သျှမ်းပြည်နယ် မြောက်ပိုင်း တန့်ယန်းမြို့နယ် အတွင်း ရှိ သျှမ်းပြည်တိုးတက်ရေး ပါတီ၊ သျှမ်းပြည်တပ်မတော် SSPP/SSA စခန်းအား မြန်မာအစိုးရတပ်မတော် မှ ၂ နာရီကျော်ကြာ တိုက်ခိုက်ခဲ့သည်ဟု SSPP/SSA ပြောပြ ချက်အရသိရသည်။
ထို တိုက်ပွဲသည် ၂၀၁၉ သြဂုတ်လ ၆ ရက် မွန်းလွဲ ၂ နာရီ မှ ညနေ ၄နာရီ ကျော်ထိ မြန်မာအစိုးရတပ်မတော် ခြေလျင်တပ်ရင်းအမှတ် ခလရ ၁၂၇ ၊ ခြေမြန်တပ်ရင်း ခမရ ၅၂၃ တို့ မှ တန့်ယန်းမြို့နယ် နားပိန်းကျေးရွာ ဘက်ရှိ SSPP/SSA မူးယစ်ဖြတ်ရေး တပ်အား တိုက်ခိုက်ခြင်းဖြစ်သည်ဟု SSPP/SSA အတွင်းရေးမှူး ၂ လည်းဖြစ်သည့် ပြောရေးဆိုခွင့်သူ ဒုတိယ ဗိုလ်မှူးကြီး စိုင်းဆု က သျှမ်းသံတော်ဆင့် သို့ပြောသည်။
“ ကျနော်တို့မူးယစ်ဆေးဝါးစစ်ဆေးမှုတွေ ပြုလုပ်တယ်။ သုံးစွဲသူ ၂၉ ယောက် ဖမ်းဆီးတာကို စစ်သား စုဆောင်းတယ်ဆိုပြီး ကျနော်တို့ကို မြန်မာ တပ်မတော် က ဝင်ပစ်တာပါ။ ထိခိုက်မှုတော့ သေချာ မသိသေးဘူး” ဟု ဒုတိယ ဗိုလ်မှူးကြီး စိုင်းဆု က ဆိုသည်။
လက်ရှိတွင် အစိုးရတပ်မတော်သည် သုံးဘက်သုံးတန်ဖြင့် အင်အားဖြည့်နေကြောင်း၊ တိုက်ပွဲ ဆက်ဖြစ်လာ နိုင်မည့် အလားအလာရှိကြောင်း SSPP/SSA ရှေ့တန်းတပ်မှူးကြီး ကလည်းပြောသည်။
တန့်ယန်း စစ်ဗျူကုန်းနှင့် နီးစပ်သည့် ပုဂ္ဂိုလ်တဦးက -“ SSPP က မူးယစ်ဆေး စစ်ဆေးတယ် အကြောင်းပြပြီး လူအင်အားစုစောင်းတယ်။ တပ်မတော်မူ ၆ ချက်ကို ချိုးဖေါက်နေလို့ သွားရှင်းလင်းတယ်လို့ ကြားတယ် ”- ဟု ပြောသည်။
သျှမ်းပြည်တပ်မတော် SSPP/SSA သည် ပြည်နယ်အဆင့် ပြည်ထောင်စု အဆင့် ငြိမ်းချမ်းရေးတည်ဆောက် ထားသည့် အဖွဲ့သာဖြစ်ပြီး တနိုင်ငံလုံးအပစ်အခတ်ရပ်စဲရေးစာချုပ် လက်မှတ် ရေးထိုးထားခြင်းမရှိသေးပါ။
မူးယစ်ဆေး သုံး သည့် ဒေသခံများအား သျှမ်းပြည်တပ်မတော် SSPP/SSA မှ ဆီးစစ်ပြီး မူးယစ်ဆေးသုံးစွဲ ကြောင်း တွေ့ရှိက ဆေးပြတ်သည်အထိ ဆေးဝါးကုသမှု၊ အကျင့်စာရိတ္တပြုပြင်မှုများ ပြုလုပ်ပေးချင်းဖြစ်ကြောင်း ဒုတိယ ဗိုလ်မှူးကြီး စိုင်းဆု ကပြောသည်။
မြန်မာ အစိုးရ တပ်မတော် အနေဖြင့် ဇူလိုင် ၁ ရက မှ သြဂုတ်လ ၃၁ ရက် အထိ တိုင်း စစ်ဌာနချုပ် ၅ တိုင်း ဖြစ်သည့် မြောက်ပိုင်းတိုင်း စစ်ဌာနချုပ် နယ်မြေ၊ အရှေ့မြောက် တိုင်းစစ်ဌာနချုပ် နယ်မြေ၊ အရှေ့ပိုင်း တိုင်း စစ်ဌာနချုပ် နယ်မြေ၊ အရှေ့ အလယ်ပိုင်း စစ်ဌာနချုပ် နယ်မြေ နှင့် တြိဂံဒေသ တိုင်းစစ်ဌာနချုပ် နယ်မြေများ ကို စစ်ရေး လှုပ်ရှားမှု ရပ်ဆိုင်းထားကြောင်း ကြေညာထားသည့်ကြား တိုက်ပွဲဖြစ်ပွားလာခြင်းဖြစ်သည်။
Leave a Comments