များ ရှိနေသည် ဟု လားရှိုးမြို့ သျှမ်းလူငယ် အဖွဲ့ မှ စိုင်းဟန် က သျှမ်းသံတော်ဆင့် သို့ပြောသည်။

“ကုန်းဆာ ရွာကလူတွေ မိုင်းတင်ဘုန်းကြီးကျောင်းမှာ ၈၀၀ ကျော်ရှိနေတယ်။ အခု စားစရာ ကူညီမယ့် စေတနာရှင်တွေကိုခေါ်ပြီး မိုင်းတင် ကို သွားကြမလို့။ လိုတာကတော့ စားစရာ သောက်စရာ နေစရာတွေပါ ။ တာယောဝ်ဘုန်းကြီးကျောင်းမှာလည်း ၂၀၀ ကျော်ရောက်နေတယ်။သူတို့ကတော့ ဟိုနမ့်အုပ်စုသားတွေပေါ့၊ ဒီနေ့နေ့လည်မှ ထွက်လာကြတာ သူတို့က။ မတ်ချီနူ ဘုန်းကြီးကျောင်းမှာတော့ မတ်ချီနူရွာသားတွေပေါ့။ ” ဟု စိုင်းဟန် က ဆိုပြန်သည်။

အဆိုပါဒေသတွင် ရွာနှင့်နီးကပ်စွာ ပစ်ခတ်နေသော တဖက်တည်းသာပစ်ခတ်သည့် ပစ်ခတ်သံများဖြစ်ကြောင်းလည်း စစ်ဘေးရှောင်လည်းဖြစ် စစ်ဘေးရှောင်ကူညီရေးအဖွဲ့တွင်လည်းပါ၀င်နေသည့် စိုင်းအိုက် ကပြောသည်။

လားရှိုး လူငယ် စိုင်းလောဝ် က “ သြဂုတ်လ ၁၉ ရက်ကနေ့ ညနေ ၃ နာရီခွဲအချိန်အထိတော့ လားရှိုး မန်ဆူ ဘုန်းကြီးကျောင်းမှာ စစ်ရှောင် ၁ ထောင်ကျော်ရှိသွားပြီ။ စားဝတ်နေရေး ကတော့ အထူးလိုအပ်နေပါတယ်။ ” ဟု သျှမ်းသံတော်ဆင့် ကို ပြောဆိုသည်။

ညီနောင် မဟာမိတ် (၃) ဖွဲ့ဖြစ်သည် တအာင်း(ပလောင်) အမျိုးသား လွတ်မြောက်ရေး တပ်မတော် (TNLA) ကိုးကန့်တပ်မတော်( MDAA)၊ ရက္ခိုင် တပ် (AA) အဖွဲ့များ ပြင်ဦးလွင် နောင်ချိုမြို့နယ်များတွင် ၀င်ရောက်ပစ်ခတ်မှုအပြီးနောက်ပိုင်းယနေ့တိုင် အစိုးရတပ်မတော်နှင့် စစ်ရေး တင်းမာမှုများဖြစ်ပွားနေသေး သဖြင့် စစ်ရှောင်များ ထပ်မံ ထွက်ပေါ်လာနိုင်သည် ဟုလည်း စစ်ရှာင် ကူညီရေး အဖွဲ့ က ပြောဆိုပါသည်။