သျှမ်းပြည်တောင်ပိုင်း နမ့်စန်မြို့တွင် နေထိုင်သည့် သတင်းထောက်ဟောင်းတစ်ဦးကို စစ်ကောင်စီမှ လာရောက် ဖမ်းဆီးသွားကြောင်း သတင်းသိရသည်။

ပြီးခဲ့သည့် မတ်လ ၇ ရက်နေ့ ည ၉ နာရီကျော်ဝန်းကျင်အချိန်တွင် နမ့်စန်မြို့မှာ နေထိုင်သည့် အလွတ်တန်း သတင်းထောက်ဟောင်း ကိုသန်းစိုးအောင်ကို စစ်ကောင်စီတပ်သားများက လာရောက်ဖမ်းဆီးသွားကြောင်း သတင်းသိရသည်။

“အရင်ကတော့ DVB နဲ့ ဂျာနယ်တချို့မှာ ရေးဖူးတာ သိရပါတယ်၊၊ မတ်လ ၇ ရက်နေ့ ညမှာ စစ်ကောင်စီတပ်သားတွေက လာဖမ်းသွားတယ်” ဟု ဖြစ်စဥ်များကို သိရှိရသည့် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ကိုသန်းစိုးအောင်သည် အရင်နိုင်ငံရေးကောင်းစဥ်က အလွတ်တန်း သတင်းထောက်ဖြစ်ခဲ့ဖူးသော်လည်း လက်ရှိ မှာ နိုင်ငံရေးအခြေအနေနှင့် ကျန်းမာရေးအခြေအနေများကြောင့် သတင်းထောက်အလုပ် ရပ်နားထားသူတစ်ဦးဖြစ်သည်။

လက်ရှိမှာ Namsam Net Page တွင်တင်ထားသည့် သတင်းနှင့်ပတ်သက်ပြီး လာရောက်ဖမ်းဆီးခြင်းဖြစ်ကြောင်းသိရသည်။

“အရင်နေ့တွေက သူ့ကျန်းမာရေးမကောင်းလို့ သူ့အမျိုးသမီးအမျိုးရှိတဲ့ရွာမှာ သွားနေခိုင်းပြီး ကုသမှုတွေခံယူခဲ့ တာ တော်တော်ကြာပြီ၊ အဲ့နေ့ (မတ် ၇) ရက်နေ့ ညနေ ၃ နာရီလောက်မှာမှ အိမ်ပြန်ရောက်လာတာ၊ ည ၉ နာရီ လောက်တော့ စစ်ကောင်စီတွေက လာဖမ်းသွားတာပဲ” ဟု မိသားစုနှင့် နီးစပ်သူက သျှမ်းသံတော်ဆင့်ကို ပြောသည်။

စစ်ကောင်စီတပ်သားတို့မှ ကိုသန်းစိုးအောင်ကို လာရောက်ဖမ်းဆီးစဥ်တွင် Namsam Net Page မှာ တင်ထားသည့် သတင်းတစ်ခု၌ “အကြမ်းဘက် စစ်ကောင်စီ” ဆိုသည့် စကားလုံးပါနေသည့်အတွက် ဖမ်းဆီးရခြင်းဖြစ်သည်ဟု ပြောဆိုသွားကြောင်းလည်း သိရသည်။

“Namsam Net Page မှာ တင်ထားတဲ့ဟာက “အကြမ်းဖက် စစ်ကောင်စီ” လို့ ပါလို့ ဖမ်းရတာတဲ့၊ အခု နမ့်စန်မြို့ ရဲစခန်းမှာ ဖမ်းထားတယ်၊ အကြမ်းဖက် ပုဒ်မနဲ့ လာမယ့် ၁၄ ရက်နေ့မှာ ရုံးထုတ်မယ်လို့ သိရတယ်” ဟု အထက်ပါ ပုဂ္ဂိုလ်က ပြောသည်။

လက်ရှိ ကိုသန်းစိုးအောင် အိမ်တွင် သူ၏ ကလေးငယ်နှစ်ဦးနှင့် အမျိုးသမီး ကျန်ရှိနေပြီး အမျိုးသမီးဖြစ်သူက ကိုသန်းစိုးအောင်ကျန်းမာရေးအတွက် စိုးရိမ်ပူပန်မှုများရှိနေကြောင်းလည်း အိမ်နီးချင်းများက ပြောသည်။

“စိတ်ပူတာတော့ ရှိတာပေါ့၊ ပြီးတော့ သူ(ကိုသန်းစိုးအောင်)က ကျန်းမာရေးမကောင်းတော့ ပိုပြီးစိုးရိမ်ရတယ်၊ အထဲမှာ အမှုရင်ဆိုင်တဲ့ ကာလ ဆေးကုသမှုရရင်တော့ တမျိုးပေါ့၊ ဒါပေမဲ့ လွတ်လာရင်တော့ အကောင်းဆုံးပါ” ဟု အမည်မဖော်လိုသူ အိမ်နီးချင်းတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် အပတ်တွင်လည်း သျှမ်းပြည်တောင်ပိုင်း ရပ်စောက်မြို့နယ် အင်တောမြို့က နိုင်ငံရေးပိုစ့်တင်သည် ဆိုသည့်အကြောင်းပြချက်ဖြင့် စစ်ကောင်စီဖမ်းဆီးခေါ်ဆောင်သွားသည့် ဒီဇိုင်နာ အမျိုးသမီးတစ်ယောက်လည်း ယနေ့အချိန်ထိ အဆက်အသွယ်မရသေးကြောင်း သိရသည်။

အာဏာသိမ်း စစ်ကောင်စီတို့သည် ၎င်းတို့ကို ဝေဖန်ပြောဆိုသည့် သတင်းတိုက်များနှင့် သတင်းသမားများကို ချိတ်ပိတ် ဖမ်းဆီးပိတ်ပင်မှုများ ပြုလုပ်သည့်အပြင် လူမှုကွန်ယက်စာမျက်နှာပေါ် ရေးသားတင်မိသော အကောင့်ပိုင်ရှင်များကိုလည်း လိုက်လံဖမ်းဆီးမှုများ ပြုလုပ်နေသည်။