သျှမ်းပြည်နယ် မြောက်ပိုင်း လားရှိုးမြို့ ရှိ Gold Luck Water Park ရေကစားကွင်း အလုပ်သမား လုပ်အားခ မရသေးသည့် ကိစ္စ နှင့်ပတ်သက်ပြီး သတင်းရေးသားသည့် သတင်းထောက် ခွန်ဇော်ဦး ပို့ကုန်၊သွင်းကုန် ဥပဒေ နှင့် အမှုဖွင့် ခံရကြောင်း သတင်းရရှိသည်။
လွန်ခဲ့သည့် ဇူလိုင် ၂၂ ရက်နေ့တွင် Gold Luck Water Park ရေကစား ကွင်းမှ အလုပ်သမားများ လုပ်အားခ မရရှိသေးသည့် ကိစ္စနှင့် ပတ်သက်ပြီး ပိုင်ရှင် ဦးရဲနိုင်ဆီ အင်တာဗျူး သွားရာ မှ အမှုဖွင့်ခံခဲ့ရခြင်းဖြစ်ကြောင်း သတင်းလိုက်ပါ ယူသည့် အလွတ်တန်းသတင်းထောက် မြတ်မိုးသူ က သျှမ်းသံတော်ဆင့် သို့ ပြောသည်။
Gold Luck Water Park အလုပ်သမား များ လုပ်အားခ မရရှိကာ အလုပ်သမားရုံးကို တိုင်ကြားနေသည် ဟု ဇူလိုင် ၂၂ ရက်နေ့တွင် သတင်းထောက် ခွန်ဇော်ဦး က သူ၏ လူမှုကွန်ရက်စာမျက်နှာပေါ်တွင်ရေးသားခဲ့သည်။
ထိုရေးသားမှုကြောင့် Gold Luck Water Park ပိုင်ရှင် ဦးရဲနိုင် က မကျေမနပ်ဖြစ်ကာ အင်တာဗျူးပေးစဉ်တွင် အခြေအတင်း စကားများရာမှ၊ သက်ဆိုင်ရာ အာဏာပိုင်ဆီ ဖုန်းဆက်ကြောင်း သတင်းထောက် မမြတ်မိုးသူ က ပြောသည်။
“ကျမ တို့ ဝင်ဝင်ချင်းပဲ။သူ(ဦးရဲနိုင်) က သူနာမည်နဲ့ ဖေ့ဘွတ်စ်ပေါ်တင်တာလဲ လို့ စပြောပါတယ်။ နောက် သူ့တပည့်တွေကို ခြံတံခါးတွေ ပိတ်ခိုင်းတယ်။ မင်း(ခွန်ဇော်ဦး)ကို တရားစွဲရုံမကဘူး ထောင်ပါချမယ်လို့ လည်းခြိမ်းခြောက်ပါတယ်” ဟု မမြတ်နိုးသူ က ဆိုသည်။
နေ့စားအလုပ်သမားများ လစာ မရရှိမှု နှင့် ပတ်သတ်ပြီး သွားရောက် အင်တာဗျူးသည်ကိုလည်း ရုပ်သံ၊ဗွီဒီယို မရိုက်ခိုင်းခဲ့ကြောင်း၊ အင်တာဗျူး မပြီးခင် အချိန်တွင် ယာဉ်ထိန်းရဲ မှ ခြံထဲသို့ ဝင်ရောက်ကာ ဦးရဲနိုင်မှ ကားများ လိုင်စင်ရှိ၊ မရှိ အားလုံးစစ်ပါဆိုပြီး ပြောဆိုခဲ့ကြောင်း သိရသည်။
“ ကျမ က အင်တာဗျူးလာတာ လို့ပြောတော့ သူ (ဦးရဲနိုင်) က ဓာတ်ပုံမရိုက်၊ ဗွီဒီယိုမရိုက်ခိုင်းဘူး။ ရီကော်တာနဲ့ ပဲလုပ်ခဲ့တယ်။ အင်တာဗျူးမပြီးခင်မှာပဲ ယာဉ်ထိန်းရဲက လာတယ်။ ကျမတို့ စီးလာတဲ့ ကားက လိုင်စင်မဲ့ဆိုတာ သိနေတော့ စစ်စရာမလို့ပါဘူးလို့ ကျမ ယာဉ်ထိန်းရဲကို ပြောလိုက်တယ်။နောက် သော့ ပေးလိုက်ပါတယ်” ဟု မမြတ်မိုးသူက ပြောသည်။
ထို့ပြင် သျှမ်းပြည်နယ် မြောက်ပိုင်း လားရှိုး အခြေစိုက် ဒီဗွီဘီ သတင်းထောက် ခွန်ဇော်ဦး ကို ယာဉ်ထိန်းရဲ မှခေါ်ဆောင်သွားကာ ဇွန် ၂၈ ရက်နေ့ တွင် လားရှိုး အမှတ်(၁) ရဲစခန်းမှ ပ (၂၈၀/၂၀၁၉ ) ပို့ကုန်၊ သွင်းကုန် ဥပဒေ ဖြင့် အရေးယူ အမှုဖွင့်ထားကြောင်း ရဲစခန်းမှ သိရသည်။
“ ဒီကိစ္စ က နယ်သတင်းထောက်တွေကို တဖက်လှည့် ခြိမ်းခြောက်လိုက်တာပါပဲ။ သတင်းနဲ့ မဆိုင်တာ ဆွဲ ထည့်လိုက်တာပါပဲ။ သတင်းထောက် အနေနဲ့ အရမ်းထိခိုက်တယ်” ဟု မမြတ်နိုးသူကဆိုသည်။
သတင်းထောက်အား လိုင်စင်မဲ့ကားအမှုဖြင့်ဖမ်းဆီးအရေးယူခြင်းအပေါ် မြို့နယ်အသီးသီးရှိ သတင်း ထောက်များအဖွဲ့များက ကန့်ကွက်ရှုပ်ချကြောင်းကြေငြာချက်များထုတ်ပြန်ခဲ့ပြီး သတင်းသမားများခြိမ်းခြောက်ခံနေရမှုအပေါ် သတင်းမီဒီယာအဖွဲ့အစည်းအသီးသီးမှ မြန်မာနိုင်ငံသတင်းမီဒီယာကောင်စီသို့လည်း တင်ပြသွားမည်ဖြစ်ကြောင်းသိရသည်။
သျှမ်းပြည်နယ်အတွင်းရှိ လိုင်စင်မဲ့ကားများမှာ ရောင်းဝယ်ရာတွင်စျေးသက်သာပြီး ဒေသတွင်းသွားလာရလွယ်ကူသဖြင့် သျှမ်းပြည်တွင်းကားများ ၈၀ ရာခိုင်နှုန်း မှာ လိုင်စင်မဲ့ ကားများဖြစ်ကြောင်းသိရသည်။
Leave a Comments