သျှမ်းပြည်နယ် အရှေ့ပိုင်း ကျိုင်းတုံ ဟော်နန်းမြေနေရာ ပြန်ရရေး အတွက် သမ္မတထံ စာတင်ပြ တောင်းဆိုသွားမည် ဟု သိရသည်။

သျှမ်းသမိုင်းဝင် ကျိုင်းတုံမြို့ အထင်ကရ စော်ဘွားများ၏ အမွေအနှစ် ဟော်နန်းကြီးသည် လွန်ခဲ့သည် ၁၉၉၁ ခုနှစ် နိုဝင်ဘာ ၉ ရက် မနက် ရ နာရီ ၄၁ မိနစ် က ဖြိုချ ဖျက်ဆီးခံခဲ့ရပြီး ဟော်နန်းနေရာ ကို ကျိုင်းတုံ ဟိုတယ် အစားထိုးတည်ဆောက် ထားသည်။

လက်ရှိ ကျိုင်းတုံဟိုတယ်မြေနေရာ ကို ပြန်ရရှိပြီး ဟော်နန်းပုံတူ ပြန်လည် တည်ဆောက်နိုင်ရေး အတွက် ကျိုင်းတုံ ဟော်နန်း ပြန် လည်ဖော်ဆောင်ရေး ကော်မတီနှင့် နိုင်ငံရေး ပါတီများ၊ လွှတ်တော် ကိုယ်စားလှယ်များ၊ လူမှုရေးအသင်းများနှင့် ပြည်သူလူထုများက သြဂုတ် ၃ရက်နေ့တွင် တွေ့ဆုံဆွေးနွေးမှု ပြုလုပ်ခဲ့ကြောင်းသိရသည်။

အဆိုပါ တွေ့ဆုံဆွေးနွေးမှု တွင် သြဂုတ်လ ၃ရက်နေ့ ကျိုင်းတုံ ပါလျံ ဘုန်းကြီးကျောင်း တွင် နေ့လည် ၂နာရီတွင် ကျင်းပခဲ့ပြီး၊ ကျိုင်းတုံ စော်ဘွားမျိုးနွယ်များ တက်ရောက် ပူးပေါင်းပါဝင်လာသည် ဟု လည်း ကျိုင်းတုံ ဟော်နန်း ပြန်လည် ဖော်ဆောင်ရေး ကော်မတီဝင်က သျှမ်းသံတော်ဆင့် သို့ ပြောသည်။

“စော်ဘွားမျိုးနွယ်တွေလည်း လာပြီး ကူညီတယ်။ သူတို့ မျိုးနွယ်အ တွက်တောင်းဆိုတာ မဟုတ်ဘူး။ တောင်းလို့ ရရင် လည်း ပြည်သူတွေ အတွက်ပါပဲ” ဟု အစည်းအဝေးတက်ရောက်သူ ဦးစိုင်းဆမ်တစ်ဆေ က ပြောသည်။

လက်ရှိ မှာ ကျိုင်းတုံ ဟော်နန်း မြေနေရာ ပြန်လည်ရရှိရေး နှင် ရှေးမူမပျက် ပြန်လည် တည်ဆောက်ရေး အတွက် နိုင်ငံတော် သမ္မတ ၊ သျှမ်းပြည်နယ် ဝန်ကြီးချုပ်၊ ယဉ်ကျေးမှု ဝန်ကြီးဌာန နှင့် ဟိုတယ် နှင့် ခရီးသွား ဝန်ကြီး ဌာနတို့ထံ စာတင်သွားမည် ဟု လည်း သိရသည်။

ထို တွေ့ဆုံဆွေးနွေးမှုတွင် ကျိုင်းတုံစော်ဘွားမျိုးနွယ် တဦးဖြစ်သည့် စဝ်ဆိုင်မိန်း ၏ သမီးတော် ဒေါက်တာ ရင်ရင်နွယ်လည်း ပါဝင်တက်ရောက်ခဲ့သည်။

ကျိုင်းတုံ ဟော်နန်း မြေ ပြန်ရရှိရန်နှင့်ဟော်နန်း ပုံတူ ပြန်လည် တည်ဆောက်ရန် အတွက် သျှမ်းပြည် ရှေးဟောင်း အမွေ အနှစ် များ ပြန်လည် ဖော်ထုတ်ရေး ကော်မတီ (ယာယီ) ကို ၂၀၁၇ ခုနှစ်မှ စတင်ကာ ဖွဲ့စည်းခဲ့ကြောင်း သိရသည်။