သျှမ်းပြည်မြောက်ပိုင်း လားရှိုးမြို့ အထွက် တိမ်ဖြူဆီပန့်တွင် ယနေ့ နံနက်ပိုင်းက ပစ်ခတ်မှု ဖြစ်ပွားရာ ဒဏ်ရာရရှိသူများအား ကူညီကယ်ထုတ်ရန်သွားသည့် လားရှိုးလူငယ် လူမှုကူညီရေးအဖွဲ့ကား လက်နက်ကိုင်အဖွဲ့ ပစ်ခတ်သောကြောင့် ဥက္ကဌ ဖြစ်သူ ပွဲချင်းပြီးသေဆုံး ပြီး ၄င်းကား နှင့်အတူ ပါလာသည့် လူငယ် သုံးဦးလည်း ဒဏ်ရာရရှိသွားသည်။

၂၀၁၉ ခု သြဂုတ်လ ၁၇ နံနက် ၈ နာရီ အချိန် လားရှိုး – မူဆယ်လမ်း ၊ လားရှိုးမြို့အထွက် ၁၂ ခန့် အကွာ နမ့်တွန်းကျေးရွာအုပ်စု အတွင်းရှိ တိမ်ဖြူစက်သုံးဆီရောင်းဝယ်ရေး ဆီပန့်တွင် ပစ်ခတ်မှု ဖြစ်ပွားကြောင်း၊ ပစ်ခတ်မှုကြောင့်ဆီပန့်မီးလောင်သဖြင့် ဒဏ်ရာရှိသူများအား ကူညီသယ်ထုတ်ရန် လားရှိုးလူငယ် ကူညီကယ်ဆယ်ရေးအဖွဲ့ ယာဉ်တန်း ၈ စီးက အခင်းဖြစ်ပွားရာနေရာတို့ ဦးတည်သွားစဉ် ပစ်ခတ်ခံရခြင်းဖြစ်သည်။

အဲဒီမှာ ဒဏ်ရာရရှိတဲ့သူ ရှိတယ် ဆိုလို့ ကျနော်တို့သွားတာ။ ရောက်ရောက်ချင်းတော့မဝင်နိုင်ဘူး။ သေနတ်သံငြိမ်သွားတော့ ကျနော်တို့ ပြန်ဝင် ဖို့ ကြိုးစားတာ ဥက္ကဌ ဦးထွန်းမြင့် ရဲ့ကား ပစ်ခတ်ခံရတာ ကျနော်တို့ကားက နောက်မှာ ။ အခြေအနေမကောင်းလို့ သေနတ်သံငြိမ်မှ အလောင်းပြန်သွားသယ်ထုတ်နိုင်ခဲ့တာ ။ ဆီပန့်မရောက်ခင်နားလေးမှာပစ်ခံရတာလေ – ဟု သျှမ်းလူငယ်အဖွဲ့ခေါင်းဆောင် စိုင်းဟန် က သျှမ်းသံတော်ဆင့်အားပြောသည်။လက်ရှိ မှာ လားရှိုးလူငယ်များ အသင်း ဥက္ကဌ ရုပ်အလောင်းနှင့် ကျည်ထိမှန်သူ ၃ ဦးကို လားရှိုးဆေးရုံသို့ ပို့ဆောင် ထားကြောင်း လားရှိုးလူငယ်အဖွဲ့ဝင် ကိုအောင်ကျော်ဦး က လည်း ပြောသည်။

“ ကျနော်တို့ ဥက္ကဌကတော့ ပွဲချင်းပြီး ဆုံးသွားတာ။ ကျန်တဲ့ ၃ ဦးကတော့ ဦးခေါင်း၊ လက်နဲ့ နားရွက်တွေ ဒဏ်ရာရတယ်။ ၂ ဦးကတော့ စိုးရိမ်ရတယ်။ ကျည်စတွေကများတယ်” ဟု ကိုအောင်ကျော်ဦးက ဆိုသည်။

အဆိုပါကူညီရေးယာဉ်အား သေနတ်ဖြင့်ပစ်ခတ်ခဲ့ပြီ း လက်နက်ကြီးဖြင့်လည်း ထပ်မံပစ်ခတ်ခဲ့သဖြင့် လူနာယာဉ်တိမ်းမှောက်သွားသည်ဟုလည်း သိရသည်။

သေဆုံးသူ လားရှိုးမြို့ ၁၂ ရပ်ကွက်နေ ဦးထွန်းမြင့် အသက် ၅၀ ခန့်သည် လူငယ်အရေး၊ ပရဟိတ အရေး တက်ကြွ လှုပ်ရှားသူ တဦးဖြစ်သဖြင့် လားရှိုးမြို့နယ်အတွင်း လူမှုကူညီရေး သာရေးနာရေးတွင်အထူးယုံကြည်ခြင်းခံရကြောင်း ၄င်းသည်ရပ်ကွက် ရ တွင်နေထိုင်ကြောင်း သိရသည်။

“ကျနော့်အမြင်က မတ်ချီနူဘက်မှာ တိုက်ပွဲဖြစ်တယ်။ သိန္နီ – ကွန်လုံကြားမှာ လဲ မြောက်ပိုင်းအဖွဲ့ နဲ့ အစိုးရတပ်ကြားတိုက်ပွဲဖြစ်တယ်။ တပ်မတော်က အရပ်ဝတ်နဲ့ ရှေ့တန်းအင်အားဖြည့်တတ်တော့ ထင်ယောင် ထင်မှားနဲ့ပစ်ခတ်ခံရတာဘဲဖြစ်မယ် ” – ဟု အသက် ရ၀ အရွယ်ရှိ လားရှိုးမြို့ရပ်မိရပ်ဖ တော်လှန်ရေးသမားဟောင်း တဦးက သုံးသပ်သည်။

သြဂုတ် ၁၇ ရက် နံနက်ပိုင်း တွင် သျှမ်းပြည်မြောက်ပိုင်း သိန္နီ – ကွန်လုံကြား တံတားနှစ်စင်းလဲ မိုင်းခွဲ ဖျက်ဆီးခံထားရသကဲ့သို့ လားရှိုးမြို့တွင်းတွင်လည်းကောင်း၊ လားရှိုး – မူဆယ်ကြား ပြည်ထောင်စုလမ်းမ တလျှောက်တွင်လည်းကောင်း အခြေအနေမကောင်းလှသဖြင့် ဒေသခံလူထုမှာ အိမ်ပိတ် စျေးပိတ်ထားကြကြောင်း ဒေသခံများပြောပြချက်အရသိရသည်။

သြဂုတ် ၁၅ ရက် နံနက်ပိုင်းက ပြင်ဦးလွင်တပ်မတော်နည်းပညာ တက္ကသိုလ်၊ နောင်ချို – ကျောက်မဲကြား ဂုတ်တွင်းတံတား၊ အေးရှားဝေါဂိတ်အပါ အဝင် နေရာ ၅ ခု အား မြောက်ပိုင်းမဟာမိတ်တပ်ဖွဲ့ဝင်များက ၀င်ရောက်တိုက်ခိုက်ရာမှာ သေကြေဒဏ်ရာရရှိသူများပြားသောကြောင့် အစိုးရတပ်မတော် မှ အပြင်းအထန် ထိုးစစ်ဆင်လာနိုင်ဖွယ်ရှိသည်ဟု စစ်ရေးလေလာသူများက သုံးသပ်သည်။