သျှမ်းပြည် အရှေ့ပိုင်း ထိုင်းနယ်စပ် ချစ်ကြည်ရေး တံတား (၁) မယ်ဆိုင်တံတား စစ်ဆေးရေး ဂိတ် တွင် စိတ်ကြွဆေးပြား ၁သောင်းကျော် နှင့် အိုက်စ် (၄၀၀) ဂရမ် ကိုထိုင်းရဲများဖမ်းဆီးရမိကြောင်း သတင်းရရှိသည်။
ဇူလိုင်လ ၁၇ ရက် ယနေ့မနက် ၉ နာရီ ဝန်းကျင်က တာချီလိတ် မှ မယ်ဆိုင်သို့ ပြန်လာသည့် အသက် (၁၉ ) နှစ် နှင့် အသက် (၃၀) ကျော် အရွယ် ထိုင်းနိုင်ငံမြောက်ပိုင်း ဖယောင်းခရိုင်မှ အမျိုးသား ၂ ဦး ကို လမ်းလျှောက်ပုံထူးဆန်းနေသည်ဟုဆိုကာ ထိုင်း လူဝင်ကြီးကြပ်ရေး နှင့် အကောက်ခွန် တို့ မှ စစ်ဆေးရာ ခန္ဓါကိုယ်ပေါ်တွင် ဥပဒေမလွှတ်ကင်းသည့်ပစ္စည်းမတွေ့သော်လည်း ဖိနပ်အတွင်း လျှို့ဝှက်ထည့်သွင်းသယ်ဆောင်လာသည့် မူးယစ်ဆေးဝါးများကို ဖမ်းမိသည် ဟု Chiang Rai Report မှ ရေးသားချက် အရ သိရသည်။
အဆိုပါ ထိုင်း နိုင်ငံသား ၂ ဦး ၏ ဖိနပ်နှစ်ဘက် အတွင်း ဝှက်ပြီး သယ်လာသည့် စိတ်ကြွဆေးပြား (၁၁၀၀၀) နှင့် အိုက်စ် (၄၀၀) ဂရမ် တို့ကို စစ်ဆေးတွေ့ရှိကြောင်း သတင်းတွင်ဖော်ပြထားသည်။
ယခုရက်ပိုင်း သျှမ်းပြည်နယ် တာချီလိတ် အတွင်းတွင် ထိုင်းနိုင်ငံသားများ ထံ မကြာခဏ မူးယစ်ဆေးဝါး များနှင့် လက်နက်များဖမ်းဆီးရမိနေကြောင်း သတင်းရရှိသည်။
