သျှမ်းပြည်နယ် အရှေ့ပိုင်း မိုင်းပျဉ်း မြို့နယ်တွင် အသက် ၅၂ နှစ်အရွယ် ရွာသားအမျိုးသားတဦးကို NCA ထိုး သျှမ်းလက်နက်ကိုင် အဖွဲ့ နှင့် ပတ်သတ်မှု ရှိသည်ဟု စွပ်စွဲကာ တပ်မတော် ဖမ်းဆီးခဲ့ကြောင်းသိရသည်။
မိုင်းပျဉ်း မြို့နယ် ယန်းခမ်းကျေးရွာအုပ်စု နမ့်တက်ရွာနေ ဦးနန္ဒိယ အား တပ်မတော်က ရက်ပေါင်း ၂၀ ကျော် ဖမ်းဆီးစစ်ဆေးခဲ့ပြီးနောက် ဇူလိုင် ၂၈ ရက် ည ၈ နာရီ ခွဲကျော်က မိုင်းပျဉ်းမြို့နယ် ရဲစခန်း တွင် မူးယစ်ဆေးဝါးမှု ဖြင့် တိုင်ချက်ဖွင့် ခဲ့ခြင်းဖြစ်သည်။
စစ်တပ်မှ ဖမ်းဆီးသည့် ဦးနန္ဒိယ သည် မည်သည့် လက်နက်ကိုင် အဖွဲ့အစည်းနှင့် ပတ်သတ်မှု မရှိကြောင်း၊ ဒေသခံ တဦးသာဖြစ်ကြောင်း မိုင်းပျဉ်း မြို့နယ် နမ့်ပူးကျေးရွာ မှ အသက် ၅၀ ကျော် လယ်သမား အမျိုးသား တဦး က ပြောသည်။
“ ဦးနန္ဒိယ က ပြည်သူပါပဲ။ ဘယ်အဖွဲ့အစည်းမှ မဟုတ်ဘူး။ ဖမ်းထားတာ ရက် ၂၀ ရှိတော့မယ် သတင်းမကြားဘာမကြားဖြစ်နေတယ်။ ဖမ်းသွားတဲ့တပ်ကလည်း ဘာမှအကြောင်းကြားလာတာမရှိဘူး ” ဟု ၎င်း အမျိုးသား ဆိုသည်။
ဦးနန္ဒိယ ကို RCSS/SSA တပ်ဖွဲ့ အမာခံ ဟု မိုင်းပျဉ်းအခြေစိုက်တပ်က စွပ်စွဲကာ ရက်ပေါင်း ၂၀ ကျော် စစ်ဆေးမှု မှာ မပြုလုပ်သင့်ကြောင်း၊ RCSS/SSA သည် အပစ်ခတ်ရပ်စဲရေး လက်မှတ်ထိုးထားသည့် တိုင်းရင်းသားလက်နက်ကိုင်အဖွဲ့ တခုဖြစ်ကြောင်းလည်း သျှမ်း လူ့အခွင့်အရေး မဏ္ဍိုင် (SHRF) မှ ပြောရေး ဆိုခွင့်ရှိသူ စိုင်းဟော်ရှဲန် က သျှမ်းသံတော်ဆင့် သို့ ပြောသည်။
“ ကျနော် အနေနဲ့ ပြောရရင် RCSS/SSA လက်မှတ်ထိုးထားတဲ့အဖွဲ့လေ။အန်စီအေလည်း ထိုးထားတယ်။ဒီလို ဖမ်းဆီးတာ က ပြည်သူအတွက် အခက်အခဲဖြစ်စေတယ်။ အခုလို ဖမ်းတာ က NCA လက်မှတ်ထိုးထားတာကို ချိုးဖောက်တယ်လို့ မြင်တယ်” ဟု စိုင်းဟော်ရှဲန် က ဆိုသည်။
တပ်မတော် မှ ဒေသခံ ဦးနန္ဒိယ ကို RCSS/SSA အဖွဲ့ နှင့် ဆက်စပ်မှုဖြင့် ဖမ်းဆီးခြင်းသည် ပြည်သူများအနေဖြင့် RCSS/SSA ကို မချိတ်ဆက်စေချင်သည့် သဘောဖြစ်ကြောင်း၊ ရှုပ်ထွေးမှု ဖြစ်စေချင်သည့် သဘောဖြစ်သည် ဟု RCSS/SSA ပြောရေး ဆိုခွင့် ရှိသူ ဒုတိယ ဗိုလ်မှူးကြီး စိုင်းဦး က သျှမ်းသံတော်ဆင့် သို့ ပြောသည်။
“ ပြည်သူတွေကို RCSS/SSA နဲ့ မဆက်သွယ်မပတ်သက်စေချင်တာ။ လူထုကြောက်သွားအောင် ခြောက်လိုက်တာ။ နောက် မူးယစ်ဆေးအမှုနဲ့ အမှုဖွင့်လိုက်တယ် ဒါဟာ အပြစ်မရှိ အပြစ်ရှာလိုက်တာပဲ” ဟု ဒုတိယဗိုလ်မှူးကြီးစိုင်းဦးက ဆိုသည်။
ယခုလ ၆ ရက်နေ့ကလည်း မိုင်းပျဉ်းမြို့နယ် မိုင်းလျန်းကျေးရွာ အသက် ၃၂ နှစ်အရွယ် ဂျပေါ သည် RCSS/SSA စစ်သားများအတွက် ဆန်ဝယ်ပေးသည် ဟု စွပ်စွဲကာ အစိုးရ စစ်တပ် ခြေမြန်တပ်ရင်း ခမရ ၅၇၉ မှတပ်သားများ က ထိုးနှက်မှု များပြုလုပ်ခဲ့ကြောင်း ဇူလိုင် ၂၅ ရက်စွဲဖြင့် သျှမ်းလူ့အခွင့်အရေး မဏ္ဍိုင် SHRF မှ ထုတ်ပြန်ထား သည်။
Leave a Comments